Ganna binni xii nga ni jneza ne ni cadi jneza, laaca laani nga ni rábicabe valor moral. Ne ca valor moral nápabe ca qué ruchaa diʼ cani, purtiʼ biziidibe gúnibe ni jneza neca guirutiʼ tu cayuuyaʼ laabe.

Ca dxi nabáninu riʼ, ca compañeru de ra scuela, música, ca película ne ca programa ni ridiʼdiʼ lu televisión, maʼ gadxé modo rusiidiʼ cani ca xcuidi xii nga ni jneza ne ni cadi jneza. Dede zanda gucaa cani ca xcuidi guiníʼ íquecaʼ pa biaʼsi ni rusiidiʼ bixhózecaʼ ne jñaacaʼ laacaʼ.

Ndiʼ nabé rizaacaʼ ni lu adolescencia. Ti libru ni láʼ Beyond the Big Talk (Después de “la charla padre e hijo”) ruzeeteʼ ca joven ca «naquiiñeʼ chuʼcaʼ listu para gudxiilucaʼ presión ni cuʼ ca xcompañérucaʼ ne ca medio de comunicación laacaʼ para gúnicaʼ ni racaláʼdxicaʼ ne zacá chuulaʼdxiʼ binni laacabe o gácacabe popular. Naquiiñeʼ guiziidicabe guicaacabe decisión ne chinándacabe guiráʼ ni huasiidiʼ bixhózecabe ne jñaacabe laacabe, neca ca xhamígucabe guni gadxé cosa». Nga runi ante chindácabe lu adolescencia nga naquiiñeʼ gusiidiʼ ca padre xiiñicaʼ xii nga ni jneza ne ni cadi jneza.

Bisiidiʼ laacaʼ gánnacaʼ xii nga ni jneza ne ni cadi jneza

CONSEJU ZEEDA LU BIBLIA: Peru ca binni huaniisi la? «nga cani ma nanna uná nga jneza ne uná nga ni cadi jneza» (Hebreos 5:14).

• Guníʼ pa jneza ti cosa o pa coʼ. Biquiiñeʼ ca cosa ni rizaacaʼ. Quíxhenu caadxi ejemplu, casi ora tuuxa binni gusiguii zanda guiniʼluʼ «cadi jneza diʼ nga», peru pa xiiñiluʼ guníʼ ni dxandíʼ, zanda guiniʼluʼ «jneza bíʼniluʼ». Ora qué gacané tuuxa ti binni maʼ huaniisi zanda guiniʼluʼ, «qué ñaca diʼ binni ca nachaʼhui», peru pa gucané xiiñiluʼ tuuxa binni maʼ huaniisi, zanda guiniʼluʼ, «guizáʼ nachaʼhui gúcaluʼ». Ra tidiʼ tiempu zaziidiʼ xiiñiluʼ guni guiráʼ ni gusiidiluʼ laa jneza.

• Bisiene xiñee naquiiñeʼ chinándacabe ni cusiidiluʼ laacabe. Guniʼné xiiñiluʼ para ganda gacaneluʼ laa guni educar conciencia stiʼ. Zanda guinabadiidxaluʼ laabe: «¿Xiñee jma jneza gácaluʼ honradu?», «¿Xiñee zanda gunítiluʼ ca xhamíguluʼ pa gusiguiiluʼ?» o «¿Xiñee malu nga cuanaʼ binni?».

• Bisiene laacabe xi zabeendúcabe pa gúnicabe ni jneza. Zanda gábiluʼ xiiñiluʼ: «Pa qué gusiguiiluʼ ne qué cuánaluʼ, zapa binni confianza lii» o «Pa nacháʼhuiluʼ ziuulaʼdxiʼ binni chuʼ gaxha de lii».

 Biʼniʼ stipa para guihuinni runi familia stiluʼ ni jneza

CONSEJU ZEEDA LU BIBLIA: «Siempre laguuyaʼ tu clase binni nácatu» (2 Corintios 13:5, TNM).

• Familia stiluʼ napa xidé guni ni jneza, ti zacá ganda guiniʼluʼ de idubi ladxidoʼloʼ:

  • «Laadu la? qué rusiguiidu».

  • «Ra lídxidu la? guirutiʼ riníʼ xhaataʼ ne guirutiʼ riguiñe stobi».

  • «Laadu la? qué runi insultardu binni».

Zacá la? zuuyaʼ xiiñiluʼ ca valor moral ca cadi naca si cani regla ni caquiiñeʼ chinándacaʼ, sínuque rusihuinni cani modo naca familia stitu.

• Biquiiñeʼ ca cosa ni rizaaca para guiníʼneluʼ xiiñiluʼ de ca cosa ni huasiidiluʼ laa, o ca valor moral napa familia stitu. Zanda guchaagaluʼ ni né cani huasiidicabe ca xcompañérube o ca cosa ni rusiidicabe lu televisión o Internet. Zanda guinabadiidxaluʼ laabe: «¿Xi ñúniluʼ lii?» o «¿Xi rábiluʼ ñuni familia stinu?».

Biʼniʼ stipa para ganda guni ca xiiñiluʼ ni jneza

CONSEJU ZEEDA LU BIBLIA: «Lagapa ti conciencia nayá» (1 Pedro 3:16, TNM).

• Biʼniʼ felicitar laabe ora gúnibe ni jneza. Ora chinanda xiiñiluʼ ca cosa ni huasiidiluʼ laa, biʼniʼ felicitar laabe ne bisiene laabe xiñee jneza ni bíʼnibe. Zanda gábiluʼ laabe: «Nuaaʼ orgulloso de lii, purtiʼ gúcaluʼ honradu». Pa gabi xiiñiluʼ lii biʼniʼ xiixa cosa ni cadi jneza, ante cuʼ jnézaluʼ laabe, bidii xquíxepeʼ laabe pur cayábibe ni lii.

• Guluu jneza laabe pa bicheebe. Gucané xiiñiluʼ gaca responsable né guiráʼ ni guni. Naquiiñeʼ ganna ca xcuidi xi cosa cadi jneza bíʼnicaʼ ne xiñee ndaaniʼ familia stitu cadi nácatu zacá. Nuu padre qué riná guni ni, purtiʼ riníʼ ique zuni sentir xiiñiʼ mal, peru pa guiníʼneluʼ xiiñiluʼ de ca cosa ni cadi jneza biʼniʼ, zacané ni laa guni educar conciencia stiʼ ne ganna xii nga ni jneza ne ni cadi jneza.