Ora guyadxinu guiráʼ ladu racané lunu laanu guiaana guiráʼ ni cadúʼyanu ndaaniʼ cerebru stinu. Casi pa guidúʼyanu ti cuananaxhi, color stini zucaa laanu guidúʼyanu pa zadoʼno ni o pa coʼ. Ne ora guyadxinu guibáʼ rudiʼnu cuenta qué ziaba diʼ nisaguié. Ne ra cayuuyaluʼ ca diidxaʼ riʼ riéneluʼ xiná cani. Sin gannuʼ cayacané ca color ca lii. Ximodo yaʼ.

Color stiʼ ti cuananaxhi racané laanu gánnanu pa maʼ güini ne guidúʼyanu pa guidoʼno ni. Color stiʼ ca za ca racané laanu gánnanu pa ziaba nisaguié. Pur color stiʼ yaza riʼ ne color stiʼ ni cá luni zanda gúʼndaluʼ ca letra zeeda lu tema riʼ. Nga rusihuinni sin gudiʼnu cuenta nabé riquiiñenu ca color ca para gánnanu xi cadúʼyanu. Peru ca color ca laaca rucaacani laanu guni sentirnu gadxé gadxé cosa.

Ora cheluʼ luguiaa ruuyaluʼ guiráʼ ni cutoocabe raqué ne nuu cani ndaaniʼ bolsa o caja ni bizáʼcabe párapeʼ uquiinde lii guyadxiluʼ cani. Ora runi binni anunciu para gutoo xiixa ribicaʼ color ni zucaa binni chuulaʼdxiʼ cani, casi pa para hombre o pa para gunaa cani, para nahuiiniʼ o para ni huaniisi. Cani runi chaahuiʼ ti yoo, cani runi lari ne cani rutiee cuadru riquiiñecabe ca color ni chuulaʼdxiʼ binni.

Cumu de gadxé gadxé guidxi laanu ne gadxé costumbre nápanu la? gadxé ni riníʼ ca color ca para laanu. Casi nuu binni de Asia riquiiñecaʼ color naxiñáʼ ca para suerte ne riquiiñecabe ni para saa, peru nuu lugar neza África riquiiñecabe ni ora nuu binni lutu. Peru nuu caadxi color ngueca ni rucaa cani binni guni sentir neca de gadxé gadxé lugar laacaʼ. Guidúʼyanu chonna ejemplu.

NAXIÑÁʼ. Ti color nabé rihuinni. Ne riquiiñeʼ binni ni para guchaaga ni né stipa, guerra ne ora nuu binni ra naxoo. Rucaani binni guni xiixa sin gaxha ique, rucaani xcuérpunu guni dxiiñaʼ jma nagueenda, guicaa bi jma nagueenda ne quibaʼ presión stiʼ.

Lu Biblia, diidxaʼ hebreu ni biquiiñecabe para color «naxiñáʼ» riniʼni «rini». Ne ora ruzeeteʼ Biblia de ti gunaa rizá zacasi ne ruuti binni la? rieeteʼ nácube lari naxiñáʼ ne muradu, o ti naxiñáʼ ni ruzaaniʼ ne rieeteʼ dxíʼbabe «ti mani ngola xiñáʼ. Cá jma diidxa ladi mani que ni riguu dí Dios» (Apocalipsis 17:1-6).

VERDE. Maʼ gadxé ni rucaani binni guni sentir, purtiʼ rucaani xcuérpunu guni dxiiñaʼ jma nanene ne guni sentir galán. Ne color ca riguixhedxini ladxidóʼ binni. Ñee cadi zacá runi sentirluʼ ora gúʼyaluʼ ti jardín ra nuu stale yaga gáʼ ne ora gúʼyaluʼ verde verde nuu ca dani ca la? Lu libru stiʼ Génesis na bizáʼ Dios guixi gáʼ para chuulaʼdxiʼ binni guidxilayú ni (Génesis 1:11, 12, 30).

NAQUICHIʼ. Nabé ruchaagacabe ni né biaaniʼ, guendanayá, ne riquiiñecabe ni ora cadi cadxibi ladxidóʼ binni. Laaca riquiiñeʼ ni para guiníʼcabe nachaʼhuiʼ binni, qué runi cosa malu, ne nayá ladxidóʼ. Laani nga color ni jma rieeteʼ lu Biblia. Ca hombre ne ca ángel ni rihuinni lu caadxi visión nácucaʼ lari quichiʼ  para guihuinni rúnicaʼ ni jneza ne nayá nuucaʼ nezalú Dios (Juan 20:12; Apocalipsis 3:4; 7:9, 13, 14). Ca maniʼ quichiʼ ne cani dxiʼbaʼ laacame nácucaʼ lari chaʼhuiʼ, naquichibé ne nayaguieʼ, purtiʼ nga riníʼ zaca ni jneza ora gaca guendaridinde ni rieeteʼ lu Biblia (Apocalipsis 19:14). Dios riquiiñeʼ color naquichiʼ para guluíʼ laanu racalaʼdxiʼ gutiidilaʼdxiʼ stóndanu, nga runi cayábibe laanu: «Neca nabé naxiñáʼ rini ca donda stitu, zaca cani naquichibé casi nieve» (Isaías 1:18).

Ora riquiiñeʼ Biblia ca color ca rusihuínnini nanna dxichi Dios xi rucaacani binni guni sentir. Casi lu libru stiʼ Apocalipsis rieeteʼ ti visión ni cusihuinni xi zazaaca ca dxi nabáninu yanna: ziuu guerra, guendarindaana ne zati binni pur guendahuará ne pur gastiʼ ni gó. Para ganda guietenaláʼdxinu cani la? lu visión que bihuinni caadxi hombre ni dxíʼbacaʼ caadxi maniʼ ne gadxé gadxé color laacame.

Primé rieeteʼ ti maniʼ naquichibé, nga riníʼ dxi tinde Cristu Jesús zuni ni jneza. De racá zeeda ti maniʼ xiñáʼ, nga rusihuinni zadinde ca guidxi ca. Despué bihuinni ti maniʼ yaaseʼ ne nga riníʼ zandaana binni. Despué de laame za «ti mani guchi, dxiʼba tobi laame lá “enda guti”» (Apocalipsis 6:1-8). Gadxé gadxé nga ni rucaa ca color stiʼ ca maniʼ ca laanu guni sentirnu. Ne qué zaca nagana para laanu guietenaláʼdxinu xi color ca maniʼ ca ne xi riníʼ cada tobi de laacame.

Lu Biblia zeeda stale ejemplu ra rieeteʼ caadxi color para gacané laanu guxuíʼlunu ni cayeeteʼ luni. Dios ni bizáʼ biaaniʼ ne ni bizáʼ bizalú binni riquiiñebe ca color ca ti ganda guiénenu cani gusiidibe laanu ne guietenaláʼdxinu cani. Laaca racané ca color ca guizíʼdinu stale cosa, guni sentirnu xiixa ne guietenaláʼdxinu cani jma risaca. Ca color ca zeeda gaca cani xiixa ni bisigaʼdeʼ Dios laanu para guibáninu jma nayecheʼ.