Nabé feu modo guca juzgarbe

LU BIBLIA zeeda tapa relatu ni runibiáʼ binni casi Evangeliu, ne cusiénecani ximodo gunaazecabe Jesús, modo biʼniʼ juzgárcabe laabe ne modo biiticabe laabe. Relatu ca nga tobi de cani jma runibiáʼ binni de modo biʼniʼ juzgárcabe dxiqué. Peru xiñee naquiiñepeʼ gánnanu modo biʼniʼ juzgárcabe laabe dede ra biiticabe laabe yaʼ. Primé la? purtiʼ biʼniʼ mandarbe ca xpínnibe guietenaláʼdxicaʼ guendaguti stibe; guiropa, purtiʼ naquiiñeʼ ganna chaahuinu de ca falsu ni gundísacabe luguiabe, ne guionna, racaneni laanu gánnanu pabiáʼ risaca ni biʼniʼ Jesús ra bidii xquendanabani pur laanu ne pur laani zanda gápanu guendanabani ni qué zaluxe (Lucas 22:19; Juan 6:40).

Imperiu stiʼ Roma nga biʼniʼ mandar Palestina dxiqué, ne bidiicabe derechu ca xaíque yuʼduʼ stiʼ ca judíu para gúnicaʼ justicia casi na ca ley ni gudíxhecaʼ, peru qué nicaacaʼ derechu de guuticaʼ binni malu. Nga runi, neca gunaazeʼ ca xaíque yuʼduʼ stiʼ ca judíu Jesús la? ca romanu que nga biiticaʼ laabe. Cumu qué ñuulaʼdxiʼ ca xaíque yuʼduʼ stiʼ ca judíu cani bisiidiʼ Jesús la? ngue runi gudixhe íquecaʼ gúticaʼ laabe. Ne ora biiticaʼ laabe, gucaláʼdxicaʼ nusihuínnicaʼ casi ora zinándacaʼ ni na ley. Sicaríʼ guníʼ ti profesor de Ley ni biindaʼ de  modo biʼniʼ juzgárcabe Jesús: «Nabé feu modo biʼniʼ juzgárcabe laabe, ne qué huayuu dxi guni juzgárcabe sti binni zacá». a

Qué ninándacabe ni na ley ora biʼniʼ juzgárcabe laabe

Ley ni bidii Moisés guidxi Israel runibiáʼ binni ni casi «ley jma galán ne jma jneza ne qué huayuu dxi chuʼ xcaadxi ley casi laani». Tiempu bibani Jesús, ca rabinu ni ruuyaʼ gaca ni na ley gudíxhecaʼ chinanda binni stale ley ni guníʼsicaʼ ne despué bicaacaʼ ni lu Talmud (biiyaʼ cuadru ni láʼ «Ca ley ni yenanda ca judíu lu primé siglu que», zeedani lu yaza 20). Dede pabiaʼtiʼ yenándacabe cani zeeda lu Biblia ne cani cadi zeeda luni dxi biʼniʼ juzgárcabe Jesús yaʼ.

Primeru guidúʼyanu modo gunaazecabe laabe. Para ñanda ñúnicabe casi na ley la? naquiiñeʼ nuchíñacabe chupa testigu nezalú justicia para niniʼcaʼ xi cosa malu biʼniʼ binni ni culuiʼnácabe ca. Lu primé siglu que, ndaaniʼ guidxi Palestina, pa guiníʼ tuuxa nuu ti binni ni cadi cayuni ni na ley la? naquiiñeʼ cheʼ ca dxi ridagulisaa ca binni ni runi juzgar para chinduu queja nezalú ti juez. Ca binni ni runi juzgar ca, cadi laadícabe nga rudxiibacabe donda ique binni, sínuque cani zeʼ de testigu nga rúnicaʼ ni. Ruzulú runi juzgárcabe tuuxa ora chuʼ chupa testigu ni guiníʼ ngueca de binni ni cayaca juzgar ca, pur guiráʼ ni guiníʼcabe nga zaguiʼbaʼ donda ique binni ca ne despué maʼ guseguyoocabe laa (Deuteronomio 19:15). Peru ca xaíque stiʼ ca judíu que biyúbicaʼ «modo guuti ca Jesús». Ngue runi, «nisi [biyúbicaʼ] ximodo» guinaazecaʼ laabe, peru para gúnicaʼ ni «sin ganna binni» la? bíʼnicaʼ ni huaxhinni (Lucas 22:2, 5, 6, 53).

