Ndiʼ nga tobi de ca versículo stiʼ Biblia ni nabé runibiaʼ ne ruzeeteʼ binni. Stale tu riníʼ gástiruʼ sti textu ni rusihuinni pabiáʼ nadxii Dios binni Guidxilayú, ne ximodo zanda guilá binni. Nga runi, cadi guendaridxagayaa diʼ nga guidúʼyanu ndaaniʼ caadxi guidxi gúnicabe pancarta ne chinécabe cani lugar ra nuu stale binni, rugaandacabe letreru ndaaniʼ xcárrucabe o rutieecabe grafiti ra riquiiñecabe versículo riʼ.

Ca binni runi sicaríʼ runi crecaʼ nadxii Dios laacaʼ ne zudiibe laacaʼ ti guendanabani ni qué zaluxe. Yanna lii yaʼ. Ñee huayuni Dios xiixa para gusihuinni nadxii lii la?

Stale tu runi cré Dios nga bizáʼ guibáʼ, ca cosa ni nuu lu Guidxilayú ne guiráʼ binni nuu ndaaniʼ ni. Guiráʼ cosa nabani nuu lu Guidxilayú nagana para guiénenu modo rúnicani dxiiñaʼ ne galán modo guyáʼ cani, rihuinni dxíchica tuuxa ni guizáʼ nuu xpiaaniʼ nga bizáʼ cani. Nga runi, stale binni rudiicaʼ xquíxepeʼ Dios purtiʼ cudiibe laacaʼ guendanabani. Laaca nánnacaʼ caquiiñecaʼ Dios para guibánicaʼ ne chuʼcaʼ nayecheʼ, purtiʼ laabe nga cudiibe laacaʼ bi ni ricaacaʼ, nisa reʼcaʼ, ni gocaʼ ne laaca racanebe guni Guidxilayú riʼ dxiiñaʼ para ganda guibánicaʼ ndaaniʼ ni.

Galán gúninu gudiʼnu xquíxepeʼ Dios pur guiráʼ ni rudii laanu; laabe nga bizaʼbe laanu ne cudiibe laanu guendanabani (Salmo 104:10-28; 145:15, 16; Hechos 4:24). Zacá nga rusihuínnibe pabiaʼ nadxiibe laanu. Zacapeʼ bizeeteʼ apóstol Pablu ni: «Rudii [Dios] laanu enda nabani ne irá ni  caquiʼñe nu. Laabe bizáʼ be laanu ne pur laabe nabani nu ne rizá nu» (Hechos 17:25, 28).

Pur cani maʼ bizéʼtenu ca, ridúʼyanu cadi pur modo rapa si Dios laanu nga rusihuinni nadxii laanu. Ne cumu laasinu nga riale de ndaaniʼ ladxidoʼno chuʼnu gaxha de laabe ne guyanu para ganda gúninu ni la? nga rusihuinni gadxepeʼ modo bizaʼbe laanu de xcaadxi cosa ni nuu (Mateo 5:3). Pur modo bizaʼbe laanu zanda gueeda gácanu binnilídxibe. Ngue runi, zanda gueeda gácanu xiiñibe pa guzúʼbanu stiidxabe (Romanos 8:19-21).

Casi ná Juan 3:16, bisihuinni Dios nadxii laanu ra biseendaʼ Xiiñiʼ, Jesús, lu Guidxilayú. Laabe beedabe para gusiidibe laanu de Bixhózebe ne laca laa nga Dios stibe ne laaca beeda gátibe pur laanu. Peru stale binni qué riénecaʼ xiñee gupa xidé guti Jesús ne ximodo nga bisihuinni Dios nadxii binni ora bidii lugar gátibe. Guidúʼyanu xi cusiene Biblia de laani.

Neca guiranu raca huaranu, rióxonu ne rátinu, cadi nga diʼ nga ni gucalaʼdxiʼ Dios para laanu. Laabe bizaʼbe Adán ne Eva para cadi ñáticaʼ ne nibánicaʼ ndaaniʼ ti paraísu lu Guidxilayú. Peru laaca gunábabe laacaʼ gúnicaʼ ti cosa: guzuubacaʼ stiidxabe purtiʼ pa qué gúnicaʼ ni záticaʼ (Génesis 2:17). Adán, primé hombre ni bizáʼ Dios qué nuzuubaʼ stiidxabe ngue runi guti ne zaqueca guiráʼ binni ni zá de laa. Apóstol Pablu bisiene ni sicaríʼ: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12).

