GUYUAAʼ Betel ni nuu Brooklyn 7 stiʼ septiembre 1950, dxiqué 355 hombre ne gunaa Testigu de gadxé gadxé guidxi runi dxiiñaʼ raqué ne nápacabe biaʼ 19 iza hasta 80. Stale de laacabe nácacabe de ca xpinni Cristu ni bibí pur espíritu santu.

Jñaaʼ nga bisiidiʼ naa guneʼ adorar Jiobá, «ti Dios nayecheʼ» (1 Tim. 1:11, TNM). Laabe bizulú bíʼnibe ni na Jiobá dxi nahuiineʼ. Guyuaanisaʼ 1 stiʼ julio iza 1939, dxi napaʼ 10 iza, ra guca ti guendaridagulisaa de zona (yanna lani guendaridagulisaa de chupa gubidxa) Columbus (Nebraska, Estados Unidos). Bidagulisaa ti gayuaa binni ti lugar ra gudíxedu ne raqué bicaadiágadu grabación stiʼ libana ni láʼ «Fascismo o libertad», ni bitiidiʼ Joseph Rutherford. Biaʼ galaa libana que bidagulisaa caadxi binni fuera de ra nuudu, guyuucaʼ ra dagulisaadu ne bichiacaʼ laadu ne guleecaʼ laadu ndaaniʼ guidxi que. Oraqueruʼ bidagulisaadu ra lidxi ti testigu stiʼ Jiobá ni nabeza fuera de guidxi que ne raqué bicaadiágadu sti ndaa libana que. ¡Qué ziuu dxi guiaandaʼ naa dxi guyuaanisaʼ!

Biʼniʼ jñaaʼ stipa pur gusiniisi naa ndaaniʼ xquidxi Dios. Neca nachaʼhuiʼ bixhozeʼ ne rudii guiráʼ ni iquiiñedu, peru qué riuulaʼdxiʼ gapa religión ne ninca qué rusiidiʼ naa de Dios. Peru jñaaʼ ne xcaadxi Testigu de neza binni ridagulisaa Omaha guluucaʼ gana naa, purtiʼ caquiiñeʼ ni.

Dxi mayaca gunduuxeʼ preparatoria, gupa xidé guníʼ iqueʼ xi guneʼ né xquendanabaneʼ. Guiráʼ verano bidaaguaʼ xcaadxi Testigu ni napa biaʼca iza napaʼ para gácadu precursor de vacación (yanna lani precursor auxiliar).

Biseendacabe John Chimiklis ne Ted Jaracz, chupa hombrehuiiniʼ ni caʼruʼ guichaganáʼ, casi binnigola ni riganna ca neza binni ridagulisaa neza ra nabézadu, laacabe deruʼ binduuxecabe Scuela stiʼ Galaad. Guizáʼ bidxagayaaʼ ora gunnaʼ cadi xadxí de bisaacabe 20 iza. Dxiqué napaʼ 18 iza ne mayaca gunduuxeʼ scuela. Qué riaandaʼ naa dxi gunabadiidxaʼ hermanu Chimiklis naa xi cá iqueʼ guneʼ gunduuxesiáʼ scuela. Ora gudxeʼ  laabe xi cá iqueʼ, bicábibe naa: «Nga xombre, biʼniʼ xhiiñaʼ Jiobá biaʼ gándatiʼ. Qué gánnaluʼ paraa zineni lii». Guizáʼ gucané conseju que naa ne ejemplu galán stiʼ ca hermanu que. Ngue runi gucaʼ precursor dxi binduuxeʼ scuela lu iza 1948.

Lu beeu julio 1950, yeniáʼ Bixhozeʼ ne jñaaʼ ti guendaridagulisaa stiʼ stale guidxi ni guca ndaaniʼ Estadio de los Yankees ni nuu Nueva York. Raqué nga guyaaʼ guendaridagulisaa ni raca para cani racalaʼdxiʼ guni dxiiñaʼ Betel ne biseendaʼ ti solicitud.

Neca qué nucueeza bixhozeʼ naa de ñacaʼ precursor ne qué niládxibe naa de ra lídxidu, peru gúdxibe naa naquiiñeʼ gudieeʼ ti ndaa bueltu para guiaxa ra nabezaʼ ne guixuíʼ ni gahuaʼ. Ngue runi, ra bizulú beeu agosto bireeʼ yeyubeʼ dxiiñaʼ, peru ante chaaʼ biiyaʼ pa nuu xiixa guiʼchiʼ ndaaniʼ buzón stidu. Ora biiyaʼ nuu ti carta stinneʼ ni biseendacabe de Brooklyn ndaaniʼ ni. Luni cá firma stiʼ Nathan H. Knorr ne nani: «Maʼ gucuaadu solicitud ni biseendaluʼ Betel. Nannaʼ rapuʼ gana chuʼluʼ Betel biaʼ dxi guibanuʼ. Nga runi, ñuuladxeʼ ñeedaluʼ Betel, 7 stiʼ septiembre 1950, nuuni lu calle Columbia Heights, 124 (Brooklyn, Nueva York)».

