1. Xi gunna Pablu de ca xpinni Cristu de Corinto ni bisiecheʼ laa.

 GUNÍʼ ique nuunu lu iza 55 despué de ca dxi stiʼ Jesús. Iza que nuu apóstol Pablu ra puertu stiʼ guidxi Troas, peru cadi cusaana de guiníʼ íquebe ximodo nuu ca xpinni Cristu de Corinto. Xiñee yaʼ. Purtiʼ gúnnabe nabé nuudíndecaʼ ne nuube xizaa pur laacaʼ. Ngue runi, casi tuuxa ni rizaalaʼdxiʼ ca xiiñiʼ, bicaabe ti carta ra nuucaʼ ra bidiibe caadxi conseju laacaʼ (1 Cor. 1:11; 4:15). Ne laaca gunábabe Tito xhamígube chiganna laacaʼ ne gúdxibe laa guidxaagalúcabe Troas, para gabi laabe ximodo nuu ca binni de Corinto. Yanna maʼ cabeza Pablu guedandá Tito, purtiʼ rapa gana ganna xi guiníʼ Tito. Peru nabé triste gúcani para laabe, purtiʼ qué ñedandá Tito. Yanna, xi guni Pablu yaʼ. Gucuaabe ti barcu ne guyebe Macedonia. Nabé biéchebe pur ni gudxi Tito laabe ora bidxaagalúcabe raqué: gucuaa ca xpinni Cristu de Corinto ca conseju stiʼ Pablu ne rápacaʼ gana gúʼyacaʼ laabe sti biaje. Jmaruʼ si biecheʼ Pablu ora binadiaga guiráʼ ni gudxi Tito laa (2 Cor. 2:12, 13; 7:5-9).

2. 1) Xi gudxi Pablu ca xpinni Cristu de Corinto. 2) Xi guendarinabadiidxaʼ zacábinu lu tema riʼ.

² Qué nindaa bicaa Pablu guiropa carta stiʼ ra nuu ca binni de Corinto, luni guniʼbe: «Cadi cuyubi du quixhe du xi guni cre tu, purti ma zuhuaa chaahui tu lu ni runi cre tu. Ni cuyubi du [...] nga acané du guieche tu» (2 Cor 1:24). Xi gucaláʼdxibe niniʼbe yaʼ. Xi zanda guiziidiʼ ca xpinni Cristu ni naca binnigola tiempu riʼ de ni guníʼ Pablu yaʼ.

3. 1) Xi gucalaʼdxiʼ Pablu niníʼ ora bicaa ca diidxaʼ riʼ: «Zuhuaa chaahui tu lu ni runi cre tu». 2) Ximodo rinanda ca binnigola ejemplu stiʼ Pablu ca dxi riʼ.

³ Apóstol Pablu bizeeteʼ chupa cosa ni risaca para ganda guni adorarnu Dios: gápanu fe ne chuʼnu nayecheʼ. Ora bizeetebe de fe la? bicaabe:  «Cadi cuyubi du quixhe du xi guni cre tu, purti ma zuhuaa chaahui tu lu ni runi cre tu». Biénebe ruzuubaʼ ca xpinni Cristu de Corinto diidxaʼ purtiʼ nápacaʼ fe Dios, cadi pur ni ruuyacaʼ rúnibe o pur ni runi xcaadxi binni. Ngue runi qué niníʼ íquebe naquiiñeʼ quíxhebe xi guni crecaʼ, ne qué racaláʼdxibe gúnibe ni, purtiʼ nánnabe runi adorarcaʼ Dios de guidubi ladxidoʼcaʼ (2 Cor. 2:3). Ca binnigola nuu yanna laaca rinándacaʼ ejemplu stiʼ Pablu, purtiʼ nánnacaʼ napa ca xpinni Cristu fe Dios ne runi adorarcaʼ laabe de guidubi ladxidoʼcaʼ (2 Tes. 3:4). Lugar de quíxhecabe xi naquiiñeʼ guni ca binni ridagulisaa, rinándacabe ca principiu zeeda lu Biblia ne rúnicabe ni na xquidxi Dios. Cásica Pablu, cadi laadícabe nga riguíxhecabe xi guni cré xcaadxi binni (1 Ped. 5:2, 3).

4. 1) Xi gucalaʼdxiʼ Pablu niníʼ ora bicaa ca diidxaʼ riʼ: «Ni cuyubi du [...] nga acané du guieche tu». 2) Ximodo rinanda ca binnigola ejemplu stiʼ Pablu.

