QUÉ ridúʼyanu dxi biasa Jesús lade gueʼtuʼ casi ti historia ni qué risaca ni bizaaca dxiqué. Apóstol Pablu bisiene ni sicaríʼ: «Dxandí bibani Cristu de lade gueʼtuʼ, ne nirudóʼ laabe biasa be lade irá xixé cani ma guti. Purti cásica pur tobi hombre bizulú enda guti la? zaqueca pur stobi hombre biuu enda ribani de lade gueʼtuʼ. Cásica rati irá binni purti za de Adán la? zaqueca zabani irá cani aca né Cristu tobi si» (1 Corintios 15:20-22).

Biasa Jesús lade gueʼtuʼ 16 stiʼ beeu nisán, iza 33. Dxi ca nga rié ca judíu ndaaniʼ yuʼduʼ stiʼ Jerusalén para gudiicaʼ Jiobá ni riasa primé lu layú sticaʼ. Cumu Pablu na Jesús nga primé, o «nirudóʼ», ni biasa lade gueʼtuʼ la? nga riníʼ ziuuruʼ jma binni guiasa.

Xcaadxi diidxaʼ ni guníʼ Pablu riʼ cusiene xi zabeendunu ra biasa Jesús lade gueʼtuʼ: «Cásica pur tobi hombre bizulú enda guti la? zaqueca pur stobi hombre biuu enda ribani de lade gueʼtu». Pur bichee Adán, guiranu rátinu purtiʼ zanu de laabe. Peru ra bidii Jesús guendanabani sin donda stiʼ zanda guiásanu lade gueʼtuʼ ne zacá guireʼnu lu náʼ guendaruchee ne guendaguti. Sicaríʼ bisiene Pablu ni lu Romanos 6:23: «Purti ni riaxa pecadu nga enda guti, peru ni rudii Dios nga enda nabani ni qué zaluxe, pur Cristu Jesús Señor stinu».

Jesús peʼ guníʼ xi zabeendunu ra gútibe ne biásabe lade gueʼtuʼ. Sicaríʼ guniʼbe: «Ti irá ni guni cre laabe, cadi initilú sínuque gapa enda nabani ni qué zaluxe. Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:14-16).

Guníʼ ique guibániluʼ sin qué chuʼ dxi gátiluʼ ne sin yuubaʼ (Apocalipsis 21:3, 4). Cadi dxandíʼ guizáʼ sicarú nga la? Sicaríʼ guníʼ ti hombre ni ruundaʼ de Biblia: «Ca baʼ ca rusietenaláʼdxicani laanu cadi xadxí ribáninu, ne guendaribani lade gueʼtuʼ rusihuínnini nagueenda zaree binni lu náʼ guendaguti». Nga runi nanna dxíchinu pur biasa Jesús lade gueʼtuʼ zanda guibani binni sin qué chuʼ dxi gati.