1. ¿Xi gudxi profeta Isaías ca israelita?

 PROFETA Isaías guníʼ naca Jehová «Dios ni dxandíʼ». Diidxaʼ ni biquiiñecabe lu hebreu para «ni dxandíʼ» riniʼni «amén» (Is. 65:16). Ne amén riniʼni «zacá gaca ni» o «dxandíʼ zacá ni». Stale biaje riquiiñeʼ diidxaʼ amén lu Biblia para ganna dxíchinu dxandíʼ ni riníʼ o ni runi Jehová o Jesús. Nga runi ca diidxaʼ ni guníʼ Isaías para ca israelita nayaʼniʼ ca ni: raca ca ni maʼ guníʼ Jehová dede ti principiu. Ne maʼ bisihuinni Jehová zacá ni, ra cayuni cumplir guiráʼ ca promesa stiʼ.

2. ¿Xiñee zanda guni crenu ca promesa ni maʼ guníʼ Jehová zazaaca despué? ¿Xi pregunta zacábinu lu artículo riʼ?

² Yanna, ¿laanu yaʼ? ¿Ñee runi crenu guiráʼ ni maʼ biʼniʼ prometer Jehová chiguni la? Biaʼ 800 iza despué de bibani profeta Isaías, bisiene apóstol Pablo xiñee zanda guni crenu guiráʼ ni maʼ biʼniʼ prometer Jehová laanu chiguni. Sicaríʼ guniʼbe de Dios: «Qué zanda diʼ gusiguiibe» (Heb. 6:18). ¿Cadi dxandíʼ qué zanda guiree nisa naxhi ne nisa naxí ti lugar ra ridá nisa la? Zaqueca nga Jehová, de laabe nga zeeda ni dxandíʼ nga runi, qué zanda gusiguiibe. Pur nga zanda guni crenu guiráʼ ni maʼ guníʼ Jehová dede né ca ni maʼ biʼniʼ prometerbe laanu chigúnibe. Lu artículo riʼ zacábinu ca pregunta riʼ: ¿xi maʼ biʼniʼ prometer Jehová laanu zazaaca? Ne ¿ximodo nanna dxíchinu zuni Jehová ni maʼ guníʼ?

3. a) ¿Gunáʼ nga tobi de ca promesa ni jma risaca ni napa ca xpinni Jehová? (Apocalipsis 21:​3, 4). b) ¿Xi riníʼ ique caadxi binni ora ridúʼndanenu laacaʼ promesa riʼ?

³ Promesa ni chiguzéʼtenu riʼ, naca ni tobi de ca promesa  nabé risaca para guiráʼ ca xpinni Dios ni nuu lu guidubi guidxilayú (biindaʼ Apocalipsis 21:​3, 4). Cayuni prometer Jehová «maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ». Nabé riquíʼñenu textu riʼ lu predicación para quixhedxinu ladxidóʼ binni ne gábinu laacaʼ ximodo zabani binni ndaaniʼ ti paraísu. ¿Xi riníʼ binni ora gunadiaga promesa riʼ yaʼ? Nuu tu riníʼ: «Nabé galán ni, peru nanna pa zaca ni yaʼ».

4. a) ¿Xi chupa cosa nanna Jehová? b) Despué de guníʼ Jehová de ti promesa sicarú, ¿xiruʼ biʼniʼ?

⁴ Ora biquiiñeʼ Jehová espíritu santu stiʼ para gúdxibe apóstol Juan gucaa promesa ni caníʼ de Paraísu riʼ, nánnabe zaquíʼñenu ni tiempu riʼ ora guni predicarnu. Laaca nánnabe zaca nagana para stale binni guni cré «ca cosa nacubi» ni maʼ biʼniʼ prometerbe (Is. 42:9; 60:2; 2 Cor. 4:​3, 4). Yanna, ¿ximodo zanda gacanenu xcaadxi binni ganna dxíchicaʼ zaca cumplir promesa ni riete lu Apocalipsis 21:​3, 4? ¿Ne xi zanda gacané laanu para iguidxi confianza ni nápanu Jehová ne lu ca promesa stiʼ? Cadi bizeeteʼ si Jehová de promesa sicarú riʼ, sínuque laaca bidiibe razón para gápanu confianza zácani. ¿Gunáʼ nga ca razón ca yaʼ?

