Canabaʼ Jehová laanu gábinu laa intiica guendanagana nápanu o ni naguu xizaa laanu (Salmo 55:22). Zucaadiaga Dios laanu, gastiʼ naca pa naroʼbaʼ o pa nahuiiniʼ guendanagana ni nápanu. Pa caguu ni xizaa laanu la? laaca caguu ni xizaa Jehová. Oración ca nga primé cosa ni caquiiñeʼ gúninu para gatadxí guendabiaaniʼ stinu (Filipenses 4:6, 7).

Ora cayuniná xiixa guendahuará guendabiaaniʼ stinu la? zándaca guni sentirnu nuunu stúbinu. Ne nuu binni qué ziene diʼ ni cazaacanu (Proverbios 14:10). Peru zanda gábinu Dios xi guiráʼ cayuni sentirnu purtiʼ riénebe laanu ne rucaadiágabe laanu né stale paciencia. Cayuuyadxí Jehová laanu, guidubi ora cayuuyabe ca yuubaʼ cadídinu, nánnabe xi cudxíʼlunu, nga runi canábabe laanu guni orarnu laabe ora nuu intiica si cosa ni caguu xizaa laanu (2 Crónicas 6:29, 30).

Ora runi orarnu Jehová, jmaruʼ si runi crenu zanda gápabe laanu. Zacá zanda guininu ni guníʼ ti hombre bicaa Biblia, sicaríʼ gúdxibe Dios: «Maʼ biiyaluʼ guendananá stinneʼ; maʼ nannuʼ xi guiráʼ yuubaʼ cadideʼ» (Salmo 31:7). Ora maʼ biénenu nanna Jehová xi cazaacanu la? zudii nga stipa laanu para cadi gusaba ca guendanagana ca laanu. Cadi ruuyadxísibe xi yuubaʼ cadídinu. Laabe nga ni jma riene xi cazaacanu ne zanda gacanebe laanu gatadxí ladxidoʼno ne chuʼnu gana ora guidúʼndanu ni zeeda lu Biblia.