«Pur ti hombre si biuu pecadu ndaaniʼ guidxilayú, ne pur pecadu ca biuu guendaguti, ne zacá gucuá guendaguti que guiráʼ binni» (ROMANOS 5:12).

Bizáʼ Dios primé hombre ne primé gunaa, Adán ne Eva, bidiibe laacaʼ guendabiaaniʼ ne ti cuerpu perfectu. Ne laaca bidiibe laacaʼ ti lugar ra cuézacaʼ ndaaniʼ Guidxilayú riʼ, ti paraísu ni biree lá jardín de Edén. Laaca gúdxibe laacaʼ zanda gocaʼ guiráʼ cuananaxhi ni cá lu ca yaga que, tobi si coʼ. Peru qué nuzuubaʼ Adán ne Eva stiidxaʼ Dios, gudocaʼ cuananaxhi ni gudxi Dios laacaʼ cadi gocaʼ, ne zacá bicheecaʼ (Génesis 2:15-17; 3:1-19). Cumu qué nuzuubacabe stiidxaʼ Dios la? gulee laacabe de ndaaniʼ jardín de Edén que ne zacá guca xquendanabánicabe nagana. Qué nindaa gúpacabe xiiñicabe ne laaca gúpacaʼ guendanagana, bióʼxhocaʼ ne gúticaʼ (Génesis 3:23; 5:5). Nga runi raca huaranu, rióxhonu ne rátinu purtiʼ zanu de Adán ne Eva.

«Guidubi guidxilayú riʼ nuuni lu náʼ Binidxabaʼ» (1 JUAN 5:19).

Ni runibiáʼcabe casi «Binidxabaʼ», laca laabe nga Diablu, ti espíritu ni qué rihuinni ni bicaalú Dios (Juan 8:44; Apocalipsis 12:9). Ne gudiʼdiʼ si tiempu, guyuu xcaadxi espíritu malu ni yenanda Binidxabaʼ, ne zacá beeda gácacaʼ  demonio. Riquiiñeʼ ca espíritu malu riʼ poder ni nápacaʼ para quítecaʼ ne guxhélecaʼ binni de Dios, ne dede rucaacabe laacaʼ gúnicaʼ cosa malu (Salmo 106:35-38; 1 Timoteo 4:1). Guizáʼ riecheʼ Binidxabaʼ ne ca demonio gúʼyacaʼ laanu cayuni sufrirnu.

«Ni gudxiibaʼ binni la? ngaca guni cosechar» (GÁLATAS 6:7).

Nuu biaje runi sufrirnu pur pecadu ni bisaananécabe laanu ne purtiʼ nuu Guidxilayú riʼ lu náʼ Binidxabaʼ. Nuu biaje laca laanu ruyúbinu guendananá stinu. Ora rúninu ni jneza la? ribeendunu ni galán, peru ora rúninu cosa malu la? laca laanu cuyúbinu guendananá stinu. Guzéʼtenu ti ejemplu, ora honradu ti hombre, runi dxiiñaʼ ne nadxii familia stiʼ la? zuni stipa pur chúʼcabe nayecheʼ. Peru pa riguítebe bueltu, rixúdxibe o qué riebe dxiiñaʼ, qué zapa familia stibe ni iquiiñeʼ. Nga runi, galán chinándanu ni ná Dios ni bizáʼ laanu, purtiʼ racalaʼdxiʼ cueendunu puru ni galán ne guibáninu nayecheʼ (Salmo 119:165).

«Lu ca últimu dxi [...] zuyubi binni puru si para laa, zannaxhiicaʼ bueltu [...], qué zuzuubacaʼ stiidxaʼ jñaacaʼ ne stiidxaʼ bixhózecaʼ [...], qué zucueezacaʼ laacaʼ, zácacaʼ naduxhuʼ ne zaca nanaláʼdxicaʼ guiráʼ ni jneza» (2 TIMOTEO 3:1-5).

Tiempu riʼ, stale binni runi ni riete lu profecía riʼ, ne nga rusihuinni maʼ nabáninu lu ca últimu dxi stiʼ guidxilayú riʼ. Lu Stiidxaʼ Dios maca biete ziuu guerra, hambre, xu roʼ ne stale guendahuará lu ca últimu dxi nabáninu riʼ (Mateo 24:3, 7, 8; Lucas 21:10, 11). Stale binni cayuni sufrir ne ráticaʼ pur guiráʼ ca cosa malu riʼ.