«Ora iníʼ né tu Dios la? sicaríʼ nga iníʼ tu: “bixhoze du”»

Xi riníʼ íqueluʼ ora gunadiágaluʼ diidxaʼ bixhozeʼ. Ñee riníʼ íqueluʼ ti hombre ni rizaalaʼdxiʼ binnilidxi la? o tobi ni qué rizaalaʼdxiʼ ne runiná laacabe. Zándaca modo guca bixhózeluʼ nga guiníʼ íqueluʼ.

JESÚS guníʼ diidxaʼ bixhozeʼ ora guniʼné Dios ne ora guníʼ de laabe. * Ne ora bisiidibe ca discípulo stibe guiníʼnecaʼ Dios, gúdxibe laacaʼ: «Ora iníʼ né tu Dios la? sicaríʼ nga iníʼ tu: Bixhoze du» (Lucas 11:2). Peru ximodo naca Bixhózenu Jiobá ne laanu yaʼ. Risaca gánnanu ni, purtiʼ ra jma guiénenu nacháʼhuibe la? jma ziuʼnu gaxha de laabe ne jma zannaxhiinu laabe.

Cumu Jesús si nga ni huayuu jma gaxha de Jiobá la? laasibe nga zanda gábibe laanu ximodo Bixhózenu ni nuu guibáʼ. Ngue runi, guniʼbe ca diidxaʼ riʼ: «Naa nga Xiiñibe ne irutiʼ  runibiáʼ naa jma que laabe, ne zaqueca irutiʼ runibiáʼ laabe jma que naa ne cani racaladxe gunibiáʼ laabe» (Mateo 11:27). Yanna laanu la? zanda gunibiaʼnu Jiobá ra gucaadiáganu Xhiiñibe.

Xi rusiidiʼ Jesús laanu de Jiobá yaʼ. Sicaríʼ guniʼbe: «Purti nadxii xhaataʼ Dios binni guidxilayú ngue runi bidii tobi lucha Xiiñiʼ, ti irá tu guni cré Xiiñibe que la? cadi initilú sínuque gapa enda nabani ni qué zaluxe» (Juan 3:16). Ca diidxaʼ riʼ rusihuínnicani guendarannaxhii ca nga ti guenda ni jma risaca napa Bixhózenu ni nuu guibáʼ (1 Juan 4:8). Jiobá rusihuinni nadxii laanu ora riuulaʼdxiʼ ni rúninu, rilaselaʼdxiʼ laanu, rapa laanu, riguu jneza laanu ne ora rudii laanu ni iquiiñenu.

Riuulaʼdxibe ni rúninu

Ora rabi binni xiiñiʼ jneza ni cayuni, riguucabe gana laacaʼ ne racanecabe laacaʼ guni sentircaʼ galán. Bixuilú pabiáʼ biecheʼ Jesús ora gudxi Bixhózebe laabe ca diidxaʼ riʼ: «Ndiʼ nga Xiiñeʼ ni nadxieeʼ ne ni rusiecheʼ naa» (Mateo 3:17). Jesús laaca cayabi laanu nadxii Jiobá laanu ne riuuláʼdxibe ni rúninu. Sicaríʼ guniʼbe ti biaje: «Ni nadxii naa la? zanaxhii Bixhoze laa» (Juan 14:21). Cadi dxandíʼ riguixhedxí ca diidxaʼ riʼ ladxidoʼnoʼ la? Peru, nuu tu ni qué racalaʼdxiʼ gannaxhii Dios laanu.

Binidxabaʼ racalaʼdxiʼ guiníʼ íquenu qué rusisaca Jiobá, Bixhózenu ni nadxii laanu, stipa ni rúninu. Ora jma nuunu nadá, casi ora maʼ bióʼxhonu, ora huaranu ne nuunu triste pur xiixa ni bizaacanu o pur xiixa ni qué niree laanu jneza la? rucaa Binidxabaʼ laanu guiníʼ íquenu cadi jneza ruuyaʼ Jiobá cani rúninu. Guidúʼyanu xi bizaaca Lucas. Laabe guníʼ íquebe qué risácabe nezalú Dios. Ra jma ziniisibe biiyabe maʼ qué ñuni bixhózebe ne jñaabe modo bisiidicaʼ laabe riuulaʼdxiʼ Dios guibani binni. Zándaca pur nga guca nagana para laabe chuʼbe gaxha de Dios, Bixhózebe ni nuu guibáʼ. Ne cumu qué niníʼ íquebeʼ para ñúnibeʼ xiixa la? nabé gúpabe guendanagana ne xcaadxi binni. Peru xheelabe, ni biiyabe laa casi «ti ndaayaʼ nabé risaca stiʼ Dios», gucané laabe para bichaabe modo nácabe, purtiʼ qué niree gana laabe. Despué biene Lucas «beeda Cristu Jesús ndaani guidxilayú, beda ulá cani cuchee» (1 Timoteo 1:15). Ora riníʼ íquebe nadxii Jiobá laabe ne rusisaca ni rúnibe nabé rusiecheʼ nga laabe.

