Chupa precursor ni canagucheeche diidxaʼ ndaaniʼ guidxi Kenia, guizáʼ bidxagayaacaʼ ora biiyacaʼ nexheʼ ti hombre narungu lu ti cama. Nahuiiniʼ xcuérpube ne nachucu guiropaʼ nabe. Ora gúdxicabe laabe na Dios «binni nachiitaʼ ñee zaguiʼbaʼ dani casi runi ti bidxiña» la? guizáʼ biéchebe (Is. 35:6).

Ca precursor que gúnnacaʼ gulené Onesmus ti guendahuará ni láʼ osteogénesis imperfecta, ne laaca rábicabe ni huesos de cristal. Nabé nadá dxita ládibe purtiʼ pa quiécabe ni zanda gache ni. Cumu qué randa rianda ni la? gucuá ique Onesmus zabaniné yuubaʼ stiʼ guendahuará que ne zabí lu ti silla de rueda biaʼ dxi guibani.

Bizulú biindanécabe Onesmus Biblia. Peru jñaabe qué racalaʼdxiʼ chebe ca guendaridagulisaa stiʼ ca Testigu, purtiʼ guníʼ ique zándaca jma gacanabe ne guiuubaʼ dxita ládibe. Ngue runi, biʼniʼ grabar ca xpinni Cristu guiráʼ ni rieeteʼ lu ca guendaridagulisaa que ne maʼ ralídxibe bicaadiágabe cani. Peru gaayuʼ beeu despué de cayuundabe Biblia guniʼbe racaláʼdxibe chebe guendaridagulisaa neca zándaca gacanabe.

Ñee jma gucaná Onesmus ora guyé ca guendaridagulisaa que la? Qué lica ñacanabe. Sicaríʼ guniʼbe: «Ruluíʼ rieeteʼ lu yuubaʼ stinneʼ ora riaaʼ ca guendaridagulisaa que». Laabe guniʼbe nabé galán runi sentirbe pur guiráʼ cosa sicarú caziidibe chigaca. Guizáʼ sicarú biʼniʼ sentir jñaabe ora biʼyaʼ maʼ nayecheʼ nuube ne pur ngue gudixhe ique guʼndaʼ Biblia. Sicaríʼ guníʼ jñaabe: «Medicina stiʼ xiiñeʼ nga guni xhiiñaʼ Dios».

Qué nindaa de ngue guca Onesmus ti ni rucheeche diidxaʼ ni caʼruʼ chúʼnisa. Despué guyuunísabe, ne yanna maʼ nácabe siervu ministerial. Neca qué randa riquiiñebe ñeebe ne ti chu nabe la? racaláʼdxibe gúnibe xhiiñaʼ Jiobá dede biaʼ gándatiʼ. Gúpabe gana ñácabe precursor auxiliar, peru bidxíbibe nuchabe guiʼchiʼ para ñácabe ni. Xiñee yaʼ. Purtiʼ nánnabe zaquiiñebe sti binni para gucaanaʼ silla de rueda stibe. Ora gúdxibe ca xpinni Cristu xi naguu xizaa laabe, guniʼcaʼ zacanecaʼ laabe. Ngue runi, gunda guca Onesmus precursor auxiliar.

Dxi gucaláʼdxibe ñácabe precursor regular la? laaca bidxíbibe. Ti dxi, ora bíʼndabe textu ni biaba dxi que nabé gucaneni laabe. Textu que nga Salmo 34:8 ra na: «Lagudii cuenta ne laguuyaʼ pabiáʼ nachaʼhuiʼ Jiobá». Despué de guníʼ íquebe ni caníʼ textu que gudixhe íquebe gácabe precursor regular. Yanna rucheechebe diidxaʼ tapa dxi lu ti semana ne stale binni ni cusiidibe de Biblia maʼ cayúnicaʼ ni caziidicaʼ. Lu iza 2010 guyebe Scuela stiʼ ca Precursor Regular. Nabé biéchebe ora biiyabe tobi de ca xpinni Cristu ni yeganna laabe primé biaje que nga chigusiidiʼ laabe lu scuela que.

Yanna mayaca gusaa Onesmus 40 iza. Ne cumu maʼ guti bixhózebe ne jñaabe la? maʼ ca xpinni Cristu rapa laabe. Nabé rudiibe xquíxepeʼ Jiobá pur guiráʼ ndaayaʼ ni nápabe yanna ne cabézabe dxi maʼ guirutiʼ zaníʼ: «Huaraʼyaʼ» (Is. 33:24).