⁴ Pablu laaca guníʼ: «Ni cuyubi du [...] nga acané du guieche tu». Né ca diidxaʼ riʼ cuzeetebe de dxiiñaʼ ni cayúnibe ne ni cayuni ca binni ni jma ridxaagabe. Ximodo nánnanu ni yaʼ. Laaca lu carta que bizeetebe lá chupa de ca binni que. Laabe bicaabe: «Naa ne Silvanu ne Timoteu byuí du stiidxa Cristu Jesús [...] lade tu» (2 Cor. 1:19). Ne cada biaje guzeeteʼ apóstol riʼ de cani cayuniné dxiiñaʼ, caniʼbe de cani jma nuu gaxha de laabe, casi Apolos, Áquila, Prisca, Timoteu ne Tito (Rom. 16:3, 21; 1 Cor. 3:6-9; 2 Cor. 8:23). Ora guniʼbe cayacanécabe para chuʼ ca binni que nayecheʼ, cayábibe ca binni de Corinto cayúnicabe dxiiñaʼ biaʼ gándatiʼ para chuʼ ca binni ridagulisaa jma nayecheʼ. Ca binnigola ni nuu tiempu riʼ, laaca riuuláʼdxicaʼ gacanecaʼ ca xpinni Cristu para guni adorarcaʼ Jiobá ne chuʼcaʼ nayecheʼ (Sal. 100:2; Filip. 1:25).

5. Xi zadúʼyanu lu tema riʼ, ne xi naquiiñeʼ guiníʼ íquenu.

⁵ Guidúʼyanu xi gunabadiidxacabe caadxi de cani riuulaʼdxiʼ gucheeche diidxaʼ ni nabeza gadxé gadxé guidxi: «Ximodo gucané ti binnigola lii o xi gúdxibe lii para guyuuluʼ jma nayecheʼ». Laga guidúʼndanu xi bicábicabe, guiníʼ íquenu xi nicábinu pa ninabadiidxacabe ni laanu. Laaca galán guiníʼ íquenu xi zanda guni cada tobi de laanu para ganda chuʼ ca binni ridagulisaa jma nayecheʼ. *

6, 7. 1) Gunáʼ nga ti modo rinanda ca binnigola ejemplu stiʼ Jesús, stiʼ Pablu ne stiʼ xcaadxi xpinni Dios. 2) Xiñee riuu ca xpinni Cristu jma nayecheʼ ora rietenaláʼdxinu tu lacaʼ.

⁶ Stale xpinni Cristu guníʼ nabé riuucaʼ nayecheʼ ora rusihuinni ca binnigola dxandíʼ rizaaláʼdxicaʼ laacabe. Ti modo zanda guni ca binnigola zacá nga chinándacaʼ ejemplu stiʼ David, Elihú ne stiʼ Jesús. Biblia na: «Ora biuu Mefibóset xiiñiʼ Jonatán xiiñiʼ Saúl ra nuu David, bizuxibi xañeebe. Óraque guníʼ David: «¡Mefibóset!», oraqueca bicabi Mefibóset: «Raríʼ nuaaʼ para guneʼ ni naluʼ». Ne laaca na Biblia: «Yanna la? Job, rinabaʼ lii gucaadiágaluʼ ca diidxaʼ stinneʼ, ne bicaadiaga chaahuiʼ guiráʼ ni chitidxeʼ lii» (2 Samuel 9:6; Job 33:1, biindaʼ Lucas 19:5). Guiónnacabe bisihuínnicabe rizaaláʼdxicabe binni purtiʼ guníʼcabe tu lacaʼ. Pablu laaca biene pabiáʼ risaca guietenalaʼdxiʼ ne guiníʼ tu láʼ ca xpinni Cristu. Ra ziluxe carta ni bicaabe ra nuu ca xpinni Cristu de Roma, biseendabe diuxi ra nuu jma de veinticinco xpinni Cristu ne bizeetebe lacaʼ. Casi dxi bicaabe  ca diidxaʼ riʼ: «Laudii diuxi [...] hermana Pérsida ni nadxii nu» (Rom. 16:3-15).

