1. Ximodo riquiiñenu oración de padrenuestro ora rucheechenu diidxaʼ.

STALE binni nanna oración de padrenuestro (Mateo 6:9-13). Ora rucheeche ca testigu stiʼ Jiobá diidxaʼ gatigá riniʼcaʼ de oración riʼ. Riquiiñenu ca diidxaʼ «biseendaʼ reinu stiluʼ» para gusíʼdinu binni Reinu ca nga gobiernu stiʼ Dios ne maʼ cadi candaa zúnini Guidxilayú riʼ ti paraísu. Laaca riquiiñenu ca diidxaʼ «guisácape’ laluʼ» para gusihuínninu napa Dios lá ne naquiiñeʼ guni respetarnu ni purtiʼ nayá ni (Mateo 6:9, TNM).

2. Ximodo nánnanu qué racalaʼdxiʼ Jesús guininu ngueca ca ngueca ora guni orarnu.

² Stale binni riníʼ de memoria oración de padrenuestro ora runi orarcaʼ Dios. Peru, ñee zacá nga gucalaʼdxiʼ Jesús ñúninu la? Coʼ. Laabe guniʼbe: «Ora ma caníʼ né tu [Dios] la? cadi utale tu diidxa [o cadi guiniʼtu ngueca ca ngueca, TNM]» (Mateo 6:7). Ti dxi bisiidiʼ Jesús ca discípulo stiʼ guni orarcaʼ ne bizeetebe oración de padrenuestro, peru bíʼnibe ni né gadxé gadxé diidxaʼ (Lucas 11:1-4). Ndiʼ rusihuinni  bisiidiʼ Jesús oración riʼ para gánnanu xii nga ca cosa ni naquiiñeʼ guinábanu ora guni orarnu.

3. Xii nga ca guendarinabadiidxaʼ zanda guiníʼ íqueluʼ laga cayuundaluʼ ca tema riʼ.

³ Lu tema riʼ ne lu stobi ca zaninu de oración de padrenuestro. Ora maʼ cayuundaluʼ ca tema riʼ guníʼ ique ca guendarinabadiidxaʼ riʼ: «Ximodo racané oración de padrenuestro naa gaca oración stinneʼ jma galán yaʼ. Ñee runeʼ guiráʼ ni rieeteʼ lu oración de padrenuestro la?».

4. 1) Xi rusietenalaʼdxiʼ diidxaʼ «Bixhoze du» laanu yaʼ. 2) Xiñee zanda guiníʼ cani chiguibani lu Guidxilayú Jiobá nga bixhózecaʼ.

⁴ Bizulú Jesús oración stiʼ sicaríʼ: «Bixhoze du». Ndiʼ rusietenalaʼdxiʼ laanu Jiobá nga bixhoze guiráʼ ca bíʼchinu ne bizáʼnanu ni nuu lu Guidxilayú (1 Pedro 2:17). Maʼ gulí Jiobá chupa chonna xpinni Cristu para guibánicaʼ guibáʼ. Maʼ gucuaabe laacaʼ casi xiiñibe. Nga runi laabe nga bixhózecaʼ (Romanos 8:15-17). Peru, xi zanda guininu de cani chiguibani lu Guidxilayú riʼ yaʼ. Xiñee zanda guininu laaca bixhózecabe Jiobá yaʼ. Purtiʼ Jiobá rudii laacabe guendanabani ne guiráʼ ni riquiiñecabe. Ne despué, ora maʼ gácacabe binni sin donda ne tídicabe últimu prueba, laaca zácacabe xiiñiʼ Dios (Romanos 8:21; Apocalipsis 20:7, 8).

5, 6. 1) Xii nga ti cosa ni jma galán ni zanda gusigaʼdeʼ binni ca xiiñiʼ. 2) Xi naquiiñeʼ guni cada xiiñiʼ binni né ni raʼdeʼ. (Biiyaʼ foto ni zeeda ra ruzulú tema riʼ.)

