Guni perdonarnu riníʼ ni gusiaandanu ni guni tuuxa laanu ne cadi guidaʼnu xiana. Ndiʼ qué riníʼ cadi guizaaláʼdxinu ni guca o guiníʼ íquenu qué nizaaca gastiʼ.

CONSEJU ZEEDA LU BIBLIA: «Laguni huantarsaa ne laguni perdonar de guidubi ladxidoʼto ni guni stobi laatu» (Colosenses 3:13).

Aaron guníʼ: «Ora nadxiiluʼ tuuxa, qué ruuyaluʼ ra cucheebe, sínuque ca cosa galán ni rúnibe».

Pa guidaʼnu xiana zanda guni huará ni ne guniná ni laanu, dede zándaca guindaani xquendaxheelanu.

Julia bizeeteʼ: «Ti biaje gunabaʼ xheelaʼ naa guneʼ perdonar laa pur ti cosa ni nabé bininá naa, neca guca nagana para naa, peru bineʼ perdonar laabe. Nuu biaje riníʼ iqueʼ xiñee qué ñuneʼ perdonar laabe nagueenda, purtiʼ pa ñaca ñuneʼ ni, qué ñacaná peʼ xquendaxheelaʼ».

GUNÍʼ IQUE NDIʼ

Ora guni xheelaluʼ xiixa ni guniná lii, guníʼ iqueʼ ndiʼ:

• ¿Ñee nadaluʼ la?

• ¿Ñee naquiiñeʼ peʼ guinabaʼ xheelaluʼ perdón lii la? o randa rusiaandaluʼ ni?

GUNIʼNÉ XHEELALUʼ

• ¿Pabiáʼ rindaa para guni perdonarnu?

• ¿Xi zanda gúninu para guni perdonarnu nagueenda?

NI CAQUIIÑEʼ GÚNILUʼ

• Ora guniná xheelaluʼ lii, cadi guiníʼ íqueluʼ laapebe bíʼnibe ni.

• Biʼniʼ stipa guiéneluʼ xheelaluʼ, ne cadi guiaandaʼ lii «guiranu rucheʼnu stale biaje» (Santiago 3:2).

Kimberly ná: «Cadi nagana guni perdonardu ora guirópadu bicheʼdu, peru jma nagana ni ora ruluíʼ tobi de laadu nga bichee. Caquiiñeʼ gácanu humilde para ganda guni perdonarnu stobi».

CONSEJU ZEEDA LU BIBLIA: «Biʼniʼ stipa pur guni chaahuiluʼ guendanagana stitu» (Mateo 5:25).