Ni rinabadiidxaʼ cani ruundaʼ

Libru stiʼ Ezequiel 18:20 na «qué zuaʼ diʼ xiiñiʼ binni donda stiʼ bixhoze», peru Éxodo 20:5 ruzeeteʼ «redané [Jiobá] castigu pur guendaruchee stiʼ ca bixhoze luguiáʼ ca xiiñiʼ». Ñee jneza ni caníʼ guiropaʼ textu ca la?

Jneza ni caníʼ guiropaʼ textu ca. Xiñee yaʼ. Purtiʼ primé textu ca cusiéneni cada tobi nga zabidxi Dios cuenta laa pur cani cayuni, ne sti textu ca cusiene ora guchee tuuxa zanda guninani ca binnilidxi.

Lu capítulo 18 stiʼ Ezequiel caníʼ ni naquiiñeʼ guni cada binni. Lu versículo 4 ca na: «Alma ni guchee... zati». Peru xi zanda guizaaca ti hombre ni runi ni jneza yaʼ. «Zabánibe.» (Eze. 18:5, 9.) Nga runi, guiráʼ ca binni ni maʼ rudii cuenta zuni juzgar Dios laacaʼ pur cani gúnicaʼ (Eze. 18:30).

Ni bizaaca Coré ruluíʼ laanu zacá ni. Dxi zidiʼdiʼ ca israelita que lu desiertu, maʼ qué ñuulaʼdxiʼ diʼ levita ca dxiiñaʼ ni bidii Jiobá laa guni ne gucalaʼdxiʼ guni dxiiñaʼ ni runi cani ruzaaquiʼ guʼxhuʼ. Pur ngue la? laabe ne xcaadxi israelita bicaalúcabe Moisés ne Aarón, ca hombre ni gulí Jiobá. Cumu guchelúcabe gápacabe ti puestu ni qué zanda gápacabe la? ngue runi biiti Jiobá laacabe (Núm. 16:8-11, 31-33). Peru cumu ca xiiñiʼ Coré qué ñeegudicaʼ bixhózecaʼ ne cani bicaalú Moisés ne Aarón que la? qué niguixedícabe pur donda stiʼ bixhózecabe. Ne cumu qué nudxiidéchecabe Jiobá la? bilácabe (Núm. 26:10, 11).

Ximodo naquiiñeʼ guiénenu ca diidxaʼ ni zeeda lu Éxodo 20:5 yaʼ. Guidúʼndanu ca diidxaʼ ni cá ante ne despué de ca versículo ca. Ca diidxaʼ stiʼ textu ca zeeda cani lade  Chii Mandamientu ni bidii Dios ca israelita despué de bíʼninebe laacaʼ pactu stiʼ Ley que. Bicaadiagasícabe guiráʼ ni bieeteʼ ca la? guníʼcabe: «Guiráʼ ni maʼ guníʼ Jiobá gaca zúnidu cani» (Éxo. 19:5-8). Dede dxiqué guyuucabe tobi si ne Jiobá. Nga runi, ca diidxaʼ ni zeeda lu Éxodo 20:5 ca gucuácani para guidubi naca guidxi Israel que.

Dxi biʼniʼ ca israelita que ni na Jiobá la? guirácabe gucuaacabe ndaayaʼ (Lev. 26:3-8). Peru dxi maʼ bidxiidéchecabe Jiobá ne biʼniʼ adorárcabe sti dios la? maʼ qué niguudibe ndaayaʼ laacaʼ ne maʼ qué ñápadibe laacaʼ ne gúpacaʼ stale guendanagana (Jue. 2:11-18). Peru stale tu laa qué nudxiideche Dios ne bíʼnicaʼ guiráʼ ni na ca mandamientu stibe neca nabánicaʼ lade binni ni biʼniʼ adorar xcaadxi dios (1 Rey. 19:14, 18). Zándaca bidxaagalú ca xpinni Dios ni qué nusaana de ñuni ni nabe guendanagana pur donda stiʼ ca binni guidxi que, neca zaqué qué nusaana diʼ Jiobá de ñannaxhii laacabe ne de ñaca nachaʼhuiʼ ne laacabe.

