Reinu stiʼ Dios ca nga ti gobiernu ni nuu guibáʼ. Jesús bisiidiʼ ca discípulo stiʼ guni orarcaʼ para gueeda Reinu ca lu Guidxilayú, purtiʼ laani nga gueedaneni ni jneza ne guendariuudxi. Nin ti gobiernu de lu Guidxilayú riʼ qué zanda cuee guendaridinde, ca cosa qué raca jneza ca nin ca guendahuará ca, peru gobiernu stiʼ Dios ca zanda guni ni ne chigúnibe ni. Maʼ gulí Dios xiiñiʼ, Jesucristu, para gacaʼ rey lu Reinu riʼ ne maʼ gulícabe ti grupu de xpinni Cristu para guni mandarné laabe. (Biindaʼ Lucas 11:2 ne 22:28-30.)

Maʼ cadi candaa, zunduuxeʼ Reinu ca guiráʼ ca xhenemigu Dios. Nga runi, ora guni orarnu para gueeda Reinu ca, ni cayúninu nga canábanu Dios cuee ca gobiernu riʼ ne guiaana stibe ca. (Biindaʼ Daniel 7:13, 14 ne Apocalipsis 11:15, 18.)

Modo riáʼ Jesús binni rusihuínnini laabe nga Rey ni caquiiñenu. Cumu laabe nga xiiñiʼ Dios la? nápabe poder ni caquiiñeʼ para gacanebe cani cucaa ridxi Bixhózebe gacané laacaʼ. (Biindaʼ Salmo 72:8, 12-14.)

Guiráʼ cani nabani modo ná ley stiʼ Dios ne de ladxidoʼcaʼ canábacaʼ gueeda Reinu stibe la? zacaacaʼ stale ndaayaʼ. Biiyaʼ xi rusiidiʼ Biblia de gobiernu riʼ. Qué ziuu dxi gaca arrepentirluʼ. (Biindaʼ Lucas 18:16, 17 ne Juan 4:23.)