Guirutiʼ nindisaʼ falsu luguiáʼ Jesús ora gunaazecabe laa. Gunaazeʼ si ca sacerdote ne Sanedrín que laabe la? oraqueruʼ biyúbicaʼ testigu, peru nin chupa binni qué nidxélacaʼ para niníʼ ti cosa si (Mateo 26:59). Qué gánnanu pa zacá gúcani, peru ni nánnanu nga cadi dxiiñaʼ diʼ stiʼ cani runi juzgar ca guyúbicaʼ testigu. A. Taylor Innes, ti hombre ni biindaʼ de ley ne bicaa libru, guníʼ sicaríʼ: «Cadi liica jneza nga rúnicabe ora guchíñacabe tuuxa nezalú juez ne gábicabe laa chigati sin guiníʼcabe xi cosa malu biʼniʼ».

Ca binni ni gunaazeʼ Jesús que yenecaʼ laabe ralidxi Anás, ni guca xaíque stiʼ cani ruzaaquiʼ guʼxhuʼ. Ne Anás bizulú gunabadiidxaʼ laabe (Lucas 22:54; Juan 18: 12, 13). Anás qué ñuni ni na ley, purtiʼ ora rudxiibaʼ binni donda ique tuuxa para gati la? naquiiñeʼ gúnini ridxíʼ ne cadi huaxhinni. Ne ora guinabadiidxacabe binni ni cayaca juzgar ca naquiiñeʼ gúnicabe ni nezalú stale binni, ne cadi laasicabe né binni ca. Cumu nanna Jesús cadi jneza ni cayuni Anás la? ngue runi bicábibe laa: «Xiñee canaba diidxa lu naa. Unaba diidxa cani huayuna diaga. Laaca nanna ca xi huayué nia laacaʼ» (Juan 18:21). Ca binni ni zeʼ de testigu nga naquiiñeʼ guiníʼ ne cadi binni ni cayaca juzgar. Ti juez ni runi xhiiñaʼ jneza la? ñene ca diidxaʼ ni guníʼ Jesús ne nudii cuenta naquiiñeʼ ninanda modo na ley que, peru cadi ngue diʼ nga ni cá ique Anás guni.

Pur ni bicabi Jesús que gudapa tobi de ca soldadu que ruaabe, ne stáleruʼ cosa biʼniʼ huantarbe gueelaʼ que (Lucas 22:63; Juan 18:22). Lu capítulo 35 stiʼ Números, cayeeteʼ de Ley ni guyuu ndaaniʼ guidxi ra bixooñeʼ binni para guilá dxiqué. Laani nani cadi naquiiñeʼ guninácabe tuuxa binni ni cayaca juzgar ante guihuinni pa napa donda. Ngue runi, cadi naquiiñeʼ diʼ ñuninácabe Jesús.

Despué, ca binni ni gunaazeʼ laabe que yenecaʼ laabe ralidxi Caifás, xaíque stiʼ cani ruzaaquiʼ guʼxhuʼ, ne raqué biʼniʼ juzgárcabe laabe guidubi gueelaʼ, peru qué ñúnicabe ni casi na ley (Lucas 22:54; Juan 18:24). Rihuínnica qué ninanda ca sacerdote que ley ni nápacaʼ para guni juzgarcaʼ binni purtiʼ maʼ nuu Jesús raqué ora biyúbicaʼ «tuuxa iníʼ paraa pe bichee[be], neca cadi dxandí ni, ti chuʼ xi pur gati be». Neca biyúbicabe binni, peru gadxé gadxé ni guniʼcaʼ de ni guníʼ Jesús (Mateo 26:59; Marcos 14: 56-59). Caifás bicaa laabe gúnibe ti cosa ni gudxiibaʼ donda íquebe, ngue runi gunabadiidxaʼ laabe: «Qué gapu xiixa iníuʼ la? Xi raʼbu de ni cugaani cabe luguiá  lu ri yaʼ» (Marcos 14:60). ¡Cadi liica jneza ni biʼniʼ hombre riʼ! Taylor Innes, ni maca bizéʼtenu que guníʼ: «Ora rinabadiidxacabe binni ni cayaca juzgar ne ugaanicabe donda ique pur ni guicabi, rusihuínnicabe cadi cayúnicabe justicia».

