MAʼ BIREE yati ladi Noé, gurígabe ti ratu lu ti muriu ne cusigaa déchebe laga cayuuyabe pabiáʼ naroʼbaʼ arca ni cayúnicabe que. Nabé nadipaʼ xhoʼ alquitrán ndaʼ cayuuxiibe ne cayunadiágabe caxidxi ca herramienta ni caquiiñecabe. De ra zuba Noé, cayuuyaʼ pabiáʼ nadipaʼ dxiiñaʼ cayuni binnilidxi ra cayaca arca que. Maʼ stale iza de cayacané ca xiiñibe, ca xuaalídxibe ne xheelabe ni nabé nadxiibe laabe para gaca arca que. Nabé maʼ bíʼnicabe dxiiñaʼ, peru stáleruʼ ni cayaadxaʼ gúnicabe para guiluxe arca que.

Ca binni que nacaʼ cayaca íquecabe. Ne dxi mayaca guilúxecabe arca que, jmaruʼ si ruxídxicaʼ ne riniʼcaʼ cadi dxandíʼ ziaba nisaguié naroʼbaʼ ni gunitilú guidxilayú, casi cayabi Noé laacabe. Qué ganda guni crécabe pa ziuu dxi guizaaca xiixa ni gunitilú guidubi naca guidxilayú. Cadi cayenedícabe xiñee cuniti si Noé ne binnilidxi xtiémpucaʼ lu ti dxiiñaʼ ni qué liica ziuu ra iquiiñeʼ. Peru cadi zacá diʼ biʼyaʼ Jiobá, Dios ni biʼniʼ adorar Noé, laa.

Biblia na: «Noé guzané Dios ni dxandíʼ» (Génesis 6:9). Xi riníʼ ca diidxaʼ ca yaʼ. Qué riníʼdicani biete Dios lu Guidxilayú riʼ ne ninca qué ñe diʼ Noé guibáʼ. Ni riníʼ ca diidxaʼ riʼ nga bizuubabe stiidxaʼ Dios cásipeʼ modo gudxi laabe ne guizáʼ gunnaxhiibe laa casi rannaxhii binni tuuxa ni jma xhamigu. Gudiʼdiʼ si mil de iza, sicaríʼ gucuá lu Biblia de Noé: «Pur modo bini cre be que bisihuinni be pabiáʼ cuchee binni guidxilayú» (Hebreos 11:7). Ximodo bíʼnibe ni yaʼ. Xi zanda guizíʼdinu de fe ni bisihuinni Noé.

Noé biniisi lade binni malu, ne laga zidiʼdiʼ dxi jma malu ziyaca ca binni que. Maca zacá binni dede dxi bibani Enoc, bixhoze bixhozebiidabe, sti hombre nachaʼhuiʼ ni guzané Dios, ne guníʼ maʼ gudixhe Dios ti dxi gunitilú guiráʼ binni malu. Peru dxi bibani Noé, gudiidisú ca binni que né guiráʼ guendaquéiquiiñeʼ ni bíʼnicaʼ. Ne Jiobá biiyaʼ guizáʼ maʼ bidale guendaridinde lu guidubi naca Guidxilayú (Génesis 5:22; 6:11; Judas 14, 15). Peru xiñee biʼniʼ ca binni que guiráʼ guendaquéiquiiñeʼ que yaʼ.

Bíʼnicabe ni pur ti cosa nabé feu ni bizaaca lade ca ángel stiʼ Dios. Tobi de laacaʼ maca bicheené Jiobá ra guníʼ mal de laabe ne ra bicaa Adán ne Eva gucheecaʼ, ne zacá beeda gácabe Binidxabaʼ. Ca dxi bibani Noé, guyuu xcaadxi ángel ni bidaaguʼ Binidxabaʼ para gudxiilucaʼ derechu ni napa Jiobá de guni mandar. Bisaanacaʼ puestu ni bidii Dios laacaʼ guibáʼ, beedacaʼ ndaaniʼ Guidxilayú casi binni ne bichaganacaʼ caadxi gunaa sicarú. Cumu nabé malu ca ángel riʼ, ruchacaʼ bi yánnicaʼ ne ruyúbicaʼ para laasicaʼ la? ca binni que laaca guca xpiaʼcaʼ casi xpiáʼcabe (Génesis 3:1-5; 6:1, 2; Judas 6, 7).

