Cani bisiidiʼ Jesús

Gunáʼ nga religión ni dxandíʼ

Ñee jneza ruuyaʼ Dios guiráʼ ca religión ca la?

▪ Guizáʼ biuubaʼ ladxidóʼ Jesús ora biiyaʼ modo cusiguii ca xaíque yuʼduʼ que binni. Ngue runi gudixhenabe ca xpínnibe de «ca profeta ni [...] ruluíʼ nadóʼ [...] casi dendxuʼ, peru ndaani ladxidóʼ[caʼ] naduxhu[caʼ] casi gueuʼ» (Mateo 7:15). Guiráʼ binni nanna nuu tu riquiiñeʼ ca religión ca para guni cosa malu.

Sicaríʼ guníʼ Jesús ti biaje ora biʼniʼ orarbe Dios: «Dxandíʼ stiidxa luʼ» (Juan 17:17). Racá ridúʼyanu cadi jneza diʼ ruuyaʼ Dios ca religión ni rusiidiʼ xiixa ni cadi zeeda lu Biblia. Ngue runi, ora caniʼbe de ca xaíque yuʼduʼ ni qué rusiidiʼ ni dxandíʼ la? gúdxibe laacaʼ ca diidxaʼ ni guníʼ Dios riʼ: «Pur gana si rusisaca cabe naa, purti de laasi cabe riale ni rusiidi cabe» (Mateo 15:9).

Ñee nuu ti religión ni dxandíʼ la?

▪ Dxi caniʼné Jesús ti gunaa de Samaria, gúdxibe laa ca diidxaʼ riʼ: «Laatu rusisaca tu ni qué runibiáʼ tu». Ne cumu nanna Jesús cadi jneza guiráʼ ni riziidiʼ ca samaritanu que ndaaniʼ religión sticaʼ la? gúdxibe gunaa que: «Cani dxandí racalaʼdxi usisaca Dios la? naquiiñe guni ni modo racalaʼdxi be, ne guni ni de idubi ladxidóʼ, purti ca nga nga cuyubi Dios, cani usisaca laa zacá» (Juan 4:22, 23). Nga runi, pa nuu binni ni dxandíʼ runi adorar Dios modo racaláʼdxibe la? zanda guininu laaca nuu ti religión ni dxandíʼ.

Ne nga nga religión ni bisiidiʼ Jesús. Laapebe guniʼbe: «Qué rune gasti de naa siaʼ sínuque rinié ni bisiidi Bixhoze naa» (Juan 8:28). Ngue runi guniʼbe: «Iruti zie ra nuu Bixhoze pa cadi pur naa» (Juan 14:6). Yanna, pa ti neza si nga nuu para guidxiña binni ra nuu Bixhózebe la? laaca ti religión si ni dxandíʼ nga naquiiñeʼ chuʼ.

 Ximodo gánnanu gunáʼ nga religión ni dxandíʼ

▪ Cani dxandíʼ xpinni Cristu rinándacaʼ ejemplu stiʼ Jesús lu guidapa cosa ni chiguzéʼtenu riʼ.

1. Sicaríʼ gudxi Jesucristu Jiobá: «Ma bisiideʼ laacabe tu laluʼ» (Juan 17:26, NM). Cani dxandíʼ xpinni Cristu laaca riquiiñecaʼ lá Dios.

2. Jesús guníʼ de Reinu stiʼ Dios ne biʼniʼ mandarbe ca xpínnibe checaʼ de yoo pur yoo para gusiidicaʼ binni de laani. Gúdxibe laacaʼ: «Ne guidxi tica chuʼ tu, pa guidxi huiini o pa guidxi roʼ, lainaba diidxa ralidxi tuuxa ni nachaʼhuiʼ, ne laguiaana ralidxi be». Ne despué gúdxibe laacaʼ: «Laché irá xixé guidxi, lachiusiidi irá xixé binni sa nanda naa» (Mateo 10:7, 11; 28:19). Ca dxi stinu riʼ, laaca runibiáʼ binni tuu nga cani dxandíʼ xpinni Cristu purtiʼ laaca cayúnicaʼ dxiiñaʼ riʼ.

3. Qué liica ñuu Jesús lu política. Ca discípulo stibe laaca qué ñúnicaʼ ni, purtiʼ guniʼbe: «Cadi zinanda cabe guidxilayú, casi naa laca cadi zinanda guidxilayú» (Juan 17:14). Nga runi, cani dxandíʼ xpinni Cristu la? qué riuudicaʼ lu política.

4. Jesús biʼniʼ stale stipa pur gacané binni purtiʼ nadxiibe laacaʼ. Ne bisietenaláʼdxibe ca discípulo stibe: «Pa ganaxhii saa tu zacá la? zanna binni xpinne laatu» (Juan 13:35). Textu riʼ cayabi laanu nadxiisaa cani dxandíʼ xpinni Cristu ne qué riuucaʼ lu guendaridinde stiʼ ca guidxi ca.

Ximodo racané religión ni dxandíʼ ca binni

▪ Para ganda guni binni ni rusiidiʼ religión ni dxandíʼ ca la? primeru naquiiñeʼ gunibiáʼ chaahuicaʼ Dios. Guiráʼ ni guiziidicabe zacaneni laacabe guibánicabe jma galán ne gannaxhiicabe Jiobá jma. Ne maʼ guniʼbe zacaa guiráʼ cani gannaxhii laabe ti guendanabani ni qué zaluxe. Nga runi guníʼ Jesús: «Zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).

[Coupon on page 17]

Pa riuuláʼdxiluʼ gánnaluʼ jma de laani la? biiyaʼ capítulo 15 stiʼ libru riʼ, ni biʼniʼ ca testigu stiʼ Jiobá.

[Dibuju/foto ni zeeda lu yaza 17]

Xipeʼ ndiʼ cusiidiʼ Biblia

[Dibuju/foto ni zeeda lu yaza 16]

«Laguuya gá laatu ne ca profeta ni na zeeda de Dios peru cadi dxandí ni, purti casi guiuu cabe laatu ruluíʼ nadóʼ cabe casi dendxuʼ, peru ndaani ladxidóʼ cabe naduxhu cabe casi gueuʼ.» (Mateo 7:15)