Ora beeda bixhozeʼ de dxiiñaʼ dxi que, gudxeʼ laa maʼ bidxelaʼ dxiiñaʼ. Óraque gúdxibe naa: «Galán xa, paraa chigunuʼ dxiiñaʼ yaʼ». Para gudxeʼ laabe: «Ndaaniʼ Betel ni nuu Brooklyn ne 10 dólar chitíxecabe naa cada beeu». Nabé bidxagayaabe ora gudxeʼ ni laabe, peru gúdxibe naa pa ngue nga ni racalaʼdxeʼ la? naquiiñeʼ guneʼ stipa pur ugaandaʼ ni. Qué nindaa de ngue, guyuunísabe lu ti guendaridagulisaa ni guca ndaaniʼ Estadio de los Yankees lu iza 1953.

Guizáʼ nayecheʼ guyuaaʼ purtiʼ laaca biʼniʼ invitárcabe ti precursor ni bicheecheniáʼ diidxaʼ láʼ Alfred Nussrallah para cheʼ Betel dxíqueca ne guyuudu juntu. Despué bichaganabe ne yenebe xheelabe Joan, Galaad, gúcacabe misioneru Líbano, ne de raqué bibiguétacabe Estados Unidos, ra guca Alfred binnigola ni riganna ca neza binni ridagulisaa.

Primé dxiiñaʼ bidiicabe naa guneʼ Betel nga quibaʼ libru ndaaniʼ taller ra raca cani. Primé libru ni gudibaʼ nga ¿Qué ha hecho la religión para la humanidad? Dxi maʼ ziniáʼ xhono beeu de cayuneʼ dxiiñaʼ que, bichaacabe naa ra Departamentu de Serviciu ra ruuyaʼ Thomas J. Sullivan gaca dxiiñaʼ. Ti ndaayaʼ nga bineniáʼ laabe dxiiñaʼ ne biziideʼ stale cosa de laabe purtiʼ nabé nuu xpiaanibe ne nánnabe stale de lu Biblia ne de guiráʼ cani maʼ bíʼnibe lu ca iza ni maʼ zinebe ndaaniʼ xquidxi Jiobá.

Dxi napaʼ biaʼ chonna iza ra Departamentu de Serviciu bidxiña Max Larson naa, ti binnigola ni ruuyaʼ gaca dxiiñaʼ ra fábrica, ne gudxi naa racalaʼdxiʼ hermanu Knorr guiniʼné naa. Rietenalaʼdxeʼ ni guníʼ iqueʼ dxi que: «Ñee bineʼ xiixa ni cadi jneza la?». Peru ni gunabadiidxaʼ hermanu Knorr naa nga pa cá iqueʼ gusaanaʼ de guneʼ dxiiñaʼ Betel, purtiʼ caquiiñebe ti binni guni dxiiñaʼ ndaaniʼ oficina stibe ti tiempuhuiiniʼ ne nuube gánnabe pa zanda guneʼ ni. ¡Dede gutadxí ladxiduáʼ! Gudxeʼ laabe cadi cá iqueʼ gusaanaʼ de guneʼ dxiiñaʼ Betel. Ne gande iza bineʼ dxiiñaʼ ndaaniʼ oficina stibe.

Gatigá riniéʼ qué ñuu dxi ñanda niguixeʼ para niziideʼ guiráʼ ni biziideʼ Betel dxi bineniáʼ hermanu Sullivan ne Knorr dxiiñaʼ ne xcaadxi xpinni Cristu casi Milton Henschel, Klaus Jensen, Max Larson, Hugo Riemer ne Grant Suiter. *

 Ca xpinni Cristu ni huayuneniáʼ dxiiñaʼ nabé jneza modo riguixhe chaahuicaʼ dxiiñaʼ rúnicaʼ ndaaniʼ xquidxi Dios. Casi hermanu Knorr guizáʼ nadipaʼ biʼniʼ dxiiñaʼ purtiʼ gucalaʼdxiʼ niroobaʼ xhiiñaʼ Reinu biaʼ gándatiʼ. Qué raca nagana para laadu güínedu laabe diidxaʼ purtiʼ rúnidu dxiiñaʼ ndaaniʼ oficina stibe. Neca nuu tiru gadxé gadxé modo riníʼ íquedu de caadxi cosa, peru qué ridxíbidu guidxiichinebe laadu ora gábidu laabe xi runi sentirdu.