Ra bichaganáʼ ca ángel riʼ ca gunaa que la? gule caadxi binni guizáʼ nasoo ne nabé nadipaʼ. Biblia na biree lácabe nefilim, ni riníʼ «ni rusaba xcaadxi binni». Pur laacabe guizáʼ guyuu guendaquéiquiiñeʼ ndaaniʼ guidxilayú. Ngue runi, biiyaʼ Dios «bidale guendaquéiquiiñeʼ ni cayuni binni ndaaniʼ  guidxilayú riʼ, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora». Jiobá gudixhe gunitilú ca binni malu que ra guizaa ti gayuaa gande iza (Génesis 6:3-5).

Bichaganáʼ Noé ti gunaa nabé nachaʼhuiʼ, ne dxi maʼ nápabe jma de 500 iza gúpabe chonna xiiñibe: Sem, Cam ne Jafet. * ¡Nanna pabiáʼ nagana guca para laabe gusiniisibe ca xiiñibe lade ca binni qué iquiiñeʼ que yaʼ! Laabe ne xheelabe nabé gúpacabe laacaʼ para cadi guicá xpiaʼ ca binni malu que laacaʼ. Ca nefilim que nabé «nadipaʼ» gúcacaʼ ne «nabé binibiaʼ binni» laacaʼ, ne guiráʼ xcuidi nabé riuuláʼdxicaʼ binni zacá. Noé ne xheelaʼ qué ñanda ñúnicaʼ gastiʼ para cadi ñanna xiiñicaʼ guiráʼ guendaquéiquiiñeʼ ni canayuni ca gigante que, peru ni gunda bíʼnicabe nga bisiidicabe laacaʼ de Jiobá, Dios ni nanalaʼdxiʼ guiráʼ cosa malu. Gupa xidé gucanécabe laacaʼ guiénecaʼ riuubaʼ ladxidóʼ Jiobá guʼyaʼ tinde binni ne qué riuuláʼdxibe ora qué ruzuubaʼ binni diidxaʼ (Génesis 6:6).

Ca dxi stinu riʼ, ca binni ni napa xiiñiʼ zanda gúnicaʼ casi biʼniʼ Noé ne xheelaʼ. Yanna riʼ laaca nabé maʼ bidale guendaridinde ne binni ni qué ruzuubaʼ diidxaʼ. Ne dede lu cani rúnicabe para guʼyaʼ o para quiteʼ ca xcuidi ca nabé maʼ rihuinni ra cadíndecabe ne ra cayuni binni cosa malu. Peru binni ni rusiidiʼ xiiñiʼ jneza la? racané laacabe para cadi guicá xpiaʼ ca binni malu laacabe ne rusiidicaʼ laacabe de Jiobá, Dios de guendariuudxi, ni chindee guiráʼ guendaridinde nuu yanna (Salmo 11:5; 37:10, 11). Zanda gusiniisi binni xiiñiʼ jneza ndaaniʼ guidxilayú malu riʼ. Noé ne xheelaʼ gunda bíʼnicaʼ ni. Ca xiiñicabe gúcacaʼ binni nachaʼhuiʼ ne ca gunaa ni bichaganácabe laaca bizuubacaʼ stiidxaʼ Jiobá lu guiráʼ ni bíʼnicaʼ.

Málasi ti dxi bichaa xquendanabani Noé. Jiobá guniʼné laabe ne gudxi laabe maʼ gudixhe ique gunitilú ca binni malu ni nabani ca dxi que, ne gudxi laabe: «Bizáʼ ti arca para lii ne biquiiñeʼ yaga ni napa tini» (Génesis 6:14).