5. ¿Gunáʼ nga ca versículo ra ridxélanu razón para guni crenu lu promesa stiʼ Jehová ne xi nácani?

⁵ Lu ca versículo ni zeeda riʼ zadxélanu razón para guni crenu promesa ni maʼ biʼniʼ Jehová ra caníʼ de Paraísu. Nani sicaríʼ: «Óraque ná ni zuba lu trono que: “¡Biiyaʼ! Cayuneʼ guiráʼ cosa nacubi”. Ne laaca guniʼbe: “Bicaa ca diidxaʼ riʼ purtiʼ zanda gápanu confianza ni ne dxandíʼ ni”. Ne gúdxibe naa: “¡Maʼ guca guiráʼ ni! Naa nga Alfa ne Omega, ra bizulú ne ra biluxe”» (Apoc. 21:​5, 6a).

6. ¿Ximodo racané ca diidxaʼ ni zeeda lu Apocalipsis 21:​5, 6 iguidxi confianza nápanu lu ca promesa stiʼ Jehová?

⁶ ¿Xiñee ruquidxi ca diidxaʼ riʼ confianza ni nápanu lu ca promesa stiʼ Jehová? Sicaríʼ cusiene libru Apocalipsis b ca versículo riʼ: «Casi ora ñuni firmar Jehová ti garantía o ti título de propiedad, ra caníʼ zedané ndaayaʼ para ca binni ni ruzuubaʼ diidxaʼ». Ridúʼndanu promesa stiʼ Jehová lu Apocalipsis 21:​3, 4 ne lu versículo 5 ne 6, casi ñaca nucaa Jehová firma stiʼ lu promesa riʼ ne zacá cayabibe laanu zuni cumplirbe ni. Yanna, guiduʼyaʼ chaahuinu xi riníʼ ca diidxaʼ ni biquiiñeʼ Jehová ora biʼniʼ promesa riʼ.

7. ¿Tuu nga ruzulú riníʼ lu versículo 5, ne xiñee risaca ni?

⁷ Nánnanu dxandíʼ zuni Dios ni maʼ guníʼ, purtiʼ sicaríʼ ruzulube promesa stibe: «Óraque ná ni zuba lu trono que» (Apoc. 21:5a). Nabé risaca ca diidxaʼ riʼ, purtiʼ chonna biaje guníʼ Jehová de ca visión ni zeeda lu Apocalipsis ne ndiʼ nga ca diidxaʼ ni biquiiñeʼ ora bizulú guniʼbe tobi de ca biaje riʼ. Raríʼ ridúʼyanu Jehová peʼ nga biʼniʼ promesa riʼ, cadi ti ángel ni napa poder ne ninca Jesús. Ruquidxi ndiʼ confianza stinu lu ca diidxaʼ ni zeeda despué, purtiʼ Jehová naca «Dios ni qué rusiguii» (Tito 1:2). Rihuinni dxíchica naquiiñeʼ gápanu stale confianza lu ca diidxaʼ ni cá lu Apocalipsis 21:​5, 6.

8. ¿Xi maʼ guníʼ Jehová para chuʼnu seguru zuni cumplir promesa stiʼ? (Isaías 46:10).

⁸ Yanna guidúʼyanu diidxaʼ «¡Biiyaʼ!» (Apoc. 21:5). Diidxaʼ griegu ni raca traducir «¡Biiyaʼ!» riete ni stale biaje lu Apocalipsis. Ti libru ná riquiiñeʼ diidxaʼ riʼ «para gábibe lector ca zeeda caadxi diidxaʼ risaca despué». ¿Xi zeeda despué yaʼ? Dios guníʼ: «Cayuneʼ guiráʼ cosa nacubi». Neca despué nga chiguni Jehová ca cosa riʼ, nanna dxíchibe zúnibe ca ni, nga runi, caniʼbe casi ora mápeca cayaca ca ni (biindaʼ Isaías 46:10).

9. a) ¿Xi riníʼ íquenu ora runadiáganu ca diidxaʼ «Cayuneʼ guiráʼ cosa nacubi»? b) ¿Xi zazaaca «guibáʼ» ne «guidxilayú» nuu yanna riʼ?