Peru yendá ti ora jma maʼ bihuinni xi guiráʼ cosa dxabaʼ biʼniʼ ca israelita que ne maʼ qué ñusisácacabe lá Jiobá nezalú xcaadxi guidxi, pur ngue bidii Jiobá lugar chiné ca babilonio laacabe de esclavu. Ne guiráʼ ca israelita que nga biʼniʼ castigar Dios laacaʼ (Jer. 52:3-11, 27). Ne lu Biblia rieeteʼ nabé naroʼbaʼ donda gupa guidxi que purtiʼ biaʼ chonna o tapa generación bidxaagalú guendanagana pur cani biʼniʼ ca israelita ni qué nuzuubaʼ diidxaʼ que cásipeʼ modo bizeeteʼ Éxodo 20:5 que.

Stiidxaʼ Dios laacaʼ ruzeeteʼ de ca hombre ni qué ñuni ni jneza ne pur nga dede ne binnilídxicaʼ gucaná. Guietenaláʼdxinu de Elí, ni ruzaaquiʼ guʼxhuʼ que, laabe bidiibe lugar gaca ca xiiñibe ni ruzaaquiʼ guʼxhuʼ neca gúcacaʼ «hombre ni qué iquiiñeʼ» ni guyuunecaʼ ni cadi xheelacaʼ (1 Sam. 2:12-16, 22-25). Nabé bidxiichi Jiobá ora biʼyaʼ jma bisisaca Elí ca xiiñiʼ lugar de nusisácabe laa ne guníʼ Jiobá nin ti binnilidxi Elí maʼ qué zaca ni ruzaaquiʼ guʼxhuʼ. Guca ni guníʼ Jiobá ca ora guleecabe Abiatar, ti xiiñiʼ xiiñiʼ xhiaga Elí para maʼ cadi gaca ni ruzaaquiʼ guʼxhuʼ (1 Sam. 2:29-36; 1 Rey. 2:27). Sti binni ni bizaaca casi na Éxodo 20:5 nga Guehazí, mozo stiʼ Eliseo. Pur dxiiñaʼ ni gúpabe que gucaláʼdxibe ñáxhabe bueltu Naamán, xaíque stiʼ ca soldadu de guidxi Siria, pur biʼniʼ Eliseo ti milagru para bianda. Ngue runi, biquiiñeʼ Jiobá Eliseo ni riguixhená que para gabi laabe ca diidxaʼ riʼ: «Lepra ni gupa Naamán ca zacá ni lii ne cani za de lii ne qué ziuu dxi gusaana de gápatu ni» (2 Rey. 5:20-27). Ca ejemplu ni maʼ bidúʼyanu ca rusihuínnicani laaca gucaná binnilídxicabe pur donda stícabe.

Cumu Jiobá nga ni bizáʼ guiráʼ xixé cosa ne pur laabe nabáninu la? laabe nga nápabe derechu gúʼyabe pabiáʼ naquiiñeʼ gusabanabe cada binni. Ca ejemplu ni bidúʼyanu ca culuíʼcani laanu nuu biaje pur donda stiʼ binni racaná ca xiiñiʼ ne dede xiiñiʼ xiiñicaʼ. Peru naquiiñeʼ ganna dxíchinu runadiaga Dios ca binni ni ruyubi laa de guidubi ladxidóʼ, ne laabe racanebe laacaʼ ne riguixhedxibe ladxidoʼcaʼ (Job 34:28).

[Dibuju/foto ni zeeda lu yaza 29]

Coré ne xcaadxi binni ni bicaalú Moisés que gudíxecaʼ ni bíʼnicaʼ