BIBLIA na nabé stale yaga guyuu caadxi lugar lu Layú ni Bizabiruaa Dios gudii ca israelita (1 Reyes 10:27; Josué 17:15, 18). Peru ca dxi stinu riʼ, maʼ gastiʼ stale de ca yaga que ne pur nga stale binni riníʼ ique pa dxandíʼ ni rieeteʼ lu Biblia.

Libru Life in Biblical Israel (Modo bibani ca israelita tiempu gucuá Biblia) na: «jma stale yaga guyuu ndaaniʼ guidxi Israel dxiqué que biaʼ nuu yanna». Lu ca dani que rigaa yaga casi pino de Alepo (Pinus halepensis), coscoja de Palestina (Quercus calliprinos) ne terebinto (Pistacia palaestina). Ne Sefelá, ti lugar ni riaana gaxha de cordillera central ne costa mediterránea, nabé guyuu stale sicómoro (Ficus sycomorus).

Libru ni láʼ Plants of the Bible (Ca yaga ni rieeteʼ lu Biblia) na chupa chonna de ca lugar stiʼ Israel maʼ birá ca yaga guyuu dxiqué. Xiñee birá cani yaʼ. Libru que na gúcani chaahuiʼ chaahuiʼ: «Bisaba binni ca yaga que para gápacaʼ paraa gúnicaʼ dxiiñaʼ, para gudxíʼbacabe guixi gáʼ, cueecabe ni iquiiñecabe para gucuícabe lídxicabe ne para chuʼ ludé».