Pa gueedandá ndaaniʼ íqueluʼ cadi nadxii Jiobá lii ne qué ziuu dxi chuuláʼdxibe ni gúniluʼ la? guníʼ ique ca diidxaʼ ni zeeda lu Romanos 8:31-39. Apóstol Pablo na gastiʼ «zanda uxhele laanu de Dios ni nadxii laanu, purti bisihuinni be pabiáʼ nadxii be laanu pur ni biʼni Jesucristu Señor stinu». *

Rilaseláʼdxibe laanu

Bixhózenu ni nuu guibáʼ naca ti Dios ni nabé nadxii laanu ne «riá», o rilaselaʼdxiʼ, laanu (Lucas 1:78). Pur cani biʼniʼ Jesús bisihuínnibe rilaselaʼdxiʼ Bixhózebe binni (Marcos 1:40-42; 6:30-34). Ne cani dxandíʼ xpinni Cristu rúnicaʼ stale stipa pur guilaseláʼdxicaʼ binni cásica runi Jiobá. Laacabe rinándacabe ni cayuni mandar Biblia binni guni: «Lagaca nachaʼhui ne stobi, ne lailaselaʼdxi saa» (Efesios 4:32).

Guidúʼyanu ni bizaaca Felipe. Ti dxi laga zebe dxiiñaʼ málasi biʼniʼ sentirbe ti yuubaʼ guizáʼ naná déchebe, casi ora nucuícabe ti gudxiu laabe. Oraqueca yenécabe laabe ra hospital. Xhono ora bindaa para biiyaʼ ca doctor que gureza tobi de ca capa ni nuu ndaaniʼ aorta (ti arteria ni jma risaca dxiiñaʼ runi lu xcuerpu binni). Gúdxicabe laabe maʼ veinticincu minutu si nabánibe ngue runi maʼ cadi caquiiñeʼ diʼ gaca operarbe.

Dxi guyuu Felipe ra hospital que laaca guyuu  xcaadxi xpinni Cristu né laabe. Cumu bilaseláʼdxicaʼ laabe la? óraqueca yenecaʼ laabe sti hospital, casi yendabe raqué nagueendaca guluucabe laabe ndaaniʼ quirófano. Ca xpinni Cristu que gulézacaʼ dede biluxe operación que, ne biaʼsi biree ni. Ora riníʼ ique Felipe ni bizaaca que nabé rudiibe xquíxepeʼ ca xpinni Cristu pur bilaseláʼdxicaʼ laabe. Peru laabe nanna dxíchibe Bixhózebe ni nuu guibáʼ ngue biniibi ladxidóʼ ca binni que gúnicaʼ zaqué. Sicaríʼ guníʼ Felipe: «Biiyaʼ Dios casi Bixhozeʼ ni nadxii naa, purtiʼ bineʼ sentir bidiibe stipa naa ne qué nusaanabe naa». Ne zacá nga runi Jiobá, riquiiñebe ca xpínnibe para gusihuínnibe rilaseláʼdxibe binni.

Rápabe laanu

Ora guuya ti baʼduhuiiniʼ nuu ra naxoo la? nagueendaca ruyúbibe bixhózebe, purtiʼ nánnabe qué zazaacabe gastiʼ pa nuube ndaaniʼ náʼ. Ne Jesús gunna dxichi rapa Jiobá ca xiiñiʼ (Mateo 26:53; Juan 17:15). Laanu laaca zanda guyúbinu chuʼnu ndaaniʼ náʼ Jiobá para gapa laanu. Ne rúnibe ni para cadi chuʼ xiixa ni guxheleʼ laanu de laabe. Ne para nga rudiibe laanu guiráʼ ni caquiiñenu ti cadi chu xiixa ni guniná laanu. Tobi de laacani nga ca conseju ni zeeda lu Stiidxabe. Ora gudiicabe laanu xiixa conseju de lu Biblia, naquiiñeʼ guiníʼ íquenu casi ñaca ñunadiáganu stidxi Jiobá cayabi laanu: «Ndiʼ nga neza ca. Lasá luni» (Isaías 30:21).

