Stiidxaʼ Dios caguixhená laanu: «De ndaani ladxidóʼ cabe reeda ni cadi jneza ni cá ique cabe guni cabe: guuti cabe binni, o chuʼ né cabe ni cadi xheela cabe, gapa cabe jnadxii cabe, cuana cabe, indisa cabe falsu luguiá stobi, cuʼ dí cabe binni» (Mat. 15:19). Pa qué chuʼnu cuidadu ladxidoʼno, o modo laanu, zanda quíteni laanu ne gucaani laanu guiníʼ íquenu jneza xiixa ni nanalaʼdxiʼ Dios. Né zándaca qué zudiʼnu cuenta pa maʼ gudxite ni laanu dede óraruʼ maʼ bicheʼnu. Ximodo zanda gánnanu xi nuu ndaaniʼ ladxidoʼno ante gucaani laanu gúninu xiixa ni cadi jneza yaʼ.

Guidúʼndanu Biblia guiráʼ dxi ne guiníʼ íquenu lu ni cadúʼndanu.

Apóstol Pablu bicaa: «Stiidxa Dios la? rudii enda nabani laanu, ne nandxóʼ ni. Jma naduxhu ni que ti puñal ni naduxhu iropa ladu, purti zanda guiaazi ni dede jma gueteʼ». Cani racalaʼdxiʼ Dios gánnanu ca zeeda cani ndaaniʼ Biblia ne zanda chindá cani «lu xquenda biaani nu, para ganna nu ximodo laanu» (Heb. 4:12). Ora guidúʼndanu Biblia la? naquiiñeʼ guidúʼyanu xi nuu lu xquendabiaaninu ne xi cayúninu, purtiʼ zacané ni laanu ganna chaahuinu xipeʼ nga nuu ndaaniʼ ladxidoʼno. Nga runi, galán guidúʼndanu ni guiráʼ dxi ne guiníʼ íquenu lu ni cadúʼndanu, zacá zanda gúʼyanu ca cosa ca casi ruuyaʼ Jiobá cani.

Pa guicaanu ca conseju ni zeeda lu Biblia ne gúninu cani la? zusíʼdinu xquendabiaaninu guni ni jneza. Zacá zanda gabi ni laanu pa cadi jneza xiixa  ni racaláʼdxinu gúninu ne pa gucheʼnu la? zabi ni laanu cadi jneza ni bíninu (Rom. 9:1). Ne lu Biblia zeeda stale ejemplu ni zanda quixhená laanu (1 Cor. 10:11). Pa guizíʼdinu de laacani qué zúninu xiixa ni cadi jneza. Xiruʼ zanda gúninu yaʼ.

Guni orarnu Jiobá para gacané laanu.

Ruuyaʼ Jiobá xi nuu ndaaniʼ ladxidóʼ binni (1 Crón. 29:17). Ne «jma nandxóʼ Dios que [ladxidoʼno] ne laa nanna irá ni nuu ndaani ni» (1 Juan 3:20). Nga runi qué zanda quítenu laabe. Pa gábinu laabe xi riguu xizaa laanu, ne xi runi sentirnu ne xi racaláʼdxinu la? zacanebe laanu para gánnanu xi nuu ndaaniʼ ladxidoʼno. Dede zanda guinábanu laabe gusiabe ladxidoʼno (Sal. 51:10). Racá ridúʼyanu pabiáʼ risaca guni orarnu Dios purtiʼ racaneni laanu gánnanu xi racalaʼdxiʼ ladxidoʼno guni.

Gucaadiaga chaahuinu ora maʼ cayaca ca guendaridagulisaa.

Ora gúninu zacá, zacaneni laanu ganna chaahuinu xipeʼ nga nuu ndaaniʼ ladxidoʼno ne guchaʼnu pa naquiiñeʼ gúninu ni. Cadi guiráʼ diʼ biaje rizíʼdinu xiixa nacubi lu cada guendaridagulisaa, peru naquiiñeʼ chuuláʼdxinu gucaadiáganu cani. Xiñee yaʼ. Purtiʼ lu cada tobi de laani zanda guiene chaahuinu xiixa principiu zeeda lu Biblia, ne laaca racané ca conseju rudiicabe laanu racá para guʼyaʼ chaahuinu ximodo nuunu ne guchaʼnu modo nabáninu pa caquiiñeʼ gúninu ni. Laaca nabé risaca ni ricabi ca xpinni Cristu lu cada guendaridagulisaa (Prov. 27:17). Peru pa qué guidagulisaanenu ca xpinni Cristu la? jma ziuʼnu xizaa pur ca cosa ni cá íquenu gúninu ne zándaca gúninu xiixa ni guniná laanu (Prov. 18:1). Nga runi, galán guinabadiidxanu laca laanu: «Ñee riaaʼ guiráʼ ca guendaridagulisaa ne riziideʼ stale de laacani la?» (Heb. 10:24, 25).