Últimu la? gunabadiidxaʼ xaíque stiʼ ca sacerdote que laabe: «Ñee lii nga Cristu Xiiñi Dios la?». Jesús bicabi laabe: «Naa pue. Ne zuuya tu Hombre Biseenda Dios zuba cueʼ Dios ni nandxóʼ, ne zuuya tu laa zeda yete de xaibáʼ lade za». Pur modo bicabi Jesús riʼ, guníʼ ique ca sacerdote que caniʼbe mal de Dios, ne guirácabe nácabe «napa be xidé gati be» (Marcos 14:61-64). b

Casi na ley ni bidii Dios Moisés, naquiiñeʼ gaca juzgar tuuxa nezalú stale binni (Deuteronomio 16:18; Rut 4: 1). Peru ora biʼniʼ juzgárcabe Jesús, laasicabe bíʼnicabe ni. Qué nudiicabe lugar ñuu tu niníʼ xiixa pur laabe. Qué ninácabe nusihuínnibe laabe nga Mesías casi nabe que, ne laaca qué nudiicabe lugar nuchíñabe testigu para ñacané laabe. Ne cani cayuni juzgar laabe qué niniʼcaʼ xipeʼ castigu chicaabe.

Nezalú Pilatu

Casi maʼ guninu que, ruluíʼ si qué gapa ca judíu que derechu de guuticaʼ Jesús. Ngue runi yenécabe laabe nezalú Poncio Pilatu, gobernador stiʼ Roma, ne laa gunabadiidxaʼ laacabe: «Xi queja napa tu luguiá hombre riʼ». Cumu nánnacabe cadi malu diʼ para ca binni de Roma guiníʼ tuuxa mal de Dios la? gucaláʼdxicabe ñaca juzgarbe sin niníʼcabe xi cosa malu bíʼnibe. Laacabe guníʼcabe: «Pa ñaca cadi cuchee be, qué ñeda saana du laabe ra nuu luʼ» (Juan 18: 29, 30). Qué nulabi Pilatu guiráʼ ni guníʼcabe, ngue runi biiyacabe xiruʼ zanda gúnicabe para guihuinni napa Jesús donda, laacabe guníʼcabe: «Unaʼze du hombre ri caguite ca binni xquidxi du. Cayabi be laaca cadi naquiiñe quixe ca lu ná gobiernu, ne laca na be laabe nga Cristu ni zeda tí de rey» (Lucas 23:2). Ni bíʼniticabe bichaacabe ni bigaanicabe íquebe ne maʼ qué niníʼcabe caniʼbe mal de Dios, sínuque guníʼcabe cucaalube rey.

Ca judíu que nánnacaʼ qué ñuu dxi niníʼ Jesús cadi naquiiñeʼ quixe binni impuestu, sínuque laapebe guniʼbe naquiiñeʼ quixe binni ni (Mateo 22:15-22). Peru xi biʼniʼ Pilatu ora caníʼ ca binni que laca Jesús cayuni laa rey yaʼ. Rihuinni dxíchica cadi cá ique Jesús guniná Roma, ngue runi guníʼ Pilatu: «Qué idxela gasti donda luguiá be» (Juan 18:38). Ne zaqué guníʼ Pilatu biaʼ tiempu guca juzgarbe.

Pilatu gucalaʼdxiʼ nundaa Jesús, ne zaqué ninanda costumbre ni nápacabe de gundaacabe tuuxa ni deguyoo ora raca Pascua. Peru laga Barrabás bindaabe, ti hombre ni caguite ique binni para gucaalucaʼ gobiernu ne ni biiti binni (Lucas 23:18, 19; Juan 18:39, 40).

Sti modo bisihuinni Pilatu racalaʼdxiʼ gundaa Jesús nga gúdxibe ca binni que quíñecaʼ Jesús casi runi ca romanu tuuxa ante guicá lu yaga, ne bidiibe lugar ugácucabe laa lari moradu, cúʼcabe ti laʼpaʼ de guichi ique, cúʼcabe golpe laa ne guni búrlacabe laa. Oraqueruʼ guníʼ Pilatu sti biaje qué gápabe donda. Ra bíʼnibe zaqué casi ñaca ñábibe ca sacerdote que: «Yanna yaʼ, maʼ  nuutu nayecheʼ la?». Zándaca guníʼ ique Pilatu ziá ca binni que Jesús ora gúʼyacaʼ modo maʼ bidiiñebe o maʼ qué zanábacaʼ gátibe (Lucas 23:22). Peru cadi zaqué diʼ gúcani.

