Estelle * nga ti gunaa ni nabé riné ca xiiñiʼ ra yuʼduʼ. Ti dxi gúdxibe pastor stibe racaláʼdxibe guiénebe xi rusiidiʼ Biblia. Cumu qué liica nizaalaʼdxiʼ pastor que nusiidiʼ laabe la? maʼ qué ñérube ra yuʼduʼ que. Estelle guníʼ: «Bicaa ca xaíque yuʼduʼ ti carta ra nuaaʼ ne gúdxicaʼ naa: “Pa maʼ qué zanda cheuʼ ra yuʼduʼ la? cadi guizaalaʼdxuʼ, peru rinábadu lii cadi gusaana de guseenduʼ bueltu”. Óraque bidieeʼ cuenta jma rizaaláʼdxicabe xpuéltuaʼ que gusiidicabe naa de Dios».

Angelina, ti gunaa ni nabé rié yuʼduʼ, guníʼ sicaríʼ: «Ora maʼ cusiidicabe ndaaniʼ yuʼduʼ ra riaaʼ, chonna biaje rutiidicabe ti xiga ne ribézacabe gusábadu bueltu ndaaniʼ ni cada biaje tiidiʼ ni. Puru maʼ canábacabe bueltu. Ngue runi guníʼ iqueʼ: “Qué gapa ca binni riʼ espíritu stiʼ Dios”».

Laga ca religión ni runibiaʼluʼ yaʼ. Ñee rucaacabe binni gudii laacabe bueltu la? o riguítecabe laacaʼ para gudiicaʼ ni. Ñee zacá nga na Biblia naquiiñeʼ gudii binni bueltu la?

Jesús, hombre ni gudixhestí religión stiʼ cani dxandíʼ naca xpinni Cristu, guníʼ sicaríʼ: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mateo 10:8). Cadi naquiiñeʼ diʼ quixe binni para gusiidicabe laa ca diidxaʼ risaca zeeda lu Biblia, purtiʼ guiráʼ xixé binni naquiiñeʼ guiziidiʼ de laacani.

Ximodo gudixe ca xpinni Cristu ni guyuu lu primé siglu que ca gastu ni guca ndaaniʼ neza binni ridagulisaa sticaʼ.

Cada tobi de laacabe bidii «biaʼ ruluiʼlaʼdxiʼ, ne [qué ñacaná] ladxidóʼ ti ma bidii ni, [laaca qué nudii] ni purti canaba cabe ni laa, purti nadxii Dios ni rudii ni laa de idubi ladxidóʼ» (2 Corintios 9:7). Apóstol Pablu biʼniʼ yoo de lari, ngue nga dxiiñaʼ bíʼnibe para gúpabe ni iquiiñebe dxi bicheechebe diidxaʼ (Hechos 18:2, 3). Laapebe guniʼbe: «Bini du dxiiña ridxí ne huaxhinni para gupa du ni udidi né du dxi laga cayuí né du laatu stiidxa Cristu, ti cadi gua nin tobi tu laadu» (1 Tesalonicenses 2:9).

Ca lugar ra ridagulisaa ca testigu stiʼ Jiobá lácani Yoo stiʼ Reinu ne qué gápacani stale luju. Yanna, ximodo riaxa ca gastu stícani yaʼ. Ca Testigu qué rutiidicaʼ ti xiga para gusaba binni bueltu ndaaniʼ ne laaca qué ruseendacaʼ guiʼchiʼ ra nuu binni para guinábacaʼ bueltu. Lugar de nga, guiráʼ binni ni rusisaca cani riziidiʼ de Dios, rusábacaʼ bueltu ndaaniʼ ti caja huiiniʼ ni nuu ndaaniʼ Yoo stiʼ Reinu, ne guirutiʼ ranna pabiáʼ rusábacaʼ.

Dxandíʼ riquiiñeʼ bueltu para ganda gaca imprimir revista riʼ ne para guiaaziʼ ni. Peru qué ziuu dxi gúʼyaluʼ xiixa anunciu luni ra canábacabe bueltu binni. Ni rieeteʼ si luni nga cani zeeda lu Biblia.

Yanna, ximodo ruuyuʼ. Ñee zinanda ca testigu stiʼ Jiobá ni guníʼ Jesús ne modo biʼniʼ ca primé xpínnibe que la?