Ca guendaxheelaʼ ni nanna xii nga ti compromisu la? riuucaʼ tobi si ne ribánicaʼ nayecheʼ. Nanna dxiichicaʼ ziuucaʼ tobi si neca tídicaʼ lu guendanagana.

Nuu guendaxheelaʼ ribani juntu purtiʼ rucaa familia ne ca xhamígucaʼ laacaʼ chuʼcaʼ tobi si. Peru ni jma galán nga, naquiiñeʼ chuʼcaʼ juntu purtiʼ nadxiicaʼ ne runi respetarsaacaʼ.

CONSEJU ZEEDA LU BIBLIA: «Hombre ni maʼ bichaganáʼ la? cadi gusaana xheelaʼ» (1 Corintios 7:11).

Micah guníʼ: «Ora nadxiiluʼ tuuxa la? qué ridxiichineluʼ laa, sínuque runi perdonarsaatu. Ne ora gápatu xiixa guendanagana la? runi chaahuitu ni ne qué ruyúbitu gaca divorciartu».

Ca binni ni ruuyaʼ guendaxheelaʼ casi guendariguite la? ora rápacaʼ guendanagana riníʼ íquecaʼ qué zanda chuʼcaʼ tobi si ne ni jma galán nga gaca divorciarcaʼ.

Jean ná: «Ora richaganáʼ binni, stale de laacaʼ riníʼ íquecaʼ pa qué cheʼ ni laacaʼ galán la? mejor gaca divorciarcaʼ. Tuuxa ni riníʼ ique zacá la? rusihuinni cadi cusisaca xquendaxheelaʼ.

GUNÍʼ IQUE NDIʼ

¿Xi rúniluʼ ora ridinde diidxaluʼ né xheelaluʼ?

• ¿Ñee riníʼ íqueluʼ mejor qué nichaganaluʼ la?

• ¿Ñee riníʼ íqueluʼ ximodo ñaca xquendanabániluʼ pa nibanineluʼ sti binni la?

• ¿Ñee riniʼluʼ «zusaanaʼ lii ne zuyubeʼ stobi» la?

Pa rúniluʼ chupa chonna de ca ni bizéʼtenu riʼ, jma galán guyúbiluʼ modo guni chaahuiluʼ xquendaxheelaluʼ.

GUNIʼNÉ XHEELALUʼ

• ¿Ñee raca nagana para laanu chuʼnu tobi si la? Pa zacá ni, ¿xiñee pue?

• ¿Xi naquiiñeʼ gúninu para chuʼnu tobi si pue?

NI CAQUIIÑEʼ GÚNILUʼ

• Gatigá bicaa xiixa para xheelaluʼ ra cayábiluʼ laa pabiáʼ nadxiiluʼ laa.

• Gupa ti foto stiʼ xheelaluʼ ra rúniluʼ dxiiñaʼ.

• Guniʼné xheelaluʼ ora cayúniluʼ dxiiñaʼ o pa nuuluʼ sti lugar.

CONSEJU ZEEDA LU BIBLIA: «Ni maʼ bichaaga Dios, cadi guchiá nin ti hombre» (Mateo 19:6).