⁵ Ca xpinni Cristu zanda gusigáʼdecaʼ ca xiiñicaʼ ti cosa nabé risaca. Xi laani yaʼ. Gusiidicabe laacaʼ Jiobá nga bixhózecaʼ ni nuu guibáʼ ne gusiidicabe laacaʼ guni orarcaʼ. Ti superintendente de Sudáfrica bizeeteʼ dede dxi gule ca xiiñidxaapaʼ runi orarné laacabe guiráʼ gueelaʼ ora nuu yoo. Laacabe nácabe qué rietenaláʼdxicabe xipeʼ diidxaʼ guníʼ bixhózecabe ora maʼ cayuni orar. Peru rietenaláʼdxicabe pabiáʼ ratadxí ladxidóʼcabe ora runi orarné bixhózecabe laacabe. Cásipeʼ gunda bíʼnicabe oración stícabe, gudxi bixhózecabe laacabe guni orárcabe nadipaʼ. Zacá gunda binadiágabe ximodo rabi ca xiiñibe Jiobá ni riníʼ íquecaʼ ne ni runi sentircaʼ. Ne zacá gunda gúnnabe xipeʼ nga runi sentir ca xiiñibe, ti ganda gacanebe laacaʼ cuʼcaʼ chupa chonna cosa risaca ni rieeteʼ lu oración de padrenuestro lu oración sticaʼ ne guni orarcaʼ jma galán.

⁶ Ra maʼ ziniisi ca xiiñidxaapaʼ hermanu riʼ, jma gaxha guyuucaʼ de Jiobá. Yanna maʼ bichaganácabe ne nabé galán cayuninécabe xheelacabe xhiiñaʼ Jiobá. Ni zanda gusigaʼdeʼ binni xiiñiʼ ne ni jma galán nga gusiidiʼ laacabe dxandíʼ nuu Jiobá ne zanda gaca xhamígucabe laa. Dxandíʼ, cada xiiñiʼ binni nga naquiiñeʼ guni stipa pur cadi gusaana de gaca xhamigu Jiobá (Salmo 5:11, 12; 91:14).

7. 1) Xi ndaayaʼ nápanu laanu casi testigu stiʼ Jiobá. 2) Ximodo rusihuínninu rusisácanu ndaayaʼ riʼ.

⁷ Laanu ca testigu stiʼ Jiobá nápanu ndaayaʼ de gánnanu lá Dios ne chinenu ni (Hechos 15:14; Isaías 43:10). Lu oración de padrenuestro, bisiidiʼ Jesús guinábanu «guisácape’» lá Jiobá. Ndiʼ riníʼ racaláʼdxinu gaca labe nayá. Ximodo rusihuínninu risaca para laanu  gánnanu lá Jiobá ne chinenu ni yaʼ. Ra guinábanu laabe gacanebe laanu para cadi guininu o gúninu xiixa ni guni biidiʼ xlabe. Cadi gácanu casi chupa chonna xpinni Cristu de primé siglu purtiʼ bisiidicaʼ ti cosa ne bíʼnicaʼ sti cosa. Apóstol Pablu bicaa, pur laacabe guníʼ binni mal de Dios (Romanos 2:21-24).

8, 9. Ximodo gucané Jiobá ti hermana ni biʼniʼ stipa pur gusisaca labe o xlabe.

⁸ Laanu ca xpinni Cristu rúninu stipa pur gusisácanu lá Jiobá. Guzéʼtenu ni bizaaca ti hermana de Noruega ni biaana viuda né ti hombrehuiiniʼ stiʼ de chupa iza. Laabe guniʼbe: «Nabé nagana guca ca dxi que para naa. Guiráʼ dxi ne cada ratu runeʼ orar Dios para gudii stipa naa ne gacané naa gucueezaʼ cani runeʼ sentir. Qué ñacalaʼdxeʼ ñuni burla Binidxabaʼ Jiobá pur xiixa cosa ni cadi jneza ñuneʼ. Ne laaca qué ñacalaʼdxeʼ nucheeniáʼ Dios. Ni gucalaʼdxeʼ nga gusisacaʼ xlabe ne guʼyaʼ xiiñeʼ bixhoze ndaaniʼ Paraísu» (Proverbios 27:11).

⁹ Rihuinni dxíchica runi hermana riʼ stipa pur gusisaca lá Jiobá. Yanna, ximodo gucané Jiobá laabe yaʼ. Cumu guluu ca hermanu gana laabe la? gunda bicueezabe cani runi sentirbe ne quixhe íquebe gúnibe ni jneza. Gaayuʼ iza despué bichaganabe ti binnigola de congregación. Yanna maʼ napa xiiñibe 20 iza ne maʼ naca ti Testigu ni maʼ guyuunisa. Hermana riʼ na: «Rudieeʼ xquíxepeʼ xheelaʼ purtiʼ gucané naa bisiniiseʼ xiiñeʼ».