Zanda quite ladxidoʼno laanu de stale modo. Lu tema riʼ zadúʼyanu tapa de laani: cadi guicá íquenu gápanu stale cosa risaca, cadi gápanu viciu de guideʼnu nisadxuʼniʼ, guʼyaʼ chaahuinu tu gaca xhamígunu ne chuʼnu cuidadu ora guyúbinu xi gúninu para chuʼnu nayecheʼ.

Cadi guicá íquenu gápanu stale cosa risaca.

Cadi malu diʼ nga guni binni dxiiñaʼ para gapa guiráʼ ni iquiiñeʼ. Peru Jesús guníʼ xi zazaaca pa jma guicá ique binni guni dxiiñaʼ para si gutale bidxichi. Bizeetebe ejemplu stiʼ ti hombre ricu ni dxaʼ troja stiʼ ne maʼ qué gapa paraa uguu sti cosecha. Ngue runi gudixhe ique hombre que guxhiá ca troja que ne guni xcaadxi jma naroʼbaʼ. Sicaríʼ guníʼ íquebe: «Zuxhaya ca troja stinneʼ. Zucué cani jma naroʼba para idxá irá niza riʼ ne irá stinneʼ. Ne óraque zanda iniéʼ: “Yanna huaxa ma chi iziiladxeʼ ne ma chi guiecheʼ, purti ma napa stale ni gahua ne ni gueeʼ, ne ma naguaa chaahue ni iquiiñe stale iza”». Qué liica niníʼ ique hombre riʼ pa gueelaʼ queca zati (Luc. 12:16-20).

Ora jma maʼ ziniisinu, zándaca ziuʼnu xizaa pur gápanu bueltu ni iquiiñenu ora maʼ igólanu. Ne zándaca pur nga guicá íquenu gúninu dxiiñaʼ hora extra dxi ridagulisaanu ne gusaana de gúninu ca dxiiñaʼ ni nápanu ndaaniʼ xquidxi Dios. Pa gúninu zacá la? ziábanu lu ti trampa. Yanna pa nahuiiniluʼ, xi zanda gúniluʼ pa maʼ biéneluʼ gástiruʼ sti cosa jma galán que gúniluʼ xhiiñaʼ Jiobá lu xquendanabániluʼ yaʼ. Ñee zaníʼ íqueluʼ naquiiñeʼ gúniluʼ dxiiñaʼ primeru ne cuʼ chaahuiluʼ bueltu óraca  ndaʼ maʼ gácaluʼ precursor la? Cadi jma galán guicá íqueluʼ gúniluʼ biaʼ gándatiʼ lu xhiiñaʼ Dios laga nahuiiniluʼ la? Cadi guiaandaʼ ndiʼ lii: guirutiʼ ganna pa nabani guixíʼ.

Cadi gápanu viciu de guideʼnu nisadxuʼniʼ.

Proverbios 23:20 na: «Cadi chuʼluʼ lade cani reʼ xhaataʼ vinu». Tuuxa ni nabé riuulaʼdxiʼ gueʼ nisadxuʼniʼ, zándaca guebe ni gatigá, ne guiníʼ íquebe qué reʼbe para xhúdxibe, sínuque para chúʼsibe galán. Pa caquiiñenu caadxi nisadxuʼniʼ para chuʼnu galán, zándaca maʼ naquiiñeʼ guʼyaʼ chaahuinu xipeʼ nga nuu ndaaniʼ ladxidoʼno.

Guʼyaʼ chaahuinu tu gaca xhamígunu.

Guiráʼ dxi ridxaaganu binni ni qué runi adorar Jiobá, casi cani rinenu scuela, cani runinenu dxiiñaʼ o cani rinínenu ora maʼ zigucheechenu diidxaʼ. Peru maʼ gadxé nga guyúbinu laacabe para chizánenu laacabe, o gacaláʼdxinu gaca xhamígunu laacabe. Pa zacá nuunu la? zándaca guiníʼ íquenu gastiʼ naca guidxaaganu laacabe purtiʼ para laanu nacháʼhuicabe. Peru nayaguieʼ modo rusiene Biblia ca diidxaʼ riʼ: «Pa idxaagu ni nadxaba la? zacá ni lii» (1 Cor. 15:33). Cásica raca biidiʼ nisa daʼ ndaaniʼ ti cubeta ora riaba chupa chonna gota venenu ndaaniʼ, ngaca nga ni zazaaca né modo runi adorarnu Jiobá pa guidxaaganu binni ni qué runi ni nabe. Ra tiidiʼ dxi zacá modo riníʼ íquecabe laanu, zácunu lari cásica modo rácucabe, zaninu modo riníʼcabe ne zúninu ni rúnicabe.

Chuʼnu cuidadu ora guyúbinu xi gúninu para chuʼnu nayecheʼ.