⁷ Nuu binnigola raca nagana para laa guietenalaʼdxiʼ tu láʼ ca binni ni nuu ra ridagulisaa. Peru ora rúnicabe stipa pur guiníʼcabe lá cada tobi de laacaʼ la? zeeda gácani casi ora ñábicabe laacaʼ: «Nabé risácaluʼ para naa» (Éx. 33:17). Ne ora riníʼ ca binnigola lá cada tobi de cani racalaʼdxiʼ guicabi ora maʼ cayuundaʼ Torre sti ni rapa la? racaneni para chuʼ ca binni ridagulisaa jma nayecheʼ (zanda gúʼndaluʼ Juan 10:3).

8. Gunáʼ nga ti modo bisihuinni Pablu yenanda ejemplu stiʼ Jiobá ne stiʼ Jesús.

⁸ Sti modo para gacanenu chuʼ ca xpinni Cristu jma nayecheʼ nga gábinu laacaʼ pabiáʼ jneza modo cayúnicaʼ dxiiñaʼ, cásica biʼniʼ Pablu. Rihuinni dxichi zacá ni pur ni bicaabe lu guiropa carta biseendabe ra nuu ca binni de Corinto, luni bicaabe: «Nabé rieche nia laatu» (2 Cor 7:4). Nabé guluu ca diidxaʼ que gana ca xpinni Cristu de Corinto. Ne laaca bisisaca Pablu dxiiñaʼ ni cayuni xcaadxi binni ridagulisaa (Rom. 1:8; Filip. 1:3-5; 1 Tes. 1:8). Ne bizeetesibe lá Pérsida lu ti carta ni biseendabe Roma, guniʼbe: «Nabé huayuni be xhiiña señor» (Rom. 16:12). ¡Nanna dxíchinu nabé biecheʼ Pérsida! Ora bisisaca Pablu ni cayuni xcaadxi binni, bisihuinni yenanda ejemplu stiʼ Jiobá ne stiʼ Jesús (biindaʼ Marcos 1:9-11 ne Juan 1:47; Apoc. 2:2, 13, 19).

9. Xiñee riuʼnu jma nayecheʼ ora riguʼnu gana binni ne ora riguucabe gana laanu.

⁹ Ca binnigola nuu yanna laaca nánnacaʼ pabiáʼ risaca nga gábicaʼ ca xpinni Cristu risácacabe para laacaʼ (Prov. 3:27; 15:23). Ora rúnicabe zacá, casi ora niníʼcabe: «Cayuuyaʼ xi cayúniluʼ purtiʼ rizaaladxeʼ lii». Racá ridúʼyanu naquiiñeʼ guiníʼ ca binnigola diidxaʼ ni uguu gana ca xpinni Cristu. Ni guníʼ ti gunaa xpinni Cristu de 55 iza rusihuínnini ximodo riníʼ ique stale, laabe guniʼbe: «Ra runeʼ dxiiñaʼ nagabaʼ si nga binni reeda ra nuaaʼ para gabi naa jneza modo cayuneʼ xhiiñaʼ. Qué rizaaláʼdxicabe sti binni ne nisi maʼ cuyúbicabe modo tiidicabe lú stobi. Nga runi, riecheʼ ora gabi ti binnigola naa pabiáʼ risaca dxiiñaʼ cayuneʼ lade ca binni ridagulisaa. ¡Nabé rudiini stipa naa! Zacá nga rusihuinni Bixhozeʼ ni nuu guibáʼ pabiáʼ nadxii naa». Ti biaje gudxi ti binnigola caadxi diidxaʼ sicarú ti xpinni Cristu ni cusiniisi chupa xiiñiʼ stubi. Ximodo gucané ca diidxaʼ stiʼ binnigola riʼ laabe yaʼ. Guidúʼyanu xi guniʼbe: «Nabé guluu ca diidxaʼ que gana naa para guneʼ jma lu xhiiñaʼ Dios». Ora rusisaca ti binnigola dxiiñaʼ ni cayuni ca xpinni Cristu, riguuni gana laacaʼ ne riuucaʼ jma nayecheʼ. Zacá rudiicabe stipa laacaʼ para cadi guidxágacaʼ laga zecaʼ lu neza ra zacaacaʼ guendanabani (Is. 40:31).

10, 11. 1) Ximodo zanda chinanda ca binnigola ejemplu stiʼ Nehemías. 2) Xi zanda guni ca binnigola para gacanecaʼ ti xpinni Cristu «guiene chaahui [...] stiidxaʼ Dios».