Guidúʼyanu ejemplu stiʼ Tiago, ne guiropaʼ bíʼchibe Fernando ne Rafael. Laacabe guyuucabe lade ti grupu de rock. Nabé biéchecabe ora gúnnacabe ziguxhidxi grupu stícabe ti lugar ra nabé rié binni ndaaniʼ guidxi São Paulo (Brasil). Ruluí si zácacabe ti grupu nabé risaca. Peru ti xpinni Cristu gudxi laacabe xi zazaaca pa nabé guidxaagacabe ca binni ni qué runi ni ni na ca ley stiʼ Dios (Proverbios 13:20). Para bisihuínnibe jneza nga conseju ni zeeda lu Biblia ca la? guniʼbe ni bizaaca bíʼchibe. Cumu laa bidxaaga binni ni runi cosa dxabaʼ la? biʼniʼ cásica runi ca binni que. Ni guniʼbe ca bicaa ni Tiago ne ca biʼchiʼ guireecaʼ lade grupu que. Yanna riʼ, jma riquiiñecabe tiempu stícabe para gucheechecabe stiidxaʼ Dios. Nanna dxíchicabe pur yenándacabe conseju ni zeeda lu Stiidxaʼ Dios nga qué nixélecabe de laabe.

Riguu jnezabe laanu

Ti binni ni nadxii xiiñiʼ riguu jneza laabe, purtiʼ rizaalaʼdxiʼ gácabe ti binni nuu xpiaaniʼ (Efesios 6:4). Neca qué zaree cuéʼ bixhózebe de ni maʼ guníʼ la? qué ziuu dxi gaca naduxhuʼ ora maʼ caniʼné laabe. Zaca nga runi Bixhózenu ni nuu guibáʼ ora guuyaʼ caquiiñeʼ uguu jneza laanu. Lugar de guninabe laanu,  rusihuínnibe nadxiibe laanu ora rulidxebe laanu. Zaqueca biʼniʼ Jesús, laa qué ñuu dxi ñaca naduxhuʼ né ca discípulo stiʼ, sínuque gúcabe nachaʼhuiʼ né laacaʼ neca nuu tiru bindaa para yenándacaʼ conseju bidiibe laacaʼ (Mateo 20:20-28; Lucas 22:24-30).

Guidúʼyanu ejemplu stiʼ Ricardo. Laabe bidiibe cuenta guluu jneza Jiobá laabe purtiʼ nadxii laabe. Dxi nápabe gadxe beeu bisaana bixhózebe laabe. Ra maʼ ziniisibe biquiiñebe ñuu bixhózebe gaxha de laabe, purtiʼ despué bíʼnibe stale cosa ni bininá laabe. Ora bidiibe cuenta cadi zinándabe ni ná ca ley stiʼ Dios la? bichiiñaʼ xquendabiaanibe laabe. Ne biyúbibe guiníʼnebe ca binnigola ni nuu ra ridagulisaabe. Ca binnigola que gúdxicaʼ laabe xi naquiiñeʼ gúnibe ne bisihuínnicaʼ nadxiicaʼ laabe ora bidiicaʼ conseju ni zeeda lu Biblia laabe. Neca gucuaabe ca conseju que ne bidiibe xquíxepeʼ ca binnigola que pur guluu jneza ca laabe la? nabé biinabe, stale gueelaʼ qué ñásibe ne nabé guyuube triste. Peru despué bietenaláʼdxibe ca diidxa ni zeeda lu Hebreos 12:6 ra na: «Jiobá riguu jneza cani nadxii», [TNM]. Ca diidxaʼ riʼ gucanécani laabe guiénebe guluu jneza Jiobá laabe purtiʼ nadxii laabe.