⁹ Yanna, guidúʼyanu xcaadxi diidxaʼ ni zeeda lu Apocalipsis 21:5: «Cayuneʼ guiráʼ cosa nacubi». Lu capítulo riʼ zeeda caadxi diidxaʼ ni rucaa laanu guiníʼ íquenu chupa cosa ni chiguni Jehová: cueebe ne guni chaahuibe. Primé, guininu de ca cosa ni chindeebe. Apocalipsis 21:1 ná: «Maʼ gudiʼdiʼ guibáʼ ne guidxilayú ni guyuu dxiqué». Guibáʼ ni maʼ gudiʼdiʼ ca zeeda gácani ca gobiernu ni nuu lu naʼ Binidxabaʼ ne ca demonio stiʼ (Mat. 4:​8, 9; 1 Juan 5:19). Riuu biaje riquiiñeʼ Biblia diidxaʼ «guidxilayú» para guiníʼ de ca binni nabeza ndaaniʼ ni (Gén. 11:1; Sal. 96:1). Nga runi, guidxilayú ni maʼ gudiʼdiʼ ca zeeda gácani ca binni malu ni nabeza ca dxi stinu riʼ. Raríʼ ridúʼyanu cadi chiguni chaahuiʼ diʼ Jehová «guibáʼ» ne «guidxilayú», sínuque zunduuxebe ca ni, ne zedanebe «ti guibáʼ cubi» ne «ti guidxilayú cubi», laani nga ti gobiernu nacubi ne binni ni guzuubaʼ diidxaʼ.

10. ¿Xi sti modo zuni Jehová «guiráʼ cosa nacubi»?

¹⁰ ¿Xi sti modo zuni Jehová «guiráʼ cosa nacubi»? (Apoc. 21:5). Zuni chaahuiʼ Jehová guidxilayú ne zacanebe binni gaca perfectu. Ne casi guníʼ profeta Isaías que, guidubi Guidxilayú riʼ zaca ti paraísu sicarú cásica guca jardín ni guyuu Edén que. Laaca zuni Jehová cada tobi de laanu nacubi. Zusianda Jehová ca binni ni qué rizá, ca ni qué ruuyaʼ, ca ni qué runadiaga ne dede zusibánibe ca ni maʼ guti (Is. 25:8; 35:​1-7).

11. ¿Xi gudxi Jehová Juan, ne xiñee?

¹¹ ¿Xi runi Dios para ganna dxíchinu zanda gápanu confianza laa? Gudxi Jehová Juan: «Bicaa ca diidxaʼ riʼ purtiʼ zanda gápanu confianza ni ne dxandíʼ ni» (Apoc. 21:5). Ne laaca bidii Jehová Juan ti razón para gucaa ca ni. Gúdxibe laa: «Purtiʼ zanda gápanu confianza ni ne dxandíʼ ni», ni ná ni nga biaʼsi guiráʼ ni cá lu Stiidxaʼ Dios ne qué ruchee ca ni. ¡Aque galán nga bizuubaʼ Juan stiidxaʼ Jehová ne bicaa ca ni! Pur nga, zanda guidúʼndanu promesa stiʼ Dios ora guníʼ zuni Guidxilayú riʼ ti paraísu ne galán guiníʼ íquenu ca ndaayaʼ ni cabeza laanu.

12. ¿Xiñee zanda guiníʼ Jehová «¡Maʼ guca guiráʼ ni!»?

¹² ¿Xiruʼ guníʼ Jehová yaʼ? «¡Maʼ guca guiráʼ ni!» (Apoc. 21:6). Raríʼ caníʼ Jehová casi ñaca maʼ guca guiráʼ ni maʼ biʼniʼ prometer de paraísu ca. Ne nuu razón para guni crenu ni, purtiʼ gastiʼ zanda gucueeza laabe de guni cumplirbe ni maʼ gudixhe íquebe gúnibe. Yanna, ¿xi maʼ guníʼ Jehová para gacané laanu ganna  dxíchinu zuni cumplirbe promesa ni maʼ bíʼnibe riʼ yaʼ?

13. ¿Xiñee riníʼ Jehová: «Naa nga Alfa ne Omega»?

¹³ Casi maʼ bizéʼtenu, lu ca visión ni gucuaa Juan, Jehová peʼ guníʼ chonna biaje (Apoc. 1:8; 21:​5, 6; 22:13). Lu cada tobi de laacani guníʼ Jehová: «Naa nga Alfa ne Omega». Ruzulú alfabeto griegu né letra Alfa, ne riluxené ni letra omega. Cumu Jehová nga «Alfa ne Omega» la? rusihuínnini ora ruzulube xiixa la? runduuxebe ni.

