Jesús guníʼ nanna Dios xi guiráʼ caquiiñenu dede ante guinábanu ni laa (Mateo 6:8). Ne David, rey ni biʼniʼ mandar Israel dxiqué, bicaa sicaríʼ: «Dede ante guiree ti diidxaʼ ruaaʼ, Jiobá, mápeca nannuʼ guiráʼ ni» (Salmo 139:4). Nga runi, zándaca chuʼ tu guiníʼ ique: «Pa nanna Dios guiráʼ ni riníʼ iqueʼ ne guiráʼ ni caquiiñeʼ, xiñee ndiʼ caquiiñeʼ guneʼ orar laabe yaʼ». Para ganda guicábinu guendarinabadiidxaʼ riʼ la? guidúʼyanu xi rusiene Biblia de oración runi binni. *

Nécapeʼ ruzeeteʼ Biblia nanna Jiobá * guiráʼ cosa la? laaca cusiéneni racalaʼdxiʼ Dios gunibiáʼ chaahuiʼ cada tobi de ca xpinni (Salmo 139:6; Romanos 11:33). Xquendabiaanibe cadi casi ti computadora ni, purtiʼ ti computadora maca nuu pabiáʼ guiʼchiʼ zanda cuʼ chaahuicabe ndaaniʼ. Dios dxandíʼ rizaalaʼdxiʼ ganna xi riníʼ íquenu ne gacané laanu, purtiʼ racaláʼdxibe gaca xhamígunu laabe (Salmo 139:23, 24; Santiago 4:8). Nga runi Jesús cayabi laanu guni orarnu nécapeʼ maca nanna Jiobá xi caquiiñenu (Mateo 6:6-8). Pa guiaʼnu guinínenu Dios ni bizáʼ laanu de cani riníʼ íquenu la? jma gaxha ziuʼnu de laabe.

Zándaca nuu biaje qué gánnanu xipeʼ guinábanu Dios. O qué ganda guininu cani runi sentirnu. Neca guizaacanu zacá, zanda ganna Dios xi caquiiñenu neca qué guininu ni ne zanda gacanebe laanu purtiʼ nánnabe xi caquiiñenu (Romanos 8:26, 27; Efesios 3:20). Nga runi, ora gudiʼnu cuenta maʼ gucané Dios laanu neca nuu biaje qué zahuínnipeʼ modo gúnibe ni la? runi sentirnu nuunu jma gaxha de laabe.

Biblia cayabi laanu rucaadiaga Dios ni jma napa poder oración runi ca xpinni, peru laaca rusiene ni xiñee nuu oración qué rucaadiágabe. Guyuu ti tiempu nabé guyuu guendaridinde ndaaniʼ guidxi Israel, biʼniʼ mandar Dios profeta Isaías gabi ca israelita ca diidxaʼ riʼ: «Neca gúnitu stale oración, qué rucaadiagadiáʼ; maʼ dxaʼ natu de rini» (Isaías 1:15). Casi ridúʼyanu, ca binni ni rinabaʼ ni cadi jneza la? cadi naquiiñeʼ cuézacaʼ gucaadiágabe laacaʼ (Proverbios 28:9; Santiago 4:3).

Peru Biblia laaca cuzeeteʼ: «Pa inaba nu ni riulaʼdxi Dios gaca la? zucaa diaga laanu» (1 Juan 5:14). Ñee pur nga zanda guininu rudii Dios ca xpinni guiráʼ ni guinábacaʼ laabe la? Coʼ, cadi zacá diʼ ni. Nápanu ejemplu stiʼ apóstol Pablu, chonna biaje gunábabe Dios cuee ti yuubaʼ ni nabé cayuniná laabe ni zeeda gaca «casi ra ridaabi guichi» (2 Corintios 12:7, 8). Zándaca gúpabe ti guendahuará lube ni qué rianda. Ngue runi, zándaca guyuube triste, purtiʼ bisiándabe binni ne dede gundísabe gueʼtuʼ, peru qué ñanda nusiándabe laaca laabe (Hechos 19:11, 12; 20:9, 10). Peru neca qué nicabi Dios laabe modo gucaláʼdxibe, bidiibe xquíxepeʼ laa purtiʼ bicabi laabe (2 Corintios 12:9, 10).