Peru Dios riuulaʼdxiʼ guni ni jneza (Salmo 37:28). Nga runi, biʼniʼ castigarbe Adán ne Eva purtiʼ qué ninacaʼ nuzuubacaʼ stiidxabe neca nánnacaʼ záticaʼ pa qué gúnicaʼ ni, peru qué ninádibe ñapa binni stale yuubaʼ biaʼ dxi guibánicaʼ ne ñáticaʼ pur donda stiʼ tobi hombre. Peru ra biʼniʼ Dios ni zeeda lu Ley ra na gudii binni ti guendanabani pur sti guendanabani la? bisihuínnibe rúnibe ni jneza ne zaqué nga maʼ zanda guibani binni sti biaje sin qué chuʼ dxi gatiʼ (Éxodo 21:23). Yanna, ximodo zanda guibiguetaʼ guendanabani sin donda ni biniti Adán que yaʼ. Caquiiñeʼ gudii tuuxa ti guendanabani cásica ni biniti Adán que: ti guendanabani sin donda.

Rihuinni dxíchica nin tobi de cani zá de Adán qué zanda gudii ti guendanabani zacá, peru Jesús zanda (Salmo 49:6-9). Laabe gúlebe sin donda cásica Adán. Ngue runi, ora bidiibe xquendanabánibe que, gunda bilabe binni de lu naʼ guendaruchee ne zaqué nga zanda gapa cani zá de Adán ne Eva ti guendanabani casi gúpacaʼ (Romanos 3:23, 24; 6:23). Ñee caquiiñeʼ gúninu xiixa para guibáninu sin qué chuʼ dxi gátinu pur bisihuinni Dios nadxii laanu la?

Juan 3:16 cusiéneruʼ: «Ti irá tu guni cre Xiiñi be [Jesús] la? cadi initilú sínuque gapa enda nabani ni qué zaluxe». Textu riʼ na pa racaláʼdxinu guibáninu sin qué chuʼ dxi gátinu la? naquiiñeʼ gúninu xiixa: guni crenu Jesús ne guzúʼbanu stiidxaʼ.

Peru zándaca chuʼ tu guiníʼ: «Versículo riʼ cadi caníʼ naquiiñeʼ guzuubaʼ binni diidxaʼ. Jesús guníʼ guiráʼ tu guni cré laa zapa ti guendanabani ni qué zaluxe». Dxandíʼ, naquiiñeʼ guni cré binni, peru cadi nga si nga laani. Diccionario expositivo de palabras del Antiguo y del Nuevo Testamento exhaustivo, de W. E. Vine, na diidxaʼ ni biquiiñeʼ Juan lu versículo riʼ riníʼ ni «cadi guni cré si binni xiixa», sínuque «gacané» tuuxa laa o chuʼ xiixa ni gacané laa, nga nga riníʼ gapa binni fe. Racá ridúʼyanu gapa binni fe la? qué riníʼ diʼ ni guni cré si binni Jesús ne guʼyaʼ laabe casi tuuxa ni rulá. Laaca naquiiñeʼ gudiʼnu lugar gacanebe laanu ne gúninu stipa pur gúninu cani bisiidibe; zacatiʼ nga ziuulaʼdxiʼ Dios ni gúninu. Pa qué gúninu ni la? pur gana si guininu nápanu fe. Ne ngapeʼ nga ni riníʼ Biblia: «Qué iquiiñe modo runi cre nu pa qué guni nu jneza» (Santiago 2:26). Fe ni nápanu Jesús naquiiñeʼ gucaani laanu chinándanu ca conseju zeeda lu Biblia.

Sicaríʼ cusiene Pablu ni: «Ma biene du tobi si guti pur iráʼ [...]. Nga runi, intiica guni du, runi du ni purti nadxii du Cristu. Cristu guti pur irá nu ti biaʼ dxi ibani nu ma cadi ibani nu para laanu sínuque para laabe. Laabe nga guti be ne bibani be para laanu» (2 Corintios 5:14, 15). Pa dxandíʼ rudiʼnu xquíxepeʼ pur guti Jesús pur laanu la? zuchaʼnu modo nabáninu; qué zuyúbinu ni riuuláʼdxisinu ne zabáninu para Jesús, ni bidii xquendanabani pur laanu. Nga runi zanda guininu, ni jma risaca nga, gúninu cani bisiidiʼ Jesús. Ne modo zusihuínninu maʼ bichaʼnu nga pur ca cosa ni jma gusisácanu lu xquendanabáninu, cani quixhe íquenu ne cani gúninu. Xi zabeendunu pa gápanu fe Jesús yaʼ.

Ra maʼ ziluxe Juan 3:16 zeeda ni bidii stiidxaʼ Dios guni: ca binni ni gapa fe lu guendaguti stiʼ Jesús ne gúnicaʼ cani bisiidibe qué záticaʼ, sínuque zápacaʼ ti guendanabani ni qué zaluxe. Peru cadi guiráʼ diʼ binni ni nadxii Dios nga zabánicaʼ sin qué chuʼ dxi gáticaʼ ti lugar si.