Lu ca aparatu cubi nuu yanna riʼ zeeda stale cosa ni riquiiñeʼ binni para chuʼ nayecheʼ, peru nuu de laacani cadi galán diʼ para ti xpinni Cristu. Apóstol Pablu na cadi liica guieeteʼ cosa dxabaʼ ládenu (Efes. 5:3). Peru pa riuulaʼdxiʼ ladxidoʼno guʼyaʼ o gucaadiaga xiixa ni nadxabaʼ yaʼ. Nuu tu riníʼ caquiiñeʼ cuee binni tiempu para chuʼ nayecheʼ ti ratu ne cada binni nga zanda guʼyaʼ xi guni. Peru jma galán gucaadiáganu conseju bidii Pablu ne cadi gúʼyanu o gucaadiáganu xiixa ni nadxabaʼ.

Neca maʼ huaguite ladxidoʼno laanu ne maʼ biaʼnu gúninu caadxi cosa ni cadi jneza, zanda guchaʼnu modo laanu (Efes. 4:22-24). Guidúʼyanu chupa ejemplu.

Guzéʼtenu ni bizaaca Miguel. * Laa nabé gucuá ique gapa stale cosa risaca, peru gupa xidé bichaa modo riníʼ ique. Laabe guniʼbe: «Naa ne xheelaʼ ne ti xiiñidu, nabézadu ndaaniʼ ti guidxi ra nabé ricá ique binni gapa guiráʼ ca aparatu ni nacubi caree ne guibani jma galán. Gucalaʼdxeʼ ñapaʼ guiráʼ ni nuu lu guidxilayú riʼ ne guníʼ iqueʼ qué ziabaʼ lu trampa ra riaba stale binni. Qué nindaa bidieeʼ cuenta ora ricá ique binni gutale bidxichi stiʼ zeeda gácani casi ora ñe tuuxa lu ti carretera ni qué gapa ra guiluxe. Gunabaʼ Jiobá gacané naa guchaaʼ modo riníʼ iqueʼ ne guchaaʼ cani nuu ndaaniʼ ladxiduáʼ, laaca gudxeʼ laabe rápadu gana gúnidu biaʼ gándatiʼ lu xhiiñabe. Gudixhe íquedu gápadu ni iquiiñesidu para guibánidu ne chuudu sti lugar ra jma caquiiñeʼ tu gucheeche diidxaʼ. Qué nindaa gúcadu precursor, ne maʼ bidiʼdu cuenta cadi caquiiñeʼ gapa binni stale cosa risaca para chuʼ nayecheʼ ne guibani galán».

Ejemplu stiʼ Leo rusihuinni pabiáʼ risaca guʼyaʼ chaahuiʼ binni xi nuu ndaaniʼ ladxidóʼ. Ngapeʼ nga ni bíʼnibe, nga runi gunda bixélebe de ca binni ni qué runi adorar Jiobá. Guidúʼyanu xi guníʼ Leo: «Nabé bidxaagaʼ binni de sti guidxi pur dxiiñaʼ stinneʼ. Neca nannaʼ nabé réʼcabe nisadxuʼniʼ ora ridagulisaacabe, peru riuuladxeʼ chaaʼ ra riécabe. Bilá nixudxeʼ stale biaje, ne despué maʼ ruchiiñaʼ xquendabiaaneʼ naa. Óraque nga bidieeʼ cuenta caquiiñeʼ guuyaʼ chaahueʼ xipeʼ nga nuu ndaaniʼ ladxiduáʼ. Pur ca conseju zeeda lu Biblia ne ni bidii ca binnigola naa, bidieeʼ cuenta napaʼ ca guendanagana que purtiʼ nabé riuuladxeʼ guidxaagaʼ binni ni cadi nadxii Jiobá. Yanna maʼ pur teléfono si runeʼ ca negocio stinneʼ ne runeʼ stipa pur cadi guidxaagapiáʼ laacabe».

Para cadi quítenu laca laanu la? naquiiñeʼ guʼyaʼ chaahuinu xi nuu ndaaniʼ ladxidoʼno. Ne para gúninu nga naquiiñeʼ guinábanu gacané Jiobá laanu, «purtiʼ laabe nánnabe guiráʼ ni nagaʼchiʼ nuu ndaaniʼ ladxidoʼno» (Sal. 44:21). Laaca nápanu Stiidxaʼ Dios, ni zeeda gaca casi ti speju ni racané laanu gánnanu ximódopeʼ nuu ladxidoʼno (Sant. 1:22-25). Ne laaca rudii Jiobá laanu stale conseju risaca lu ca libru ne revista ne lu ca guendaridagulisaa stinu. Né guiráʼ cani rudiibe laanu riʼ, zanda gápanu ladxidoʼno ne gúninu ni riuulaʼdxiʼ Jiobá.