Rucaadiaga Dios oración ni runi binni de guiráʼ guidxi (Salmo 145:18, 19). Biblia cayabi laanu zanda gábinu laabe intiica naguu xizaa laanu (Filipenses 4:6, 7). Peru nuu oración ni qué riuuláʼdxibe gucaadiágabe, casi ni rúnicabe de memoria. (Biindaʼ Mateo 6:7.)

Laaca qué rucaadiaga Dios oración stiʼ cani qué riná guni ni na ca ley stibe (Proverbios 28:9). Casi dxiqué la? qué ninabe nucaadiágabe oración stiʼ ca israelita ni guuti tuuxa. Casi maʼ bidúʼyanu ca, para ganda gucaadiaga Dios ca oración stinu la? naquiiñeʼ gúninu caadxi cosa ni rinábabe laanu. (Biindaʼ Isaías 1:15.)

Qué zanda diʼ gucaadiaga Dios ca oración stinu pa qué gápanu fe (Santiago 1:5, 6). Naquiiñeʼ guni crenu dxandíʼ nuube ne rizaaláʼdxibe laanu. Ne para ganda gaca nga la? naquiiñeʼ guidúʼndanu Biblia, purtiʼ ndaaniʼ ni zadxélanu stale cosa ni zanda gacané laanu gápanu fe. (Biindaʼ Hebreos 11:1, 6.)

Jesús qué nudxiibaʼ diʼ laa ora biʼniʼ orar, ngaca nga laanu, cadi naquiiñeʼ gudxíʼbanu laanu ora guni orarnu ne gúninu ni de guidubi ladxidoʼno (Lucas 22:41, 42). Ne lugar de gábinu Dios xi guni la? laanu nga naquiiñeʼ gúninu stipa pur guiénenu xi pur canábabe laanu gúninu xiixa. Ximodo yaʼ. Guidúʼndanu Biblia. Pa gúninu nga la? ziuulaʼdxiʼ Dios ca oración ni gúninu. (Biindaʼ 1 Juan 5:14.)