Nuu tu riníʼ ique ti barcu nga arca que, peru cadi zacá diʼ ni. Qué gapa ni proa, popa, quilla nin timón. Laani gúcani ti caja ngola. Jiobá gudxi Noé pabiaʼpeʼ naquiiñeʼ gaca arca que, ximodo gácani ne naquiiñeʼ xhúbibe alquitrán guidubi nácani, cásica dentru ne zaqueca fuera. Ne laaca gudxi laabe: «Chigusabaʼ ti nisaguié naroʼbaʼ lu guidxilayú [...]. Guiráʼ xixé ni nabani lu guidxilayú zati». Peru laaca gúdxibe Noé: «Napa xidé chuʼluʼ ndaaniʼ arca ca, lii ne ca xiiñiluʼ ne xheelaluʼ ne xheelaʼ ca xiiñiluʼ». Ne laaca naquiiñeʼ cuʼbe guiráʼ clase maniʼ ndaaniʼ arca que. Cani chuʼ si ndaaniʼ ni zalacaʼ ora guiaba nisaguié naroʼbaʼ que (Génesis 6:17-20).

Guizáʼ nadipaʼ dxiiñaʼ chiguni Noé. Nabé naroʼbaʼ chigaca arca que. Chigápani 133 metru de ziuulaʼ, 22 metru de xilaga ne 13 metru de nasoo. Jma naroʼbaʼ ni que ca barcu de yaga ni huayúnicabe yanna. Peru, ñee bidxii Noé dxiiñaʼ riʼ la? Ñee guniʼbe nagana para gúnibe ni la? Ñee bichaabe caadxi cosa para cadi gácapeʼ nagana para laabe  gúnibe ni la? Biblia na: «Noé bizulú biʼniʼ guiráʼ ni biʼniʼ mandar Dios laa guni. Bíʼnibe zaqué zaquepeʼ» (Génesis 6:22).

Gudiʼdiʼ stale iza para biluxe Noé arca que, zándaca cuarenta o cincuenta iza. Gupa xidé bisábabe stale yaga, guxubiyube cani ne bigabe cani para gúnibe cani muriu, tabla, ne xcaadxi cosa. Ne despué biquiidibe cani. Arca que naquiiñeʼ gácani de chonna pisu, gápani cuartu huiiniʼ ne ti puertaʼ. Ne zándaca ora quibaʼ ique ni la? naquiiñeʼ gaca xcaadxi nasoo galaa ni ti ganda guxooñeʼ nisa guiropaʼ ladu ne gápani ventana guidubi ruaani luguiáʼ (Génesis 6:14-16).

Ra zidiʼdiʼ iza maʼ zihuinni ximodo chiguiluxe arca que. ¡Nanna pabiáʼ nayecheʼ guyuu Noé pur gucané binnilidxi laa yaʼ! Peru bíʼnibe sti dxiiñaʼ jma nagana. Biblia na «gudxi [Noé] laaca nusaana ca irá enda ruchee sticaʼ» (2 Pedro 2:5). Nga rusihuinni gupa xidé gúcabe nadxibalú para gunda gúdxibe ca binni que zadxiña dxi zanitilucaʼ. Xi biʼniʼ ca binni que yaʼ. Jesucristu na «caʼru guiene ca xi chi gaca», purtiʼ jma nga bíʼnicabe ca cosa ni maca rúnicabe, casi gocaʼ, guecaʼ, guichaganacaʼ, ne qué nulábicaʼ Noé (Mateo 24:37-39). Nanna dxíchinu biʼniʼ búrlacabe laabe ne binnilídxibe, bicaalúcabe laabe ne zándaca dede gudíñecabe laabe.

