EVANGELIU stiʼ Mateo ruzeeteʼ xi biʼniʼ Jesús: «Biuu be ndaani yuʼdu roʼ sti Dios, ne guladxi be irá cani cutoo ne ni cazíʼ ndaani yuʼdu que, ne bitiixhi be jmexa cani cuchaa bidxichi ne xpangu cani cutoo paloma. Ne na be rabi be laacaʼ: “Maca cá ni lu Xquiʼchi Dios ra na: «Lidxe nuu para iníʼ né cabe naa ndaaniʼ.» Peru laatu laga ma biʼni tu ni lidxi gubaanaʼ”» (Mat. 21:12, 13).

Historia stiʼ ca judíu rusihuinni ni guca aprovechar ca binni ni rutoo ndaaniʼ yuʼduʼ que de ca cliente sticaʼ purtiʼ nabé caru biʼniʼ cobrárcabe laacaʼ. Libru láʼ Misná (Keritot 1:7) ruzeeteʼ guyuu ti tiempu, lu primé siglu, chupa paloma ni rudiicabe para sacrificiu bisaca ti denariu de oro. Biaʼ runi ganar ti binni, ni cadi tan nanna de obra, veinticinco dxi dxiiñaʼ. Ley que rudii ni lugar gudii ti binni pobre guuguhuiiniʼ o paloma casi sacrificiu, peru cumu guizáʼ maʼ caru ridoocame la? maʼ qué randa rizíʼcabe laacame (Lev. 1:14; 5:7; 12:6-8). Nabé bichiichi ndiʼ rabinu Simeón ben Gamaliel, ngue runi gulee caadxi sacrificiu ni nexheʼ gudiicabe. Pur ngue la? biete biaʼ risaca chupa paloma que ti gayuaa biaje que biaʼ risácacame.

Pur ni maʼ bidúʼyanu riʼ, napa Jesús stale razón para gabi ca binni bitoo ndaaniʼ yuʼduʼ que «gubaanaʼ», purtiʼ nabé biquiichinacaʼ binni ne guchelucaʼ gápacaʼ jma.