Tuuxa ni nabé xhamígunu zanda gacané laanu ora cadídinu lu xiixa guendanagana. Stale tu ná qué runi Dios gastiʼ pur laanu ne pur nga cadi xhamígube laanu. Peru maʼ stale cosa biʼniʼ Dios pur laanu ne maʼ cadi candaa zabeebe guiráʼ guendanagana ridídinu ne ca yuubaʼ ni runiná laanu. ¿Xi chiguni Dios yaʼ?

Zabee Dios guiráʼ ca cosa malu ca dede xcu. Biblia cusiene gunáʼ nga xcu ca cosa malu riʼ: «Naaze dxiichi binidxaba idubi guidxilayú» (1 Juan 5:19). Laaca de laabe nga bizeeteʼ Jesús ora guníʼ «ni runi mandar ndaani» guidxilayú (Juan 12:31). Ni runi de que chuʼ ca guendanagana ni runiná binni guidxilayú nga Binidxabaʼ. ¿Xi chiguni Dios para gaca chaahuiʼ ni yaʼ?

Maʼ cadi candaa zaquiiñeʼ Jiobá Xiiñiʼ para gunitilú «Binidxabaʼ, ni napa poder para guuti» (Hebreos 2:14, TNM; 1 Juan 3:8). Dede Biblia ná «nanna [Binidxabaʼ] ma huaxiéʼ dxi napa» para guinitilú (Apocalipsis 12:12). Laaca zunitilú Dios ca binni malu (Salmo 37:9; Proverbios 2:22).

Despué de cuee Dios ni bizáʼ laanu ca cosa malu, zuni cumplir guiráʼ ni maʼ biʼniʼ prometer para binni ne Guidxilayú. ¿Ximodo zabani binni yaʼ?

Ziuu guendariuudxi ne maʼ qué ziuu tu guchibi binni. «Cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxi» (Salmo 37:11).

Ziuu stale guendaró. «Ziuu stale biidxiʼ lu guidxilayú; lu ca dani ca jma stale ziuu» (Salmo 72:16).

Zapa binni lidxi ne zápacaʼ dxiiñaʼ ni zusiecheʼ laacaʼ. «Zucuícabe yoo ne zabézacabe ndaaniʼ ni ne zudxiibacabe lubáʼ uva ne zócabe cuananaxhi stini. [...] Ne ziecheʼ ca binni ni maʼ gulieeʼ ora guireendú guiráʼ dxiiñaʼ gúnicaʼ» (Isaías 65:21, 22).

¿Ñuuláʼdxiluʼ nibániluʼ ndaaniʼ ti Guidxilayú zacá la? Maʼ cadi candaa dxandíʼ zacá cumplir guiráʼ ni.

Ca dxi nabáninu riʼ, guiranu raca huaranu ne rátinu, peru maʼ cadi candaa zuchaa modo nabáninu. Ra gutiʼ Jesús pur laanu, Jiobá zuni de que «irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). ¿Ximodo zabani binni yaʼ?

Maʼ qué ziuu guendahuará. «Guirutiʼ tu cueza racá zaníʼ: “Huaraʼyaʼ”. Guiráʼ binni cueza lu guidxilayú riʼ nga cani maʼ bitiidiláʼdxibe stonda» (Isaías 33:24).

Maʼ qué ziuu guendaguti. «Zábibe guendaguti ne maʼ qué ziuu dxi chuʼ ni, ne Jiobá, Señor ni jma nandxóʼ, zuchaa nisa rieeteʼ lú guiráʼ binni» (Isaías 25:8).

Zabani binni sin chuʼ dxi gatiʼ. «Purti ni riaxa pecadu nga enda guti, peru ni rudii Dios nga enda nabani ni qué zaluxe, pur Cristu Jesús Señor stinu» (Romanos 6:23).

Ziasa ca binni ni maʼ guti. «Naa rune cre zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15). Laaca zabeendú ca binni ni maʼ guti ni galán pur ni gudixe Jesús pur laanu.

¿Xi chiguni Dios para gaca guiráʼ ndiʼ yaʼ?

Zuni cumplir Dios ni maʼ naguixhe ique para binni ne para Guidxilayú riʼ pur gobiernu stiʼ Jesucristu ni nuu guibáʼ (Salmo 110:1, 2). Laani nga bisiidiʼ Jesús ca xpinni guinabaʼ lu oración ora guníʼ: «Bixhózedu ni nuu guibáʼ, [...] gueeda Reinu stiluʼ» (Mateo 6:9, 10, TNM).

Zuni mandar Reinu stiʼ Dios lu Guidxilayú ne zabee guiráʼ yuubaʼ ne guendananá ni nuu. Gástiruʼ stiʼ gobiernu casi laani. Nga runi nabé biʼniʼ Jesús stipa pur guiníʼ de «ca noticia galán stiʼ Reinu» tiempu bibani lu Guidxilayú ne laaca biʼniʼ mandarbe ca discípulo stibe guiníʼ cani (Mateo 4:23; 24:14, TNM).

Zuni Jiobá guiráʼ ca cosa sicarú riʼ purtiʼ guizáʼ nadxii laanu. ¿Ñee cadi rucaa nga lii gúniluʼ stipa pur gunibiaʼluʼ laabe jma ne gaca xhamíguluʼ laabe la? ¿Xi ndaayaʼ zacaaluʼ pa gúniluʼ ni yaʼ? Guidúʼyanu ni lu sti artículo ca.