Ti grupu de binni zabánicaʼ guibáʼ. Ximodo nánnanu ni yaʼ. Purtiʼ Jesús gudxi ca discípulo stiʼ cheʼ guibáʼ para guni chaahuiʼ ti lugar ra guni mandarné laacabe (Juan 14:2, 3; Filipenses 3:20, 21). Cani guiasa de lade gueʼtuʼ para checaʼ guibáʼ «zaca cabe sacerdote para guni cabe xhiiña Dios ne xhiiña Cristu, ne zuni mandar né cabe laa ti mil iza» (Apocalipsis 20:6).

Maca nexheʼ panda xpinni Cristu nga cheʼ guibáʼ. Ne Jesús guníʼ ca diidxaʼ riʼ: «Cadi guidxíbitu, grupuhuiiniʼ de dendxuʼ, purtiʼ Bixhózetu na gudii laatu reinu stiʼ» (Lucas 12:32, TNM). Panda binni nga nuu lu «grupuhuiiniʼ de dendxuʼ» ca yaʼ. Apocalipsis 14:1, 4 na: «Oraque biya dxie ne biiya zuhuaa Dendxu huiini que lu dani Sion. Zuhuaa né ti gayuaa cuarenta y cuatro mil binni laabe, ni cá lá be ne lá Bixhoze be lucuá [...]. Bilá cabe lade irá binni, casi ñaca nirudóʼ laacabe guʼde cabe Dios ne Dendxu huiini que». Pa guchaaganu 144,000 binni ni cheʼ guibáʼ ca né guiráʼ mil millón de binni ni huabani lu Guidxilayú riʼ la? rudiʼnu cuenta nácacabe ti «grupuhuiiniʼ de dendxuʼ» si. Lu versículo riʼ na zácacabe rey. Peru, tuu nga ca binni chiguni mandárcabe yaʼ.

Laaca guníʼ Jesús de sti grupu ni zacaa ndaayaʼ dxi maʼ guni mandarbe lu Reinu stiʼ Dios ni nuu guibáʼ: «Laca napa ruaʼ xcaadxi dendxu ni cadi nuu ndaani currá riʼ. Naquiiñe chi caa laacame. Zucaa diaga came stidxeʼ ne zaca came tobi si ne zapa came tobi si pastor» (Juan 10:16). Cani zeeda gaca «dendxu» riʼ cabézacaʼ guibánicaʼ sin qué chuʼ dxi gáticaʼ lu Guidxilayú, cásica ñanda nibani Adán ne Eva. Ximodo nánnanu ni yaʼ.

 Stale biaje ruzeeteʼ Biblia zaca Guidxilayú riʼ ti paraísu. Pa rápaluʼ gana guʼyuʼ pa dxandíʼ ni la? bixheleʼ Biblia stiluʼ ne biindaʼ ca textu riʼ: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29 ne Apocalipsis 21:4. Ca versículo riʼ cuzeetecaʼ zadxiña dxi maʼ qué ziuu guerra, guendarindaana, guendahuará ne guendaguti. Laaca ruzeeteʼ cani zedandá dxi zucuí binni lidxi, zandísacaʼ cosecha lu layú sticaʼ ne zusiniisicaʼ xiiñicaʼ lu ti Guidxilayú ra guirutiʼ tu zadinde. * Ñuulaʼdxiluʼ nibániluʼ ti lugar zacá la? Nápanu stale razón para guni crenu dxandíʼ zacá guiráʼ ni maʼ bizéʼtenu ca.

Yanna, ra maʼ bidúʼndanu guiráʼ ni cusiene textu riʼ, cadi dxandíʼ maʼ bidiʼnu cuenta stale nga ni maʼ biʼniʼ Dios pur cada tobi de laanu la? Laabe maʼ bidiibe laanu guendanabani, guendabiaaniʼ, guendanazaaca ne guiráʼ ni caquiiñenu para guibáninu. Peru ni jma risaca nga biseendabe Xiiñibe beeda gati pur laanu ti ganda guicaanu xcaadxi ndaayaʼ jma naroʼbaʼ casi bizíʼdinu lu Juan 3:16.

Guizáʼ nayecheʼ ziuʼnu dxi guibáninu sin qué chuʼ dxi gátinu ndaaniʼ ti Guidxilayú galán ra guirutiʼ zadinde, ra maʼ qué ziuu guendahuará, guerra, guendarindaana ne guendaguti. Cada tobi de laanu naquiiñeʼ guʼyaʼ pa racalaʼdxiʼ guicaa ca ndaayaʼ riʼ. Yanna, ni naquiiñeʼ guinabadiidxanu laaca laanu nga: xi cayúninu pur Dios yaʼ.