Yanna huaxa maʼ qué ridxíbicabe

GARY ne Karen guníʼ íquecaʼ maʼ chiguinitilú Guidxilayú, ngue runi yebíʼcabe ndaaniʼ guiʼxhiʼ dxi maʼ ziluxe ca iza ni bizulú lu 1970. Guníʼ íquecabe caquiiñeʼ guiziidicabe guibánicabe stubisícabe para guilácabe ora gácani.

Cumu zaqué nga guníʼ íquecabe la? guzíʼcabe libru, guyécabe cursu ne seminariu ne gunabadiidxacabe stale binni xiruʼ zanda gúnicabe. Bidxiibacabe stale verdura ne 50 yaga cuananaxhi ni qué risoopeʼ lu tindaa layú, bitópacabe stale biidxiʼ ne biyúbicabe guiibaʼ ni zanda iquiiñecabe para gúnicabe dxiiñaʼ. Biziidicabe gúnicabe dxiiñaʼ lu layú ne laaca biziidicabe ximodo gápacabe ni gudii lu layú que para guindaacani jma ne biziidirúcabe xcaadxi cosa. ¡Dede bisiidiʼ ti xhamígacabe laacabe guuticabe maniʼ ne gúnicabe beela stícame uriadu! Ne pa málasi gueeda guirá guendaró stícabe la? biziidiʼ Karen gunibiáʼ xi yagahuiiniʼ ne xcu yaga ni nuu ndaaniʼ guiʼxhiʼ zanda gócabe. Laaca biziidiʼ Gary ximodo zanda iquiiñe xubaʼ para guni gasolina, guni ludé ne laaca biziidiʼ ximodo cuʼ guiráʼ ni iquiiñeʼ ndaaniʼ ti yoo ti cadi chiyúbini sti ladu.

Karen guníʼ: «Guiráʼ ca cosa malu cayaca tiempu nabánidu que bicaacani naa guiníʼ iqueʼ maʼ chiguinitilú guirá binni ni nabani tiempu que». Zaqueca nga guníʼ ique Gary, laa guníʼ sicaríʼ: «Cásica biʼniʼ xcaadxi binni biaʼca naa, laaca guyuaaʼ lade ti grupu ni cucaalú para cuezadxí guendaridinde ni cayaca Vietnam, para cadi gúnicabe menu binni de sti raza ne para gusaana gobiernu de guniná binni. Peru qué nindaa bidieeʼ  cuenta pur gana si ni cayúnidu que. Pur modo nuu ca tiempu que rabeʼ zadxiña dxi zuutisaa binni laca laa».

De raqué guníʼ Gary: «Ti gueelaʼ dxi qué gapa stale ni guneʼ gucuaaʼ ti Biblia ne biindaʼ guidubi naca Nuevo Testamento. Biindaʼ guidubi ni sti biaje stapa gueelaʼ gudiʼdiʼ que peru bineʼ ni chaahuidugá. Ora birá gueelaʼ sti dxi, maʼ lu gaayuʼ gubidxa de cayuundaʼ ni, gudxeʼ Karen: “Maʼ nuunu lu ca últimu dxi. Maʼ cadi cayaadxaʼ diʼ stale tiempu para gusiá Dios Guidxilayú riʼ, nga runi naquiiñeʼ guyúbinu ca binni ni zalá ne guidáʼgunu laacaʼ”». Nagueendaca bizulú biyúbicabe ca binni que ndaaniʼ gadxé gadxé religión.

Qué nindaa de ngue bixhidxináʼ ti testigu stiʼ Jiobá ra puertaʼ lídxicabe, ne bizulú biindacabe Biblia. Karen guníʼ: «Guizáʼ nayecheʼ guyuaaʼ ora bidxelaʼ tuuxa ni gusiene naa xi rusiidiʼ Stiidxaʼ Dios. Maʼ xadxí de rapa gana gannaʼ xii nga chigaca ora riníʼ binni zanitilú guidxilayú ne yanna maʼ nannaʼ ni. Yanna huaxa maʼ nannaʼ zadxiña dxi zaca chaahuiʼ ca cosa ca. Laaca bineʼ sentir nuaa jma gaxha de Jiobá Dios, Bixhózenu ni nuu guibáʼ, ni bizáʼ guibáʼ ne Guidxilayú».

Gary guníʼ: «Yanna maʼ nannaʼ xi pur nabaneʼ. Cumu guizáʼ riuuladxeʼ cani zeeda lu Biblia la? qué nusaanaʼ de ñuundaʼ ni. Ora biindaʼ ca diidxaʼ riguixhená zeeda luni ne biiyaʼ cayaca ni nácani, bidieeʼ cuenta maʼ cadi candaa diʼ para guni chaahuiʼ Dios ca cosa ca. Rietenalaʼdxeʼ guníʼ iqueʼ sicaríʼ: “Ni jma risaca nga guibani binni modo riuulaʼdxiʼ Dios, ne cadi chuʼ listu para ora guidxiña dxi guinitilú guidxilayú”». Ora gúnnacabe xii nga ca cosa galán ni chigaca lu Guidxilayú riʼ, bisaana de guidxíbicabe ora gunadiágacabe zanitilú ni. Bidiicabe cuenta maʼ cadi candaa diʼ para cuee Dios ca guendanagana napa binni ne guni Guidxilayú riʼ ti paraísu.

Ximodo riníʼ íquecabe yanna, despué de maʼ gudiʼdiʼ veinticinco iza yaʼ. Karen guníʼ: «Cada dxi tiidiʼ jma ziyannaxhieeʼ Jiobá ne jma ziyapa fe laabe. Ne laaca runeʼ stipa para gacaniáʼ xcaadxi binni para gunibiaʼcaʼ ne gannaxhiicaʼ laabe. Naa ne Gary racanésaadu para chuʼ familia stidu naguidxi ne chuʼdu tobi si ora maʼ cayúnidu xhiiñaʼ Dios. Rúnidu stipa para quixhe chaahuidu modo nabánidu ne gápadu ni caquiiñesidu. Zacá jma randa rápadu tiempu para gacanedu binni».

Yanna Gary guníʼ sicaríʼ: «Guiráʼ dxi rinabaʼ Dios gueeda Reinu stiʼ ne cuee guiráʼ yuubaʼ cadiʼdiʼ millón de binni. Guiráʼ biaje chigucheecheʼ ca diidxaʼ nacubi ne galán ca ra nuu ca vecinu stinneʼ, rinabaʼ Jiobá gudii stipa naa para uguaaʼ gana neca tobi de laacaʼ ora guundaniáʼ laacaʼ ni cá lu Biblia. Ne qué huasaana de gacanebe naa lu veinticinco iza ni maʼ gudiʼdiʼ ca. Neca nánnadu maʼ cadi candaa diʼ para guchaa stale cosa lu Guidxilayú riʼ la? naa ne Karen maʼ qué ridxíbididu yanna» (Mateo 6:9, 10; 2 Pedro 3:11, 12).

[Dibuju/foto ni zeeda lu yaza 9]

Gary ne Karen riquiiñecaʼ ni rusiidiʼ Biblia para gábicaʼ binni zadxiña dxi gaca chaahuiʼ Guidxilayú riʼ