Nuu binni runi juzgar xcaadxi purtiʼ de gadxé guidxi laacaʼ, pur raza, tribu o idioma sticaʼ o zándaca pur religión sticaʼ, pur modo laacaʼ o pa nápacaʼ o qué gápacaʼ bueltu. Nuu tu laa runi juzgar xcaadxi pur xhiza, pa guzá scuela o coʼ, pa napa xiixa discapacidad o pur modo rihuinni. Neca zacá, riníʼ ique ca binni riʼ qué gápacaʼ prejuiciu.

¿Ñee maʼ gucuá prejuiciu lii la? Fácil raca para laanu guidúʼyanu napa stobi ni, peru nagana raca para laanu guidúʼyanu nápanu ni. Ni dxandíʼ nga de guiranu runi juzgarnu tuuxa ante gunibiaʼnu laa. Ti sociólogo láʼ David Williams guníʼ ora riníʼ ique tuuxa mal de ti grupu de binni ne gueeda idxaaga tobi de laacabe, «sin gudii cuenta gadxé modo zuni tratar binni ca».

Guzéʼtenu ni bizaaca Yovitsa, nabézabe ladu sureste de Europa ra nuu ti grupu de binni ni guirutiʼ tu riná guidxaaga. Laabe guniʼbe: «Guníʼ iqueʼ nin tobi de ca binni ca cadi nachaʼhui. Qué lica niníʼ iqueʼ pa napaʼ prejuiciu. Ne gunieeʼ: “Bueno, dxandíʼ nga ni riníʼ iqueʼ de laacabe”».

Stale gobiernu ribee ley para cadi chuʼ racismo ne nin ti tipu de prejuiciu. Neca zacá qué ganda cueecabe ni. ¿Xiñee yaʼ? Purtiʼ rucueezasicani ni runi binni, ne cadi ni riníʼ íquecaʼ ne ni runi sentircaʼ. Ruzulú prejuiciu ca ndaaniʼ ique ne ndaaniʼ ladxidóʼ binni. Yanna, ¿zanda guni ganarnu prejuiciu la? ¿Nuu ti remediu para laani la?