Ti biaje gudxi hermanu Knorr naa pabiáʼ risaca nga gúninu xiixa dxiiñaʼ neca cadi naroʼbaʼ cani. Casi dxi ruuyabe gaca dxiiñaʼ ra fábrica que, guniʼné hermanu Rutherford laabe pur teléfono ne gudxi laabe: «Hermanu Knorr, ora gueeda toloʼ gueta daneca chupa chonna borrador. Caquiiñeʼ cani lu escritorio stinneʼ». Oraqueca rié hermanu Knorr ra almacén, ricaa chupa chonna borrador ne riguu cani ndaaniʼ bolsa stiʼ. Ne despué, biaʼ galaa dxi, rinebe cani ndaaniʼ oficina stiʼ hermanu Rutherford. Neca qué risaca dxiiñaʼ que, guizáʼ riquiiñeʼ hermanu Rutherford cani. Óraque gudxi hermanu Knorr naa: «Riuuladxeʼ guiduxhu ruaa ca lápiz napaʼ lu escritorio stinneʼ riʼ. Ñee zanda gutúxhuluʼ ruaa cani guiráʼ siadóʼ la?». Guizáʼ stale iza bituxhuáʼ ruaa ca lápiz stibe.

Gatigá gudxi hermanu Knorr laadu pabiáʼ risaca nga gucaadiaga chaahuidu ora guinábacabe laadu gúnidu xiixa. Ti dxi gúdxibe naa ximódopeʼ naquiiñeʼ guneʼ ti cosa, peru qué nucaadiaga chaahueʼ laabe, ne pur naa guyuube lu ti guendanagana. Guizáʼ feu bineʼ sentir, ngue runi bicaa chupa chonna diidxaʼ lu ti carta para gabeʼ laabe nabé cayuubaʼ ladxiduáʼ pur ni guca que ne gudxeʼ laabe jma galán pa nuchaabe naa de departamentu. Gudiʼdiʼ si chupa chonna hora, siadóʼ queca, beeda hermanu Knorr ra nuu escritorio stinneʼ. Ne gudxi naa: «Robert, maʼ biindaʼ carta stiluʼ. Bicheeluʼ ne maʼ gunidu ni bizaaca ca, ne nannaʼ dxiicheʼ jma zápaluʼ cuidadu ora gúniluʼ sti cosa. Yanna la? gúninu dxiiñaʼ». Bidiéʼ xquíxepeʼ laabe purtiʼ gúcabe nachaʼhuiʼ né naa ne biénebe ni guca que.

Qué lica nicá iqueʼ nusaanaʼ dxiiñaʼ cayuneʼ Betel, peru dxi bisaaʼ xhono iza de nuaaʼ raqué, málasi bichaa modo guníʼ iqueʼ. Dxi guca guendaridagulisaa stiʼ stale guidxi ndaaniʼ Estadio de los Yankees ne ndaaniʼ Estadio Polo Grounds lu iza 1958, biiyaʼ Lorraine Brookes, ni binebiaʼyaʼ lu iza 1955 dxi cayuni xhiiñaʼ Jiobá ndaaniʼ guidxi Montreal ni nuu Canadá. Guizáʼ bidxagayaaʼ modo rúnibe xhiiñaʼ Jiobá biaʼ gándatiʼ ne rinabe chebe ra tiica guseendaʼ xquidxi Jiobá laabe. Gudixhe íquebe chebe Escuela stiʼ Galaad. Ne lu iza 1956, dxi nápabe 22 iza, biʼniʼ invitárcabe laabe chebe clase númeru 27, ne ora bilúxebe Scuela que biseendacabe laabe Brasil. Casi maʼ bizeeteʼ que, lu iza 1958 bidxaagadu sti biaje, gudxeʼ laabe guichaganabe naa ne gunabe. Guníʼ íquedu guichaganadu sti iza que ne pa ganda la? gácadu misioneru.

 Ora gudxeʼ hermanu Knorr xi cá iqueʼ guneʼ, gúdxibe naa cuézadu xhonna iza ti guichaganadu ne guiaanadu Betel ni nuu Brooklyn. Dxiqué, para ganda guiaana chupa binni Betel despué de maʼ bichaganacaʼ, napa xidé gapa tobi de laacabe chii iza Betel ne stobi de laacabe naquiiñeʼ gapa biaʼ chonna iza. Ngue runi guná Lorraine guni dxiiñaʼ ndaaniʼ Betel ni nuu Brasil chupa iza ne de raqué guyuube sti iza Betel ni nuu Brooklyn ante guichaganadu.

