Maʼ bidii Dios laanu ti regalu nabé galán: guinínenu ne gábinu laabe ni runi sentirnu. Gudxi profeta David Dios ca diidxaʼ riʼ: «Ra nuuluʼ, ni rucaadiaga oración, zadxiña guiráʼ clase binni ra nuuluʼ» (Salmo 65:2). Peru ¿ximodo caquiiñeʼ guni orarnu para gucaadiaga ne uguu ndaayaʼ Dios laanu yaʼ?

Salmo 62:8 ná: «Laguxheleʼ ladxidoʼto nezalube». Ora runi orarnu Dios, zanda gábinu laabe xi guiráʼ nuu ndaaniʼ ladxidoʼno. Guizáʼ rusisaca Dios ni jma napa poder ca oración ni riree de ndaaniʼ ladxidoʼno.

Napa Dios stale título, casi Dios ni bizáʼ guiráʼ xixé cosa, ni napa misericordia ne nachaʼhuiʼ, peru ti lá si nápabe. Isaías 42:8 ná: «Naa nga Jehová. Nga nga laʼyaʼ». Lá Dios Jehová la? zeeda ni biaʼ gadxe mil biaje lu Biblia. Stale profeta biquiiñeʼ lá Dios ora guníʼnecaʼ laabe. Sicaríʼ guníʼ profeta Abrahán: «Jehová, [...] rinabaʼ lii, gudiiluʼ lugar» guinieniaruaʼ lii (Génesis 18:30). Laanu laaca naquiiñeʼ guininu lá Dios, Jehová, ora guni orarnu.

Riene Dios ni riníʼ íquenu ne ni runi sentirnu intiica si diidxaʼ rininu. Stiidxabe ná: «Biaʼca risaca guiráʼ binni nezalú Dios, ne runi aceptar ca ni ridxibi laa ne rúnicaʼ ni jneza, intiica guidxi laacaʼ» (Hechos 10:34, 35).

Peru para uguu Dios ndaayaʼ laanu la? cadi caquiiñeʼ si guni orarnu. Lu xcaadxi tema ca zazíʼdinu xiruʼ caquiiñeʼ gúninu.