14. a) Bizeeteʼ ti ejemplu ora guníʼ Jehová «Alfa» ne padxí zaniʼbe «Omega». b) Pur ni ná Génesis 2:​1-3, ¿xi nanna dxíchinu zuni Jehová?

¹⁴ Despué de bizáʼ Jehová Adán ne Eva, gúdxibe laacaʼ xi naguixhe íquebe gúnibe para binni ne para Guidxilayú. Sicaríʼ ná Biblia: «Ne guluu Dios ndaayaʼ laacabe ne gudxi laacabe: “Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni”» (Gén. 1:28). Ra guníʼ Jehová ni naguixhe ique guni, raqué nga casi ñaca niniʼbe «Alfa». Ziuu dxi zaca ca ni zá de Adán ne Eva perfectu ne zuzuubacaʼ diidxaʼ, zuchacaʼ guidxilayú riʼ de xiiñicaʼ ne zúnicaʼ ni ti paraísu. Ne ora gaca nga casi ñaca niníʼ Jehová «Omega». Ne despué de bizáʼ Jehová «guibáʼ ne Guidxilayú ne guiráʼ ni nuu ndaaniʼ ca ni», guníʼ Jehová xiixa para gusihuinni dxandíʼ peʼ zuni ni maʼ gudixhe ique. ¿Xii ni yaʼ? Guniʼbe naca dxi gadxe sagradu (biindaʼ Génesis 2:​1-3). ¿Xi riníʼ nga yaʼ? Guleechú Jehová dxi gadxe para guni cumplir ni maʼ gudixhe ique para binni ne para Guidxilayú. Ne ra guiluxe dxi gadxe ca, ra ca nga gaca cumplir guiráʼ ni maʼ gudixhe ique Jehová.

15. ¿Xiñee ruluíʼ maʼ qué zanda guni cumplir Jehová ni maʼ gudixhe ique?

 ¹⁵ Despué de bicaalú Adán ne Eva Jehová, beeda gácacaʼ binni ruchee ne bicaacaʼ pecadu ne guendaguti ca ni zá de laacaʼ (Rom. 5:12). ¿Ñee nucueeza ni bizaaca riʼ Jehová de ñuni ni maʼ gudixhe ique: guchá Guidxilayú riʼ de binni ni ruzuubaʼ diidxaʼ ne gácacaʼ perfectu la? ¿Ñee qué ziuu dxi guiníʼ Jehová «Omega» pur ni biʼniʼ Binidxabaʼ la? Ruluíʼ si zacá ni. Zándaca guníʼ Binidxabaʼ huaxiéʼ si tu zanda guni ni ná Jehová. Guzéʼtenu ti ejemplu, ñándaca nunitilú Jehová Adán ne Eva, ne nuzáʼ sti hombre ne sti gunaa ni qué gapa donda para ñuni ni maʼ gudixhe ique para binni guidxilayú. Peru pa ñuni Jehová nga la? niníʼ Binidxabaʼ rusiguiibe. ¿Xiñee yaʼ? Purtiʼ casi ná Génesis 1:​28, gudxi Jehová Adán ne Eva zadxá Guidxilayú riʼ de ca ni zá de laacaʼ.

16. ¿Xiñee ñándaca niníʼ ique Binidxabaʼ qué runi cumplir Jehová ca ni riguixhe ique?

¹⁶ ¿Xi sti cosa guníʼ ique Binidxabaʼ ñándaca ñuni Jehová yaʼ? Zándaca guníʼ ique Binidxabaʼ zudii Jehová lugar gapa Adán ne Eva xiiñicaʼ, peru qué ziuu dxi gácacaʼ perfectu (Ecl. 7:20; Rom. 3:23). Pa ñaca zacá ni, niniʼbe qué riree ca ni riguixhe ique Dios jneza. ¿Xiñee yaʼ? Purtiʼ qué ñanda ñaca cumplir ni maʼ gudixhe ique Jehová: nidxá Guidxilayú riʼ de binni sin donda.

17. Ra bicaalú Binidxabaʼ, Adán ne Eva Dios, ¿xi biʼniʼ Jehová para biʼniʼ chaahuiʼ ni, ne ximodo guiluxe guiráʼ ni? (Biiyaʼ imagen ca).