10. Ximodo zusisaca Jiobá lá.

¹⁰ Zusisaca Jiobá xlá ora gunduuxeʼ guiráʼ cani nanalaʼdxiʼ laa ne cani rucaalú laabe casi xaíque stiʼ. Biblia na: «Ne dxandipeʼ zuneʼ juzgar laabe, ne guendahuará ni qué rianda ne rini; ne ti nisaguié ni hundaahua ne granizu, zusabaʼ guí ne azufre luguiabe ne luguiáʼ ca xpínnibe ne luguiáʼ guiráʼ ca guidxi ni chuʼné laabe. Dxandipeʼ zusihuinneʼ guendanandxóʼ stinneʼ ne zusisacaʼ naa ne zunibiáʼ stale guidxi naa; ne napa xidé gánnacabe naa nga Jiobá» (Ezequiel 38:22, 23). De racá, guiráʼ binni zeeda gácacaʼ binni sin donda. Ne guiráʼ cani guibani guibáʼ ne lu Guidxilayú zuni adorarcaʼ Jiobá ne zusisácabe labe o xlabe. Zaca Jiobá «xaíque sti irá ni», o, zuni mandarbe guiráʼ ni nuu guibáʼ ne Guidxilayú (1 Corintios 15:28).

11, 12. Xi biʼniʼ Jiobá lu iza 1876.

¹¹ Ante guibiguetaʼ Jesús guibáʼ, gunabadiidxaʼ ca discípulo stibe laabe pa mayaca guni mandar Reinu stiʼ Dios. Peru Jesús gudxi laacabe cadi óraque diʼ nga gánnacabe ni ne quixhe íquecabe gucheechecabe diidxaʼ (biindaʼ Hechos 1:6-8). Ne laaca bisiidibe laacaʼ guinábacaʼ gueeda Reinu stiʼ Dios ne gúdxibe laacaʼ gatanacaʼ ti gudiicaʼ cuenta padxí guni mandarbe. Nga runi cadi cusaana de guinábanu Jiobá gueeda Reinu stiʼ.

¹² Lu iza 1876, gucané Jiobá ca xpinni guiénecaʼ lu iza 1914 bizulú biʼniʼ mandar Jesús guibáʼ. Ximodo gucanebe laacaʼ para guiénecaʼ ni yaʼ. Lu iza que hermanu Russell bicaa tema «Padxí guiluxe tiempu stiʼ ca gentil». Lu tema ca rieeteʼ de profecía stiʼ Daniel ni caníʼ de «gadxe tiempu» laaca laani  nga profecía ni guníʼ Jesús de «dxi udii Dios lugar» ca guidxi roʼ (Daniel 4:16; Lucas 21:24). Tema que bisiene lu iza 1914 biluxe ca tiempu que. *

13. 1) Xi bizaaca lu iza 1914. 2) Xi rusihuinni guiráʼ ni cayaca lu Guidxilayú dede lu iza 1914.

¹³ Lu iza 1914, bizulú ti guerra Europa ne despué gúcani lu guidubi Guidxilayú. Stale binni guti de guendarindaana. Lu iza 1918, ti idxagá nabé malu biiti jma binni que biaʼ biiti guerra que. Guiráʼ ca cosa riʼ nga tobi de ca «seña» ni guníʼ Jesús zazaaca (Mateo 24:3-8; Lucas 21:10, 11). Seña riʼ bisihuinni bizulú biʼniʼ mandar Jesús lu iza 1914 guibáʼ. Iza que «biree [Jesús] zitixhe dxí cani ucaa lú laa» (Apocalipsis 6:2). Jesús gulee Binidxabaʼ ne ca demonio stiʼ guibáʼ ne bilaabe laacaʼ lu Guidxilayú. Despué de ngue bizulú guca ni na profecía riʼ: «Lagapa gá si laatu cani nuu ndaani guidxilayú ne ndaani nisadóʼ, purti ma biete binidxaba ra nuu tu ne cayó dí laa ti nanna ma huaxiéʼ dxi napa» (Apocalipsis 12:7-12).

14. 1) Xiñee qué rusaana de guinábanu gueeda Reinu stiʼ Dios. 2) Xi ti dxiiñaʼ nabé risaca cadi naquiiñeʼ gusaana de gúninu.