¹⁰ Gunáʼ nga sti modo zanda gusihuinni ca binnigola rizaaláʼdxicaʼ ca xpinni Cristu ne gacanécabe laacaʼ chuʼcaʼ jma nayecheʼ yaʼ. Ora nagueendaca ruyúbicabe ximodo gacanécabe cani cadiʼdiʼ ra nagana (biindaʼ Hechos 20:28). Ora rúnicabe zacá rihuinni zinándacabe ejemplu stiʼ ca xpinni Dios ni guyuu dxiqué. Biblia ruzeeteʼ guluu Nehemías gana ca biʼchiʼ ora biiyaʼ nuucabe triste (Neh. 4:14). Ngaca nga ni runi ca binnigola tiempu riʼ, purtiʼ primeca laacaʼ ruyúbicaʼ ximodo iguidxi fe stiʼ ca bíʼchicaʼ  ne bizáʼnacaʼ. Pur nga rigánnacabe laacaʼ ralídxicaʼ, ne ora randa la? racanécabe laacaʼ para «guiene chaahui [caʼ] stiidxaʼ Dios» (Rom. 1:11). Xi zanda guni ca binnigola para uguucaʼ gana ca xpinni Cristu ora chigánnacaʼ laacabe yaʼ.

¹¹ Ante chigánnacabe tuuxa, naquiiñeʼ cueecabe tiempu para guiníʼ íquecabe ximodo nuu binni ne xi zanda gábicabe laa. Zanda guinabadiidxacabe laca laacabe: «Xi guendanagana cadiʼdiʼ xpinni Cristu riʼ. Xi zanda guinidu para uguʼdu gana laabe. Xi textu zanda gacané laabe. Ñee ruzeeteʼ Biblia de tuuxa ni gudiʼdiʼ ra cadíʼdibe riʼ la?». Pa guiníʼ íquecabe lu cani bizéʼtenu riʼ la? jma zanda gacanécabe binni ora chigánnacabe laa. Ora riganna ca binnigola ca xpinni Cristu, rudiicabe lugar guiniʼcaʼ xi cayuni sentircaʼ ne rucaadiágacabe laacaʼ (Sant. 1:19). Sicaríʼ guníʼ ti gunaa: «¡Nabé riuaaʼ nayecheʼ ora riuulaʼdxiʼ ti binnigola gucaadiaga naa!» (Luc. 8:18).

12. Tu caquiiñeʼ uguucabe gana lade ca binni ridagulisaa, ne xiñee.

¹² Pa lii nga tobi de ca binnigola riʼ, tu laa raʼbuʼ caquiiñeʼ chigannuʼ para uguuluʼ gana laa yaʼ. Pablu bidii conseju riʼ: «Lagapa [guiráʼ] ca xpinni Cristu». Guiráʼ ca binni ridagulisaa caquiiñecaʼ tu uguu gana laacaʼ, dede né cani rucheeche diidxaʼ ne ca precursor ni maʼ xadxí de cayuni xhiiñaʼ Jiobá. Xiñee caquiiñeʼ uguu ca binnigola gana ca binni riʼ yaʼ. Purtiʼ laaca riuu ora runi sentírcabe ruluíʼ maʼ qué zanda guni huantárcabe ca guendanagana nuu ndaaniʼ guidxilayú riʼ. Ni bizaaca rey David ti biaje rusihuinni naquiiñeʼ chuʼ tu gacané ca xpinni Dios, dede né cani maʼ xadxí de cuzuubaʼ diidxaʼ.

13. 1) Ximodo nuu David ora gucalaʼdxiʼ Isbí-benob nucaalú laabe. 2) Xiñee gunda gucané Abisai David nagueendaca.

¹³ Cadi xadxí de gulícabe David para  gaca rey, gudindenebe ti gigante láʼ Goliat, tobi de ca xiiñiʼ refaím. Guca David nadxibalú ne biiti laabe (1 Sam. 17:4, 48-51; 1 Crón. 20:5, 8). Gudiʼdiʼ si iza, dxi cadindenécabe ca filisteu, bidxaaga David sti gigante ni za de ca xiiñiʼ refaím. Hombre riʼ láʼ Isbí-benob (2 Sam. 21:16; biiyaʼ ni cá ñee yaza). Peru biaje riʼ bilá ñuuti gigante riʼ David. Xiñee yaʼ. Cadi pur bidxíbibe, sínuque purtiʼ birá stipa stibe. Relatu ca na maʼ bidxaga David, ne ora biʼyaʼ Isbí-benob nuube zaqué la? guníʼ zanda gunduuxeʼ laabe. Peru órapeʼ gucalaʼdxiʼ gigante que ñuuti laabe, bilá «Abisai xiiñiʼ Zeruyá» laabe ne biiti filisteu que (2 Sam. 21:15-17). ¡Bilá ñati David dxi que! Ngue runi bidiibe xquixe Abisai, purtiʼ qué nusaana de ñapa laabe ne nagueendaca bilá laabe. Xi rusiidiʼ relatu riʼ laanu yaʼ.