Dxandíʼ nga guyuu binni ni bibani tiempu gucuá Biblia ne bicabi Dios oración sticaʼ ra biʼniʼ milagru (2 Reyes 20:1-7). Peru neca zaqué, cadi guiráʼ diʼ biaje nga bicabi Dios laacabe né milagru. Guyuu biaje biʼniʼ sentir ca xpinni Dios qué nicábibe ca oración sticaʼ ne ngue guluu xizaa laacaʼ. Tobi de laacabe nga David, laabe guniʼbe sicaríʼ: «Pabiáʼ tiempu zusiaandaluʼ naa pue Jiobá, ñee maʼ qué ziuuruʼ dxi guietenaláʼdxiluʼ naa la?» (Salmo 13:1). Peru ora bidiibe cuenta panda biaje maʼ gucané Jiobá laabe la? jmaruʼ si biʼniʼ crebe laa de guidubi ladxidoʼbe. Ne ridúʼyanu zacá ni purtiʼ laaca lu oración biʼniʼ rey que guníʼ: «Runeʼ cré lu guendanachaʼhuiʼ stiluʼ» (Salmo 13:5). Cásica bizaaca rey David, ca xpinni Dios de yanna zándaca laaca naquiiñeʼ guni orarcaʼ stale biaje para guicabi Dios laacaʼ (Romanos 12:12).

Rudiibe laanu ni caquiiñenu.

Neca nadxii binni xiiñiʼ qué zudii diʼ laabe guiráʼ ni guinábabe laa ne qué zuni ni órapeʼ gacaláʼdxibe. Zacaca nga Dios, laabe qué gápabe xidé guicábibe ca oración stinu modo racaláʼdxinu ne ora rábinu gúnibe ni. Peru nanna dxíchinu zudiibe laanu guiráʼ ni iquiiñenu ora gúʼyabe maʼ caquiiñepenu ni ne zuyúbibe modo jma galán gúnibe, cásica runi ti binni ni nabé nadxii ca xiiñiʼ (Lucas 11:11-13).

Zándaca qué zahuínnipeʼ ximodo cacábibe laanu.

Peru pa ni rápanu gana nga gacanebe laanu lu xiixa guendanagana yaʼ. Ñee purtiʼ si qué ñuni Dios ti milagru pur laanu nga, guiníʼ íquenu qué nicábibe oración stinu la? Coʼ, lugar de guiníʼ íquenu zacá, jma galán guidúʼyanu pa maʼ bicábibe oración stinu ne qué nihuínnipeʼ ximodo bíʼnibe ni. Zándaca tobi de ca xhamígunu gucané laanu órapeʼ caquiiñenu ni (Proverbios 17:17). Ñee cadi Jiobá bicaa laabe gacanebe laanu la? Laaca zanda iquiiñebe Biblia para guicábibe ca oración stinu. Zándaca gucané ni bidúʼndanu ca laanu para gánnanu xi gúninu lu xiixa guendanagana ni nápanu (2 Timoteo 3:16, 17).

Lugar de guni chaahuiʼ Dios guiráʼ guendanagana stiʼ ca xpinni, rudiibe laacaʼ stipa para ganda gudxiilucaʼ ni (2 Corintios 4:7). Ti biaje gunabaʼ Jesús laabe gacanebe laa lu ti guendanagana nabé naxoo ra cadiʼdiʼ, purtiʼ cadxibi pa qué ganda gusisaca laabe. Bicabi Jiobá laabe ne biseendaʼ ti ángel para gacané laabe (Lucas 22:42, 43). Zacaca nga zanda gacané Dios laanu, zanda iquiiñebe tobi de ca xhamígunu para uguu gana laanu órapeʼ caquiiñenu ni (Proverbios 12:25). Zándaca qué zahuínnipeʼ modo guicabi Jiobá laanu, nga runi caquiiñeʼ gatananu para guidúʼyanu ni.

