Lu iza 1951 bizeeteʼ revista La Atalaya 15 stiʼ mayo nuu xi zeeda gaca ca cosa, binni ne ca historia ni ruzeeteʼ Biblia. Dxiqué bieeteʼ Jefté, Job ne Rebeca zeeda gácacaʼ ca xpinni Cristu ni bibí. Laaca bieeteʼ zeeda gaca Débora ne Rahab «jma binni» ni rieeteʼ lu Apocalipsis 7:9. Peru ca últimu iza riʼ maʼ qué huasiénedidu xiixa casi laacani. Xiñee yaʼ.

Biblia ruzeeteʼ de caadxi binni ni nuu xi zeeda gácacaʼ despué. Casi lu Gálatas 4:21-31 bizeeteʼ Pablu historia stiʼ chupa gunaa ne bisiénebe xi riníʼ ni. Primé gunaa que nga Agar, esclava stiʼ Abrahán. Guiropa gunaa que nga Sara, xheelaʼ Abrahán. Pablu na zeeda gaca Agar guidxi Israel. Ne bisiénebe zeeda gaca Sara ca xpinni Jiobá ni nuu guibáʼ, cani zeeda gaca xheelaʼ Jiobá. Laaca bisiene Pablu Melquisedec nga zeeda gaca Jesús (Hebreos 6:20; 7:1-3). Ne laaca guniʼbe profeta Isaías ne ca xiiñiʼ zeeda gácacaʼ Jesús ne ca xpinni ni bibí pur espíritu (Hebreos 2:13, 14). Xiñee nánnanu jneza ca diidxaʼ bicaa Pablu yaʼ. Purtiʼ Jiobá biquiiñeʼ espíritu santu stiʼ para bicaabe ni.

Nuu tiru ruzeeteʼ Biblia xi zeeda gaca tuuxa binni, peru cadi pur nga guininu laaca nuu xi riníʼ guiráʼ ni bizaaca lu xquendanabánibe. Casi bizéʼtenu que, guníʼ Pablu Melquisedec nga zeeda gaca Jesús. Peru ti biaje yené Melquisedec pan ne vinu ra nuu Abrahán dxi biʼniʼ ganar tapa rey. Ñee nuu xi riníʼ ni biʼniʼ Melquisedec ca la? Qué nusiene diʼ Pablu gastiʼ de laani. Nga runi, cadi galán diʼ guyúbinu xi riníʼ ni pa cadi cuzeeteʼ Biblia xiixa de laani (Génesis 14:1, 18).

 Despué de guti Jesús, stale iza bisiidiʼ caadxi religioso nuu xi riníʼ guiráʼ ni zeeda lu Biblia, peru cadi jneza diʼ ni. Ti enciclopedia nabé risaca na biyubi ca xaíque yuʼduʼ que xi riníʼ guiráʼ ni zeeda lu Biblia. Guníʼ íquecabe dede ca cosa ni jma nahuiiniʼ ni rieeteʼ lu Biblia nuu xi riníʼ cani. Guzéʼtenu ti ejemplu. Biblia ruzeeteʼ despué de biasa Jesús lade gueʼtuʼ bihuínnibe nezalú ca discípulo stibe, dxi que gunaazecabe 153 benda. Enciclopedia que na bicaa ca religioso que nuu xi riníʼ 153 benda gunaazeʼ ca discípulo que.