¹⁴ Profecía ni zeeda lu Apocalipsis 12 racané laanu guiénenu xiñee  bizulú guca jma cosa malu lu Guidxilayú dxi bizulú biʼniʼ mandar Jesús. Neca maʼ cayuni mandarbe guibáʼ, Binidxabaʼ nga cayuni mandar Guidxilayú riʼ. Peru maʼ cadi candaa, zunitilú Jesús guiráʼ cosa malu riʼ, ne zacá zuni ganarbe. Nga runi qué rusaana de guinábanu gueeda Reinu stiʼ Dios. Ne qué zusaana de gúninu ti dxiiñaʼ nabé risaca. Xi laani yaʼ. Guinínenu binni de Reinu stiʼ Dios. Ora rucheechenu diidxaʼ rúninu ni na ca diidxaʼ guníʼ Jesús riʼ: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14).

15, 16. Xiñee cadi naquiiñeʼ si guinábanu gaca ni na Dios lu Guidxilayú riʼ.

¹⁵ Raca jma de 6,000 iza, guca ni na Dios lu Guidxilayú. O guca ni riuuláʼdxibe gaca. Nga runi guniʼbe «nabé galán» guiráʼ cani bíʼnibe (Génesis 1:31). Peru bidxiideche Binidxabaʼ laabe ne dede dxiqué stale binni maʼ qué ruzuubaʼ stiidxaʼ Jiobá. Neca zacá, ca dxi riʼ nuu jma de xhono millón de xpínnibe. Laacabe nánnacabe cadi naquiiñeʼ si guinábacabe gaca ni na Dios lu Guidxilayú riʼ. Nga runi, rúnicabe stipa pur gúnicabe ni nabe. Rúnicabe stipa pur chuulaʼdxiʼ Dios ni rúnicabe ne riniʼnécabe sti binni de Reinu riʼ né stale gana.

¹⁶ Guidúʼyanu ni bizaaca ti misionera de 80 iza ni cayuni xhiiñaʼ Dios África ne guyuunisa lu iza 1948. Laabe nabe: «Gatigá rinabaʼ Dios gacané guiráʼ binni ni nayá ladxidóʼ gunibiáʼ laabe ante gueedanebe dxi stibe. Ne ora rinieniáʼ tuuxa de Dios, rinabaʼ Jiobá gudii naa guendabiaaniʼ ti ganda chindayaʼ ndaaniʼ ladxidóʼ ca binni ca. Laaca rinabaʼ laabe gacanebe guiráʼ cani cayuni xhiiñaʼ Dios para gápacaʼ cani maʼ caziidiʼ de stiidxabe». Hermana riʼ maʼ gucané stale binni gunibiáʼ Jiobá. Ñee runibiaʼluʼ tuuxa hermanu ni maʼ nagola ni runi xhiiñaʼ Jiobá né stale gana la? (Biindaʼ Filipenses 2:17.)

17. Xi riníʼ íqueluʼ de cani chiguni Jiobá despué.

¹⁷ Laanu ca xpinni Dios qué zusaana de guinábanu gaca ni nabe lu Guidxilayú riʼ dede ora gunitilube ca xhenemígube. Despué, zaca Guidxilayú riʼ ti paraísu ne mil de millón de gueʼtuʼ zabánicaʼ sti biaje. Jesús guníʼ: «[Z]una diaga irá cani nuu ndaani baʼ stidxi Xiiñi be, ne zaree caʼ» (Juan 5:28, 29). Bixuiʼlú pabiáʼ nayecheʼ ziuu cani guibani binnilidxi sti biaje. «Zuchaa [Dios] nisa riete» lunu (Apocalipsis 21:4). Dxandíʼ, jma nga stale binni ni zabani sti biaje qué niziidicaʼ ni dxandíʼ de Jiobá ne Jesús. Nga runi Biblia na «cadi nachaʼhuiʼ[cabe]». Ti ndaayaʼ nga gusíʼdinu laacabe gúnicabe ni na Dios ti ganda gápacabe ti guendanabani ni qué zaluxe (Hechos 24:15; Juan 17:3).

18. Xii nga ni jmapeʼ caquiiñeʼ binni guidxilayú.

¹⁸ Maʼ cadi candaa zuni Jiobá guionnaʼ cosa ni rinábanu lu oración de padrenuestro: gueeda Reinu stibe, zusisaca Reinu ca labe o xlabe ne tobi si zuni adorar guiráʼ ni nuu guibáʼ ne Guidxilayú laabe. Zacá zudii Dios ni jmapeʼ caquiiñeʼ binni guidxilayú. Lu sti tema ca zaninu de xcaadxi cosa ni bisiidiʼ Jesús laanu guinábanu lu oración de padrenuestro.