«Biyubi Pilatu nundaa laabe, peru bicaa ca judíu ridxi: Pa undaa lu laabe la? cadi xhamigu diouʼ César, purti irá ni guni laa rey cadi nuu né César tobi si.» (Juan 19:12.) Tiberio, ti emperador ni gupa Roma dxiqué, binibiáʼcabe laa purtiʼ ora guiníʼ ique cucheené tuuxa laa la? maca ziyuuti binni que, dede né ca soldadu jma risaca gúpabe bíʼnibe laacaʼ zacá. Cumu nabé maʼ bichiichi Pilatu ca judíu que la? maʼ qué nabe gúnibe xcaadxi cosa ni guchiichi laacaʼ, ne laaca qué nabe guiniʼcaʼ cudxiidéchebe laacaʼ. Modo cucaa ca binni que ridxi maca para gucaacaʼ Pilatu guni ni nacaʼ ne ngue nga bichibi laabe. Ngue runi bíʼnibe ni na ca binni que, bidiibe lugar guicá Jesús lu yaga, ti hombre ni qué gapa donda (Juan 19:16).

Bihuinni cadi jneza modo biʼniʼ juzgárcabe Jesús

Stale de ca binni ni biʼndaʼ de ley, maʼ biindacaʼ Evangeliu ni caníʼ de modo biʼniʼ juzgárcabe Jesús ne maʼ bidiicaʼ cuenta qué ninándacabe ni na ley ora biʼniʼ juzgárcabe laabe. Taylor Innes guníʼ: «Ora guzulú guni juzgárcabe tuuxa galaa gueelaʼ ne guilúxecabe galaa dxi stiʼ sti dxi, ne guiníʼcabe ximodo chigusabanácabe binni ca la? rusihuínnini qué liica ñúnicabe ni na ley yenanda ca hebreu dxiqué ne qué ñuni juzgárcabe laabe casi naquiiñeʼ gaca juzgar binni». Ti maestru de Derechu guníʼ: «Biaʼ tiempu biʼniʼ juzgárcabe laabe qué ninándacabe ni na ley ne qué ñúnicabe ni jneza dede zanda guininu laacabe biiticabe laabe ne cadi gútibe pur ni na ley».

Neca qué gapa Jesús donda la? nánnabe qué zanda guilá binni ni guzuubaʼ diidxaʼ pa qué gudiibe xquendanabánibe (Mateo 20:28). Laabe nabé gucaláʼdxibe gaca ni jneza, ngue runi bidiibe lugar gúnicabe laabe guiráʼ ni qué huayuu dxi gúnicabe sti binni. Dxandíʼ, guti Cristu pur ca binni ruchee ne lade ca binni ca nga nuunu. Cadi dxandíʼ laani nga ti cosa ni cadi naquiiñeʼ gusiáʼndanu la?

[Cani cá ñee yaza]

 [Cuadro ne dibuju/foto ni zeeda lu yaza 20]

Ca ley yenanda ca judíu lu primé siglu

Nabé xadxí yenanda ca judíu caadxi ley ni guníʼsicaʼ, ne bicaacabe ca ley riʼ lu ca primé gayuaa iza de ca dxi stinu riʼ. Ndiʼ nga chupa chonna de laacani.

▪ Ora gaca juzgar tuuxa para gati, primeru naquiiñeʼ gucaadiágacabe ca razón gudii binni ni cayaca juzgar ca para gusihuinni qué gapa donda

▪ Ca juez que ruyúbicaʼ modo para cadi gati binni ni cayuni juzgarcaʼ

▪ Ca juez que zanda guyúbicaʼ modo chuʼcaʼ pur binni ni cayuni juzgarcaʼ ne cadi para ganinacaʼ laabe

▪ Dede ante rábicabe ca binni ni cheʼ de testigu cadi guendariguite diʼ nga dxiiñaʼ ni chigúnicaʼ

▪ Qué rinabadiidxacabe ti testigu nezalú stobi, sínuque rúnicabe ni tobigá

▪ Ni guiníʼ ca testigu ca naquiiñeʼ guihuinni tobi si cani né cani nácabe biʼniʼ binni ni cayaca juzgar ca (dxi, lugar, hora, ne xcaadxi cosa)

▪ Ora guni juzgárcabe tuuxa para guihuinni pa caquiiñeʼ gati la? naquiiñeʼ gúnicabe ni ridxíʼ ne guilúxeni ridxíʼ

▪ Ora gaca juzgar tuuxa para gati, cadi naquiiñeʼ gácani ora zeedayuba ti sábadu o xiixa saa

▪ Ora guni juzgárcabe tuuxa para gati naquiiñeʼ guzuluni ne guilúxeni ti dxi si, pa guihuinni qué gapa binni ca donda. Peru pa guihuinni nápabe donda la? zalúxeni dede sti dxi ora guiníʼcabe xi castigu guicaabe ne despué ruuticabe laabe

▪ Zanda guininu huaxiéʼ juez nga guyuu ra cayaca juzgar tuuxa ora chuʼ veintitrés si