14. 1) Ximodo zanda gudxíʼlunu guendanagana naroʼbaʼ ni zeeda gaca casi Goliat. 2) Ximodo zanda gudii ca binnigola stipa laanu ne gacanecaʼ para chuʼnu nayecheʼ. Bizeeteʼ ti ejemplu.

¹⁴ Binidxabaʼ ne ca xpinni riguíxhecaʼ stale guendanagana nezalunu para gucueezacaʼ laanu de guni adorarnu Dios, neca zacá, cadi cusaana de gucheechenu diidxaʼ. Nuu de laanu huadiʼdiʼ guendanagana naroʼbaʼ biaʼ gigante Goliat. Peru huareʼnu de laacani purtiʼ runi crenu racané Jiobá laanu. Cumu stale nga ca cosa ni rudxíʼlunu ndaaniʼ guidxilayú riʼ la? nabé rusidxaga cani laanu ne ruluíʼ maʼ qué zanda guni huantarnu. Ora maʼ nuunu zacá, zanda gusaba intiica guendanagana laanu. Ne óraca nga riquiiñenu gueeda ti binnigola ra nuunu para gudii stipa laanu ne gacané laanu chuʼnu nayecheʼ sti biaje. Ti precursora de 65 iza guníʼ: «Raca ti tiempu nabé guyuaaʼ triste ne nabé ridxagaʼ ora chigucheecheʼ diidxaʼ. Biiyaʼ ti binnigola pabiáʼ maʼ bidxagaʼ ne gunabadiidxaʼ naa xi guendanagana cadideʼ. Biindanebe naa ti relatu zeeda lu Biblia ne galán modo guníʼnebe naa. Yenandaʼ ca conseju stibe ne guleenduáʼ stale cosa galán. ¡Rudieeʼ xquixe laabe purtiʼ biiyabe modo nuaaʼ ne nagueendaca gucanebe naa!». Ti ndaayaʼ nga nápanu binnigola ni nadxii laanu lade ca binni ridagulisaa, ni rizaalaʼdxiʼ laanu, ne cásica Abisai, nuucaʼ listu para gudiinacaʼ laanu ora caquiiñenu ni.

15, 16. 1) Xiñee nabé gunnaxhii ca xpinni Cristu Pablu. 2) Xiñee nabé nadxiinu ca binnigola nuu yanna.

¹⁵ Naroʼbaʼ nga dxiiñaʼ runi ca binnigola para ganda gápacaʼ ca binni ridagulisaa. Nuu tiru dede qué rasi ca binnigola ora maʼ cayuni orarcaʼ pur ca binni ridagulisaa o para gacanécabe laacaʼ (2 Cor. 11:27, 28). Peru rúnicabe dxiiñaʼ stícabe de guidubi ladxidóʼcabe ne nuucabe nayecheʼ. Rinándacabe ejemplu stiʼ Pablu, laa bicaa ra nuu ca xpinni Cristu de Corinto: «Dede nin xpida qué ziaʼya para ganda acaniá laatu iniisi tu» (2 Cor. 12:15). Nabé gunnaxhiibe ca bíʼchibe ne ca bizáʼnabe, ngue runi dede gulee xcaandabe para gucanebe laacaʼ (biindaʼ 2 Corintios 2:4; Filip. 2:17; 1 Tes. 2:8). ¡Ngue runi nabé gunnaxhii ca binni que laabe! (Hech. 20:31-38.)

¹⁶ Laanu laaca nadxiinu ca binnigola nuu yanna, ne ora runi orarnu Jiobá, rudiʼnu xquixe laa pur cayápacabe laanu. Cumu nabé rizaalaʼdxiʼ ca hombre riʼ laanu la? racanécabe para chuʼnu jma nayecheʼ, ne riguucabe gana laanu ora chigánnacabe laanu. Ne laaca rudiʼnu xquixe laacabe, purtiʼ nuucabe listu para gacanécabe laanu ora ruluíʼ maʼ qué zanda guni huantarnu ca guendanagana nuu ndaaniʼ guidxilayú riʼ. Dxandíʼ, racanécabe laanu para chuʼnu nayecheʼ.