¹⁷ Dede qué nidxela Binidxabaʼ xi niníʼ ora biʼyaʼ ximodo biʼniʼ chaahuiʼ Jehová guendanagana ni guyuu pur bicaalube ne bicaalú Adán ne Eva Dios (Sal. 92:5). Ra bidii Jehová lugar gapa Adán ne Eva xiiñiʼ la? Bisihuínnini qué rusiguiibe, sínuque rúnibe guiráʼ ni riniʼbe. ¿Ximodo yaʼ? Ra bidiibe ca ni zá de Adán ne Eva tuuxa «ni zá» de gunaa que ni zulá laacaʼ, ne zacá biʼniʼ seguir propósitu stibe (Gén. 3:15; 22:18). Qué niníʼ ique Binidxabaʼ pa niquiiñeʼ Jehová ti rescate para nulá binni guidxilayú. ¿Xiñee yaʼ? Purtiʼ rusihuinni rescate ca guendarannaxhii ni napa Jehová binni (Mat. 20:28; Juan 3:16). Ne cumu ruyubi Binidxabaʼ puru si para laa, qué zanda guni sentir guendarannaxhii riʼ. Yanna, ¿xi zazaaca pur rescate  ca yaʼ? Ra guiluxe ti mil iza, ca ni zá de Adán ne Eva, ca ni bizuubaʼ diidxaʼ ne maʼ nácacaʼ perfectu zabánicaʼ ndaaniʼ ti paraísu lu Guidxilayú riʼ cásica maca gudixhe ique Jehová gúnini. Óraca nga maʼ zanda guiníʼ Jehová «Omega».

18. ¿Xi chonna razón rudii Jehová laanu para gápanu confianza lu ca promesa stiʼ? (Biiyaʼ cuadru ni láʼ « Chonna razón para gápanu confianza lu ca promesa stiʼ Jehová»).

¹⁸ Lu artículo riʼ maʼ bizíʼdinu caadxi razón ni zacané laanu gánnanu dxandíʼ peʼ zaca Guidxilayú riʼ ti paraísu. ¿Xi zanda gábinu binni para ganna dxíchicaʼ dxandíʼ peʼ zuni cumplir Jehová promesa stiʼ yaʼ? Primé, Jehová peʼ cayuni promesa riʼ. Lu libru stiʼ Apocalipsis ná: «Óraque ná ni zuba lu trono que: “¡Biiyaʼ! Cayuneʼ guiráʼ cosa nacubi”». Racaláʼdxibe guni cumplirbe promesa stibe ne zanda gúnibe ni purtiʼ nuu xpiaanibe ne nápabe poder. Guiropa, dxandíʼ peʼ zúnibe ni, pur nga guniʼbe: «Bicaa ca diidxaʼ riʼ purtiʼ zanda gápanu confianza ni ne dxandíʼ ni». Ne guníʼrube: «¡Maʼ guca guiráʼ ni!». Guionna, ora ruzulú Jehová xiixa, runduuxeʼ ni. Ne nga peʼ nga rusihuinni ca diidxaʼ riʼ: «Naa nga Alfa ne Omega». Zusihuinni Jehová rusiguii Binidxabaʼ ne qué riree guiráʼ ni runi jneza.

19. ¿Xi zanda gúniluʼ pa raca nagana para tuuxa guni cré zaca Guidxilayú riʼ ti paraísu?

¹⁹ Cadi guiaandaʼ lii, ora riníʼneluʼ tuuxa dxandíʼ zuni Dios ni maʼ guníʼ, ruquidxi ni confianza ni nápaluʼ lu ca promesa stibe. Nga runi, sti biaje gúʼndaneluʼ binni promesa sicarú ni zeeda lu Apocalipsis 21:​4, ra caníʼ zaca Guidxilayú riʼ ti paraísu, ne tuuxa gabi lii: «Galán ni, ¿peru nanna pa dxandíʼ zaca ni yaʼ?». Yanna, ¿xi zanda gúniluʼ yaʼ? Zanda gúʼndaluʼ ne gusiéneluʼ laabe ca versículo 5 ne 6. Biluíʼ laabe ximodo Jehová peʼ maʼ guníʼ dxandíʼ zuni ca promesa stiʼ; casi ñaca nucaabe firma stibe luni (Is. 65:16).