▪ Despué de maʼ bicaadiágacabe binni ni cayaca juzgar ca, cada tobi de ca juez que riniʼcaʼ pa dxandíʼ nápabe donda o pa coʼ, ne ca juez ni ruzulú riníʼ nga cani jma nahuiiniʼ. Ca escriba que rucaacaʼ panda juez nga guiníʼ napa binni ca donda ne panda binni guiníʼ qué gápabe donda

▪ Pa biaʼca binni guiníʼ qué gápabe donda ne biáʼqueca guiníʼ nápabe donda la? naquiiñeʼ chuʼ sti binni guiníʼ pur laabe ti guihuinni qué gápabe donda. Para quibaʼ donda íquebe la? naquiiñeʼ chuʼ xhupa binni ni guiníʼ nápabe donda. Pa casi guiráʼ juez que guiníʼ nápabe donda, ne nuu tobi guiníʼ qué gápabe donda la? zanábacabe gueeda xhupa juez, ne pa caquiiñeruʼ gusendacaacabe jma la? zúnicabe ni dede ora maʼ ganda quíxhecabe xi gaca binni ca casi na ley

▪ Pa nin ti juez qué chuʼ pur binni ni cayaca juzgar ca la? ora guiníʼcabe xipeʼ castigu guicaa binni ca, qué zasaca diʼ ni guiníʼcabe. Ne ora chúʼcabe tobi si para quíxhecabe xi gaca binni ca, rusihuínnini zándaca guníʼ stiidxacabe para ganinácabe laabe

Cani qué ñaca jneza ora guca juzgar Jesús

▪ Qué ninabaʼ justicia ñuu tu nusiene xi bíʼnibe ne laaca qué ninabaʼ ñuu tuuxa niníʼ pur laabe

▪ Nin ti juez qué ñuu pur laabe, guiracaʼ bicaalucaʼ laabe

▪ Ca sacerdote que biyúbicaʼ testigu ni gusiguii para guihuinni nápabe donda ti guuticaʼ laabe

▪ Biʼniʼ juzgárcabe laabe huaxhinni ne qué nudiicabe lugar ñuu stale binni

▪ Dxica bizulú biʼniʼ juzgárcabe laabe, dxíqueca bilúxeni ne zeedayuba ti saa

▪ Guirutiʼ qué nindisaʼ falsu luguiabe ante guinaazecabe laabe

▪ Qué nuyúbicabe ñánnacabe pa dxandíʼ caniʼbe mal de Dios ra guniʼbe laabe nga Mesías

▪ Ora yenécabe laabe nezalú Pilatu, maʼ gadxé ni bigaanicabe íquebe

▪ Cadi dxandíʼ diʼ guiráʼ donda ni bigaanicabe íquebe

▪ Pilatu guníʼ qué gápabe donda, peru neca zaqué biʼniʼ mandar gátibe

[Cuadru ni zeeda lu yaza 22]

Ti dxiiñaʼ nabé naroʼbaʼ

Ante guiníʼ ca binni ni zeʼ de testigu xiixa ra chiguihuinni pa zati tuuxa binni ni cayaca juzgar la? ca juez judíu que rábicaʼ cani zeʼ de testigu que caadxi cosa ni rusihuinni pabiáʼ risaca nga xquendanabani binni.

«Cadi laasitu quíxhetu ni guiniʼtu, ne cadi gácani ni binadiágatu caníʼ binni, o ni guníʼ xcaadxi binni ni biʼyaʼ xi guca, o ni guiníʼ tuuxa binni ni runibiáʼcabe casi tuuxa ni qué rusiguii. Ñee maʼ nánnatu zuyúbidu modo gánnadu pa dxandíʼ ni caniʼtu la? Cadi guiaandaʼ laatu gadxé modo raca juzgar ti binni purtiʼ malu laa ne gadxé modo raca juzgar ti binni pur bueltu. Ora runi juzgárcabe tuuxa pur bueltu la? testigu ca randa riguixe donda stiʼ binni ca né bueltu, ne zacá maʼ zanda gundaacabe laabe. Ne ora runi juzgárcabe tuuxa binni malu la? ique testigu ca nga riguiʼbaʼ donda stiʼ binni ni cayaca juzgar ca pa gueeda gati ne donda stiʼ ca xiiñiʼ dede dxi guiluxe guidxilayú.» (El Talmud de Babilonia, “Sanedrín”, 37a.)

Ora guihuinni napa binni ni cayaca juzgar ca donda la? né ca binni ni zeʼ de testigu ca nga ziuucaʼ ora guuticabe laabe (Levítico 24:14; Deuteronomio 17:6, 7).