Lu chupa iza de nácadu novio, carta si nga biseendadu ra nuudu. Guizáʼ caru guiníʼ binni lu teléfono... ¡ne gastiʼ Internet dxiqué! Ne hermanu Knorr bidii libana dxi bichaganadu, 16 stiʼ septiembre iza 1961. Neca huaxiéʼ iza ngue gulézadu para guichaganadu, peru guizáʼ xadxí gúcani para laadu. Yanna, ora ridúʼyadu pabiáʼ nayecheʼ huabánidu lu jma de cincuenta iza de bichaganadu rudiʼdu cuenta galán ngue bínidu gulézadu.

Lu iza 1964 gulícabe naa para gacaʼ binnigola ni riganna ca yoo Betel ni nuu ndaaniʼ xcaadxi guidxi. Dxiqué, qué riné binni xheelaʼ ora chiganna xcaadxi yoo Betel. Peru lu iza 1977 maʼ gunda yeniáʼ xheelaʼ. Iza ca, naa ne Lorraine yenedu Grant ne Edith Suiter yegánnadu Betel ni nuu Alemania, Austria, Grecia, Chipre, Turquía ne Israel. Biaʼsi setenta guidxi maʼ guyaaʼ.

Tobi de ca guidxi ni yegannaʼ lu iza 1980 nga Brasil ne de raqué guyaaʼ Belém, ti guidxi ni nuu gaxha de ecuador ra guyuu Lorraine de misionera. Laaca yegánnadu ca hermanu de Manaos. Ndaaniʼ ti estadiu ra bidieeʼ ti libana, nabé bidxagayaadu ora bidúʼyadu zuba ti grupu de xpinni Cristu juntu. Laacabe qué rugapadiúxicabe casi ca binni de Brasil, raqué rudii ca gunaa bixiduʼ cueʼ xhágacaʼ ne ca hombre rudii nacaʼ. Xiiñeʼ qué rúnicabe casi runi xcaadxi binni que yaʼ.

Purtiʼ nápacabe lepra ne nabézacabe ndaaniʼ ti colonia ra nuu ca leproso ni nuu ndaaniʼ guiʼxhiʼ stiʼ Amazonas. Qué rinácabe cánacabe xcaadxi xpinni Cristu dagulisaa raqué ti cadi gucaacabe guendahuará que laacaʼ. Peru guizáʼ bisiuubacabe ladxidoʼdo. ¡Qué ziuu dxi guiaandaʼ laadu pabiáʼ nayecheʼ nuucabe! Sicaríʼ na Isaías 65:14: «Ca xpinneʼ zúnicaʼ ridxi purtiʼ nayecheʼ ziuu ladxidoʼcaʼ». ¡Raqué biiyaʼ dxiicheʼ dxandíʼ ni na ca diidxaʼ ca!

Naa ne Lorraine maʼ zinedu jma de 60 iza de cayúnidu xhiiñaʼ Jiobá ne gatigá riníʼ íquedu guiráʼ ni maʼ gudídidu lu ca iza ca. Guizáʼ nayecheʼ runi sentirdu pur guiráʼ ndaayaʼ huacaadu ra rudiʼdu lugar guluíʼ xquidxi Jiobá laadu xi naquiiñeʼ gúnidu. Neca maʼ qué randa riaaʼ ca guidxi nuu lu guidubi Guidxilayú casi bineʼ ni dxiqué, peru guiráʼ dxi runeʼ tender ca dxiiñaʼ napaʼ, casi gacaniáʼ Comité ni ruuyaʼ dxiiñaʼ runi xcaadxi comité ne Comité de Serviciu, zacá nga racaniáʼ Grupu ni Zaniruʼ. Rudieeʼ xquíxepeʼ Jiobá saca cudii lugar naa gacaniáʼ xquidxi ni nuu lu guidubi Guidxilayú neca caadxi. Qué guirá guidxagayaaʼ pabiáʼ stale hombre ne gunaa ni nahuiiniʼ, cayúnicaʼ xhiiñaʼ Jiobá biaʼ gándatiʼ cásica biʼniʼ Isaías, laa guníʼ: «¡Raríʼ nuaaʼ! Biseendaʼ naa» (Is. 6:8). Guiráʼ ca binni riʼ cusihuínnicaʼ dxandíʼ ca diidxaʼ gudxi binnigola ni riganna ca neza binni ridagulisaa que naa raca stale iza: «Biʼniʼ xhiiñaʼ Jiobá biaʼ gándatiʼ. Qué gánnaluʼ paraa zineni lii».