Neca zacá, Noé ne binnilidxi qué ñuu dxi nireecaʼ gana. Biʼnirúcabe dxiiñaʼ para gunduuxecabe arca que, neca ca binni que nacaʼ cunitisícabe tiempu stícabe, ne ti guendahuati ngue ni cayúnicabe. Ca dxi stinu riʼ, ca familia ni naca xpinni Cristu zanda guiziidicaʼ stale de fe ni bisihuinni binnilidxi Noé. Ne Biblia na nabáninu ra «mayaca izaa xhi guidxilayú» (2 Timoteo 3:1). Jesús na zaca ca dxi nabáninu riʼ cásica tiempu bizáʼ Noé arca que. Pa binni qué riná gucaadiaga ca xpinni Cristu ora maʼ canagucheechecaʼ stiidxaʼ Reinu, guni búrlacaʼ laacabe o dede sanándacaʼ laacabe la? galán chinándacabe ejemplu stiʼ Noé, purtiʼ laa laaca gupa ca guendanagana riʼ.

Dxi mayaca guiluxe arca que, Noé maʼ napa 600 iza ne dxi que nga beeda gati Lamec, bixhózebe. * Gaayuʼ iza despué guti Matusalén, bixhozebiidabe. Ne laa bibani 969 iza, ne laa nga hombre ni jma xadxí bibani ni ruzeeteʼ Biblia (Génesis 5:27). Matusalén ne Lamec bibánicaʼ tiempu bibani Adán, primé hombre ni guyuu lu Guidxilayú.

Iza gutiʼ Matusalén, gudxi Jiobá Noé ca diidxaʼ riʼ: «Guyuu lii, ne binnilídxiluʼ ndaaniʼ arca ca». Ne laaca gúdxibe laa cuʼ guiráʼ clase maniʼ ndaaniʼ ni: cada maniʼ nayá naquiiñeʼ cuʼbe gadxe ni rinabaʼ Dios gudiicabe laa, ne chupa chupa de xcaadxi maniʼ (Génesis 7:1-3).

Nanna pabiáʼ nidxagayaanu pa nidúʼyanu ora zeeda guiráʼ clase maniʼ ra nuu Noé, cásica ni nahuiiniʼ zaqueca ni naroʼbaʼ, nuu ni nadóʼ, nuu ni naduxhuʼ, nuu ni zeedazá, nuu ni zeeda papa, nuu ni zeeda xubi ndaaniʼ layú... Peru cadi guiníʼ íquenu cananaazeʼ Noé ca maniʼ que, ne cadi canagusixooñebe ca maniʼ duxhuʼ que o cuyúbibe ximodo cuʼbe laacame ndaaniʼ arca que. Historia stiʼ Noé ni rieeteʼ lu Biblia na stúbicame «guyuucame [...] ndaaniʼ arca que» (Génesis 7:9).

Nuu tu raca nagana para laa guni cré pa dxandíʼ gúcani zacá. Qué randa riníʼ íquecabe ca maniʼ que nuudxicaʼ ndaaniʼ arca que. Yanna, guiníʼ ique chaahuinu ndiʼ: ñee qué gapa Dios ni bizáʼ guibáʼ ne Guidxilayú poder para gucaabe ca maniʼ duxhuʼ  que gácacaʼ nadóʼ la? Guietenaláʼdxinu Jiobá nga Dios ni bixheleʼ nisadóʼ Xiñáʼ que ne laaca laabe nga bicueezabe Gubidxa ti biaje. Yanna, ñee qué zanda gúnibe guiráʼ ni rieeteʼ lu historia stiʼ Noé la? Zanda pue.

Ñanda nuyubi Dios sti modo para nulá ca maniʼ que. Peru ora gúdxibe Noé guni ti arca para guilácame bisihuínnibe nuu xpiaanibe ne rusietenalaʼdxiʼ ni laanu ni gúdxibe primé hombre bizaʼbe que ora gúdxibe laa gapaʼ guiráʼ maniʼ nuu lu Guidxilayú (Génesis 1:28). Ne laaca galán gánnanu stale binni riquiiñeʼ historia riʼ para gusiidiʼ ca xiiñiʼ cadi binni si nga risaca para Jiobá, sínuque né ca maniʼ ni bizaʼbe.