Nuu biaje naquiiñeʼ cuézanu hora naguíxhebe guicábibe laanu.

Biblia cayabi laanu ricabi Dios ni jma nandxóʼ oración stiʼ ca binni ni qué rudxiibaʼ laca laa, ne rúnibe ni órapeʼ caquiiñeʼ cani (1 Pedro 5:6). Ngue runi, pa guidúʼyanu casi ora candaabe para guicábibe laanu la? cadi naquiiñeʼ guiníʼ íquenu qué rizaaláʼdxibe laanu. Ni naquiiñeʼ guiníʼ íquenu nga neca nácabe ti Dios nabé risaca ne neca nánnabe xii nga ni jma galán para laanu, nánnabe pa dxandíʼ caquiiñenu cada tobi de ca cosa ni rinábanu laabe.

Bixuiʼlú napuʼ ti xiiñiluʼ nahuiiniʼ ruʼ ne canábabe lii siluʼ ti bicicleta stibe. Ñee oraqueca niziʼluʼ ni pa ñuuyaluʼ nahuiinirube para gusabe ni la? zándaca qué zaziʼluʼ ni oraqueca. Zabézaluʼ ti tiempu, dede ora maʼ gúʼyaluʼ maʼ qué zuninani laabe. Zacaca nga laanu, pa galán cani nuu ndaaniʼ ladxidoʼno ne qué gusaananu de guni orarnu la? zudii Dios laanu ni canábanu laa ne órapeʼ caquiiñenu ni (Salmo 37:4).

Biblia riguu gana ca xpinni Dios cadi gusaanacaʼ de guni orarcaʼ. Zándaca chuʼ tu guiníʼ: «Nagueenda para guininu ni peru nagana para gúninu ni». Dxandíʼ, zándaca gaca nagana para laanu cuézanu guicabi Dios ca oración stinu, jmaruʼ si pa maʼ xadxí nápanu ti guendanagana naxoo o  cayúnicabe laanu xiixa ni cadi jneza. Peru neca zacá, cadi naquiiñeʼ guiaandaʼ laanu ni guníʼ Jesús de cadi guireʼnu gana ora guni orarnu Dios.

Jesús biquiiñeʼ ejemplu stiʼ ti viuda pobre ni qué nusaana de ninabaʼ ti juez ni qué runi jneza ñacané laa (Lucas 18:1-3). Neca primeru ga qué niná juez que ñacané laabe, despué guníʼ ique: «Chi acaniá laa, ti ma cadi gueeda uchiichi ru naa» (Lucas 18:4, 5). Diidxaʼ «uchiichi» ca, lu diidxaʼ griegu guníʼcabe ni «cúʼcabe golpe xalaga tuuxa» ne ni riniʼni nga «guiníʼcabe cadi jneza cayúnibe nezalú stobi». * Pa ti juez ni qué runi ni jneza guná gacané ti viuda pobre para cadi guiníʼ binni mal de laa, jmaruʼ si zanda chuʼnu seguru zacané Dios stinu guiráʼ «ni cucaa ridxi laa ridxí ne huaxhiini» purtiʼ nadxiibe laacaʼ. Casi guníʼ Jesús: «Nagueenda zacané be laacaʼ» (Lucas 18:6-8).

Neca chuʼ biaje guidxáganu de guinábanu Dios gacané laanu, peru cadi naquiiñeʼ guireʼnu gana. Pa gúninu zacá, zusihuínninu dxandíʼ racaláʼdxinu guicábibe laanu. Laaca zazíʼdinu gudiʼnu cuenta ximodo ricábibe laanu ne zuni sentirnu nuunu gaxha de laabe. Nga runi, pa guni orarnu Jiobá casi riuulaʼdxiʼ ne gusihuínninu nápanu fe la? zanda guni crenu zacábibe laanu (Lucas 11:9).