GUNÍʼ ique málasi ñuni ti xhamíguluʼ ni nabé rusisácaluʼ xiixa ni cadi cayéneluʼ. Nuu binni na xiñee bíʼnibe ni ne nuu tu na bíʼnibe ni purtiʼ nabé malu laabe. Ñee ñuni creluʼ laacabe oraqueca la? o nibézaluʼ nusiene xhamíguluʼ lii xi guca. Peru pa qué guínnibe yaʼ. Ñee nibézaluʼ laabe ne niniʼluʼ zándaca nuu xi pur bíʼnibe ni la?

Ante niniʼluʼ pa nápacabe razón o pa coʼ la? galán ninabadiidxaluʼ laca lii: «Pabiaʼtiʼ runebiaʼyaʼ xhamiguaʼ riʼ pue. Xiñee risácabe para naa pue». Cadi dxandíʼ nga nga ni jma jneza ñuʼnuʼ la? Ñee cadi zacaca nga naquiiñeʼ gúninu ora guidúʼyanu pa dxandíʼ malu Dios la?

Zándaca raca nagana para lii guiéneluʼ xiñee biʼniʼ Dios xiixa cosa o guiéneluʼ xiñee rudiibe lugar gaca cani. Stale binni zabi lii malu laabe ne cumu nabé raninácabe laabe ora guiníʼcabe cadi jneza guiráʼ ni rúnibe la? zucaacabe lii guiníʼ íqueluʼ casi riníʼ íquecabe. Ñee zabézaluʼ ganna chaahuiluʼ pa dxandíʼ ni caníʼcabe de Dios ne zaniʼluʼ zándaca nuu xi pur bíʼnibe ni la? Modo guicábiluʼ ni gunabadiidxanu ca zusihuínnini pa dxandíʼ runibiaʼluʼ Dios o pa coʼ. Gunabadiidxaʼ laca lii: «Xi guiráʼ cosa galán maʼ biʼniʼ Dios pur naa».

Pa huayápaluʼ guendanagana lu xquendanabániluʼ, zándaca zaniʼluʼ qué huayaca xhamíguluʼ Dios. Peru guníʼ ique ndiʼ: ñee Dios napa donda pur ca guendanagana ni huayápaluʼ la? o laabe racanebe lii gudxiiluluʼ cani. Casi maʼ bidúʼyanu ca, cadi Jiobá diʼ nga runi mandar guidxilayú riʼ, sínuque Binidxabaʼ (Juan 12:31). Nga runi, laabe nga nápabe donda pur guiráʼ ni cayuniná binni guidxilayú. Ne laanu nánnanu stale de ca guendanagana rápanu raca cani purtiʼ nácanu binni ruchee ne purtiʼ málasi rizaaca xiixa cosa lu xquendanabáninu.

Yanna, xi huayuni Dios pur laanu yaʼ. Biblia na laabe nga bizaʼbe guibáʼ ne Guidxilayú; lade guiráʼ ni bíʼnibe ca laaca bizaʼbe cuerpu stinu, ne nabé sicarú modo bíʼnibe ni. Laaca rusiéneni laanu lu nabe nga nuu xquendanabáninu ne bi ni ricaanu (Salmo 124:8; 139:14; Daniel 5:23). Xi rusiidiʼ ca nga laanu yaʼ.

Rusiidiʼ cani laanu nuzáʼbinu Dios xquendanabáninu (Hechos 17:28). Ne Dios bisigaʼdeʼ laanu Guidxilayú sicarú ra nabézanu riʼ, laaca bizaʼbe laanu para gannaxhiinu, gápanu xhamígunu, guidoʼno nanixe, ganda cánanu o guni sentirnu xiixa, gunadiáganu ne chuʼ xiinu (Santiago 1:17). Cadi dxandíʼ rusihuinni ca ndaayaʼ ca zanda gácabe ti xhamígunu ni gannaxhiinu ne guni crenu zanda gacané laanu la?

Neca maʼ bizéʼtenu guiráʼ nga, peru zándaca gaca nagana para lii guni creluʼ zacané Dios lii. Zándaca guiníʼ íqueluʼ caʼruʼ gunibiáʼ chaahuiluʼ laabe, ne napuʼ razón. Lu ca tema huiiniʼ riʼ, qué zanda diʼ gusiénedu guiráʼ ni rucaa binni guiníʼ malu Dios. Peru ñee cadi raʼbuʼ jma galán gúniluʼ stipa pur gunibiáʼ chaahuiluʼ Dios la? * Nannadxíchidu pa gúniluʼ ni, zánnaluʼ xipeʼ nga ni dxandíʼ de laabe. Yanna, ñee malu Dios la? Coʼ, purtiʼ de laabe «reeda enda ranaxhii» (1 Juan 4:8).