Jiobá gudxi Noé maʼ sti semana si cayaadxaʼ para gusábabe nisaguié naroʼbaʼ que. Nabé stale dxiiñaʼ bíʼnibe ca dxi que. Guníʼ ique laabe caguube cada tobi de ca maniʼ que lugar stiʼ, caguube ni gocaʼ ne guiráʼ cosa stiʼ binnilídxibe. Nanna dxíchinu nabé biʼniʼ xheelaʼ Noé dxiiñaʼ, ne zaqueca biʼniʼ xheelaʼ Sem, Cam ne Jafet para biʼniʼ chaahuicaʼ ndaaniʼ arca que ti ganda guibánicabe ndaaniʼ ni.

Peru xi biʼniʼ ca binni que ora bíʼyacaʼ guiráʼ ni cayúnicabe que yaʼ. Qué nulábicaʼ Noé, neca biiyacaʼ caguu Jiobá ndaayaʼ laabe ne dxiiñaʼ ni cayúnibe. Nin ora bíʼyacabe cayuu guiráʼ maniʼ que ndaaniʼ arca qué nuchaacabe. Qué ridxagayaanu gánnanu zacá biʼniʼ ca binni que, purtiʼ yanna zacaca runi binni. Laaca qué rinacaʼ guni crecaʼ pa maʼ nabáninu lu ca últimu dxi stiʼ guidxilayú riʼ, neca rihuinni dxichi zacá ni. Ne casi guníʼ apóstol Pedru, stale tu laa zuni burla cani runi cré zaca cani cá lu Biblia (2 Pedro 3:3-6). Ne nánnanu zacaca nga bizaaca Noé ne binnilidxi.

Padxí bisaana ca binni que de guni búrlacaʼ laacabe yaʼ. Biblia ruzeeteʼ guluu si Noé binnilidxi ne guiráʼ maniʼ que ndaaniʼ arca que la? «biseeguʼ Jiobá puertaʼ que». Ni biʼniʼ Jiobá riʼ, biseeguʼ ni ruaa ca binni ni nuu gaxha ni cayuni burla laacabe. Ne pa qué ñaanadxícabe de ñuni búrlacabe la? óraruʼ bíʼyacabe biaba nisaguié que bigánicabe, purtiʼ biaba dxacha nisaguié dede bilaahua guidubi naca Guidxilayú, cásipeʼ guníʼ Jiobá que (Génesis 7:16-21).

Ñee biecheʼ Jiobá pur guti guiráʼ ca binni malu que la? Coʼ, qué ñéchedibe (Ezequiel 33:11). Laabe bidiibe laacaʼ stale tiempu para nuchaacaʼ xpiaʼcaʼ. Ñee ñanda nuzuubacabe stiidxaʼ Dios ne nilácabe ora biaba nisaguié naroʼbaʼ que la? Ñanda pue, pa ñúnicabe casi biʼniʼ Noé. Purtiʼ Noé guzané Dios, o bizuubabe stiidxaʼ lu guiráʼ ni bíʼnibe. Ne Biblia na «pur modo bini cre be que bisihuinni be pabiáʼ cuchee binni guidxilayú» tiempu bibánibe. Zacapeʼ nga bíʼnibe, pur fe ni gúpabe bisihuínnibe pabiáʼ cuchee ca binni bibani ca dxi stibe. Ne laaca pur fe ni gúpabe ca bilabe ne bilá binnilídxibe. Ra chinándaluʼ ejemplu stibe laaca zanda guilaluʼ ne guilá binnilídxiluʼ. Cásica Noé, lii laaca zanda sáneluʼ Jiobá Dios, zanda gaca xhamíguluʼ laabe, ne qué ziuu dxi gusaana de gaca xhamígutu.