Sti hombre religioso de dxiqué bicaa de sti historia ni zeeda lu Biblia ne bisiénebe nuu xi zeeda gaca ni despué. Laani nga dxi biquiiñeʼ Jesús gaayuʼ pan de cebada ne chupa benda para bidii ni gudó 5,000 hombre. Hombre que na gaayuʼ pan que zeeda gaca cani gaayuʼ libru ni zeeda ra ruzulú Biblia. Laabe guniʼbe jma risaca para binni trigu que cebada, ngue runi bisiidibe zeeda gaca trigu ca Nuevo Testamento purtiʼ jma risaca ni que Antiguo Testamento ni zeeda gaca casi cebada. Laaca guniʼbe guiropaʼ benda que zeeda gaca ti rey ne ti sacerdote. Sti hombre religioso guníʼ xi riníʼ historia stiʼ Jacob dxi guzíʼ né ti bladuʼ lenteja derechu ni napa Esaú pur naca baʼduʼ lugola. Cumu naxiñáʼ guendaró que la? bisiénebe zeeda gaca historia que dxi bixhii Jesús rini stiʼ para ganda cheʼ binni guibáʼ.

Peru cadi jneza guiráʼ ni rusiénecabe ca, purtiʼ pa cadi cuzeeteʼ Biblia xi zeeda gaca xiixa la? qué zanda diʼ gánnanu pa dxandíʼ ni nácabe ca. Yanna, xi naquiiñeʼ gúninu yaʼ. Ni jma jneza gúninu nga pa cusiene Biblia xi riníʼ xiixa historia o xiixa cosa la? nga nga ni zuni crenu. Peru pa qué rusiene Biblia xiixa historia la? cadi jneza diʼ cueñeenu xi riníʼ cani.

Yanna, ximodo zanda gacané ca historia stiʼ Biblia laanu yaʼ. Lu Romanos 15:4 gudxi Pablu ca xpinni Cristu ni bibí pur espíritu santu zanda guiziidicaʼ stale cosa ora gúʼndacaʼ Stiidxaʼ Dios. Guiráʼ ca historia stiʼ Biblia zanda gacané laacabe guni huantárcabe, quixhedxí ladxidóʼcabe ne gápacabe ti esperanza. Dede yanna, guiráʼ ca xpinni Cristu, dede né cani cadi bibí pur espíritu santu, racané cani zeeda lu Biblia laacaʼ (Juan 10:16; 2 Timoteo 3:1).

Xi rusiidiʼ cani bizéʼtenu ca laanu yaʼ. Cadi guiníʼ íquenu stale de ca historia stiʼ Biblia gucuá cani para gacané cani ca xpinni Cristu ni bibí si, o para si cani zeeda gaca xcaadxi dendxuʼ o para cani bibani si dxiqué. Ne stale de ca historia riʼ huayacané cani guiráʼ ca xpinni Cristu de dxiqué ne de yanna. Casi ca guendananá ni gudiʼdiʼ Job que la? cadi zeeda gaca cani ca guendananá ni gudiʼdiʼ ca xpinni Cristu lu Primera Guerra Mundial. Biaʼ tiempu huabani binni lu Guidxilayú, stale xpinni Dios huayacaná casi Job ne huayacané historia stibe laacaʼ, cásica hombre zaqueca gunaa, ca xpinni Cristu ni bibí ne cani zeeda gaca xcaadxi dendxuʼ. Guirácabe huayuuyacabe ximodo huayapa Jiobá laacabe pur nadxii ne riá laacabe (Santiago 5:11).

Ca dxi riʼ, nuu stale hermana ni maʼ nagola guizáʼ nadxiicaʼ Dios casi Débora, ne stale hombrehuiiniʼ ni maʼ naca binnigola nuu xpiaanicaʼ casi Elihú. Laaca nuu precursor nadxibalú ne runi xhiiñaʼ Dios né gana casi Jefté, ne nuu stale xpinni Dios qué rireecaʼ gana casi Job. Rudiʼnu xquíxepeʼ Jiobá pur bicaa historia stiʼ ca binni riʼ lu Biblia para quixhedxí ladxidoʼno ne gápanu ti esperanza.

Pur guiráʼ cani maʼ bidúʼyanu riʼ, maʼ qué ruzeetepeʼ ca libru ne ca revista stinu xi riníʼ ca historia zeeda lu Biblia. Ni jma zeeda lúcani nga xi rusiidiʼ ca historia ca laanu.