¿Xi rusiidiʼ ca profeta laanu de Dios?
Maʼ raca stale iza, biquiiñeʼ Dios profeta para chiné mensaje risaca stiʼ ra nuu binni. ¿Ñee cayabi Dios laanu lu ca mensaje stiʼ xi caquiiñeʼ gúninu para uguu ndaayaʼ laanu la? Cayabi pue. Guidúʼyanu xi zanda guizíʼdinu de ni guníʼ chonna profeta ni bizuubaʼ stiidxaʼ Dios.
ABRAHÁN
Biaʼca risaca guiráʼ binni para Dios ne racaláʼdxibe uguube ndaayaʼ laacaʼ.
Gudxi Dios ca diidxaʼ riʼ profeta Abrahán: «Zaguaaʼ ndaayaʼ guiráʼ familia nuu lu guidxilayú pur ni za de lii» (Génesis 12:3).
¿Xi rizíʼdinu? Guizáʼ nadxii Dios laanu ne racalaʼdxiʼ uguu ndaayaʼ guiráʼ familia (hombre, gunaa ne xcuidi) ni guzuubaʼ stiidxabe.
MOISÉS
Riá Dios binni ne riguu ndaayaʼ ca ni runi stipa pur gunibiáʼ chaahuiʼ laabe.
Dios ni jma napa poder bidii poder profeta Moisés para guni milagru. Neca zacá, gudxi Moisés Dios: «Bisiidiʼ naa neza stiluʼ ti gunebiaʼyaʼ lii ne cadi gusaana de chuuláʼdxiluʼ ni runeʼ» (Éxodo 33:13). Guizáʼ guyuulaʼdxiʼ Dios ni gunabaʼ Moisés laa ne bidii laabe guendabiaaniʼ, gucané laabe gunibiaʼbe laa ne ca ni runi. Ne laaca biziidiʼ Moisés naca Dios ni bizáʼ guiráʼ cosa «ti Dios ni napa misericordia ne riá» binni (Éxodo 34:6, 7).
¿Xi rizíʼdinu? Zaguu Dios ndaayaʼ guiráʼ (hombre, gunaa ne xcuidi) ni guni stipa pur gunibiáʼ chaahuiʼ laabe. Lu Stiidxabe rábibe laanu ximodo caquiiñeʼ guni adorarnu laabe ne pabiáʼ rápabe gana uguube ndaayaʼ laanu.
JESÚS
Biá Jesús binni ne bisianda guiráʼ clase guendahuará.
Qué zusaana Dios de uguu ndaayaʼ laanu pa guizíʼdinu de ni biʼniʼ ne ni bisiidiʼ Jesús.
Nabé ruzeeteʼ Biblia de ni biʼniʼ ne ni bisiidiʼ Jesús dxi bibani lu Guidxilayú riʼ. Bidii Dios poder Jesús para guni stale milagru, casi gusianda ca ni qué ruuyaʼ, ca ni qué runadiaga ne ca ni nachiitaʼ ñee. Dede bisibánibe caadxi binni ni maʼ guti. Zacá bisihuinni Jesús xi zuni Dios pur laanu lu ca dxi ni zeeda ca. Bisiénebe xi caquiiñeʼ gúninu para guicaanu ca ndaayaʼ riʼ, sicaríʼ guniʼbe: «Ne zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3).
Guca Jesús nachaʼhuiʼ, nadóʼ ne biabe binni. Cásica hombre ne gunaa de gadxé gadxé iza bíʼnicabe ni ná ca diidxaʼ guníʼ Jesús riʼ: «Laguiziidiʼ de naa, purtiʼ nacaʼ ti binni nadóʼ ne dxandíʼ humilde naa. Zaziiláʼdxitu ra nuaa» (Mateo 11:29). Maʼ gadxé guca Jesús de ca hombre ni biʼniʼ menu ca gunaa dxiqué, purtiʼ gúcabe nachaʼhuiʼ ne biʼniʼ respetarbe laacaʼ.
¿Xi rizíʼdinu? Rizíʼdinu guizáʼ gunnaxhii Jesús binni ne bisaanabe ti ejemplu de ximodo caquiiñeʼ guni tratarnu xcaadxi.
CADI JESÚS NGA DIOS
Biblia rusiidiʼ laanu «ti Dios si nga nuu» ne Jesucristu nga mensajeru humilde stiʼ Dios (1 Corintios 8:6). Guníʼ Jesús jma risaca Dios que laa ne Dios nga biseendaʼ laabe lu Guidxilayú (Juan 11:41, 42; 14:28). *
^ párrafo 17 Pa racaláʼdxiluʼ gánnaluʼ jma de Jesucristu, biiyaʼ sección 8 ne 9 stiʼ folletu La fe verdadera, la puerta a una vida feliz, zanda guidxélaluʼ ni lu sitiu www.isa4310.com.