Naquiiñeʼ gánnanu cadi gulídxesicabe o guni castigárcabe binni nga uguu jnézacabe laa. Biblia laaca riquiiñeʼ diidxaʼ ca ora riníʼ naquiiñeʼ gusiidicabe tuuxa. Nuu biaje, riguu jneza Bixhózenu ni nuu guibáʼ laanu ra gudii lugar gacananu ti tiempu pur xiixa ni qué ñúninu jneza. Peru Biblia cusiene laanu ni racalaʼdxiʼ Jiobá nga gusiidiʼ laanu ti ganda gúninu ni jneza (Hebreos 12:7, 11). Jiobá racalaʼdxiʼ guibáninu galán, nga runi riguu jneza laanu.

Rudiibe ni caquiiñenu

Tuuxa ni nadxii binnilidxi, rudii ni caquiiñecabe, ne ngapeʼ nga ni runi Jiobá. Jesús peʼ guníʼ ca diidxaʼ riʼ: «Peru ma nanna Bixhoze tu ni nuu ibáʼ xi irá cayaadxa laatu» (Mateo 6:25-34). Ne Jiobá cudii stiidxaʼ laanu: «Qué zusaana laatu ne qué ziaana dxie de acaniá laatu» (Hebreos 13:5).

Ti gunaa láʼ Nice, biiyaʼ dxandíʼ ni na ca diidxaʼ ca dxi biaana xheelaʼ sin dxiiñaʼ. Ne nacubi bisaana Nice ti dxiiñaʼ ra gudíxhecabe laa galán para ganda gapa tiempu guuyaʼ ca xiiñiʼ ne gucheeche stiidxaʼ Dios. Xi gúnicabe yanna yaʼ. Nice gunabaʼ Jiobá gacané laacaʼ, ne sti dxi que, ora zeʼ xheelabe zicaa ca stiʼ ra biʼniʼ dxiiñaʼ que, bidxaagalú patrón que laabe ne bidii laabe ti plaza. Qué liica ñaana xheelaʼ Nice sin dxiiñaʼ, ne guirópacabe rudiicabe xquíxepeʼ Bixhózecabe ni nuu guibáʼ. Ca ejemplu ca racanécani laanu gánnanu nadxii Jiobá laanu ne qué ziuu dxi gusiaadxabe ni iquiiñenu.

Gudiinu xquíxepeʼ Jiobá pur nadxii laanu

Ni dxandíʼ nga né diidxaʼ si qué zanda diʼ guininu pabiáʼ nadxii Bixhózenu ni nuu guibáʼ laanu. Jiobá rusihuinni nadxii laanu ora riuulaʼdxiʼ ni rúninu, rilaselaʼdxiʼ laanu, rapa laanu, riguu jneza laanu ne ora rudii laanu ni riquiiñenu. Ñee cadi rucaa nga laanu guiníʼ íquenu laabe nga Bixhózenu ni jma nadxii laanu la?

Yanna, ximodo gusihuínninu cudiʼnu xquíxepeʼ Jiobá pur nadxii laanu yaʼ. Primé la? naquiiñeʼ gúninu stipa pur gunibiáʼ chaahuinu laabe ne pur gánnanu xii nga cani naguixhe íquebe gúnibe (Juan 17:3). Ne naquiiñeʼ guibáninu modo nabe (1 Juan 5:3). Laaca naquiiñeʼ gusihuínninu nadxiinu binni, cásica rúnibe (1 Juan 4:11). Pa gúninu zacá la? dxandipeʼ zusihuínninu ridúʼyanu Jiobá casi Bixhózenu ne risaca para laanu nga nácanu xiiñibe.

[Nota]

[Ni caníʼ yaza 19]

Ra jma guiénenu nachaʼhuiʼ Bixhózenu Jiobá la? jma ziuʼnu gaxha de laabe ne jma zannaxhiinu laabe

[Ni caníʼ yaza 22]

Zanda gusihuínninu dxandipeʼ ridúʼyanu Jiobá casi Bixhózenu ne risaca para laanu nga nácanu xiiñibe

[Ca imagen ne cuadru ni zeeda lu yaza 21]

STALE MODO RUSIHUINNI JIOBÁ NADXII BINNI

RIUULÁʼDXIBE NI RÚNINU

RILASELÁʼDXIBE LAANU

RÁPABE LAANU

RIGUU JNÉZABE LAANU

RUDIIBE NI IQUIIÑENU