Guyuu listu para gudxiiluluʼ ca guendanagana ni guidxaagaluluʼ

«Gudixheʼ iqueʼ gusaanaʼ de cubaʼ gueza ti cadi gaca huará baʼduriʼniʼ stidu, ngue runi bicaaʼ ti letreru ra lidxeʼ, ná ni: «Cadi cúbaluʼ gueza». Peru ti hora si de bicaaʼ ni, maʼ qué ñuneʼ huantar, ngue runi bicaaguié’ ti gueza ne guduʼbaʼ ni» (Yoshimitsu, de Japón).

ORA gacalaʼdxiʼ tuuxa gusaana de cubaʼ gueza la? riuu ora ridxaagalú guendanagana cásica bizaaca Yoshimitsu. Ne ca investigación ni huayaca, rusihuínnicani noventa por ciento de ca binni ni huayacalaʼdxiʼ gusaana de cubaʼ gueza, ribiguetaʼ rigúʼbacabe ni sti biaje ne qué randa rusaanacabe ni. Nga runi, zanda gusaanaluʼ ni pa guiziidiluʼ dede ante ximodo zanda gudxiiluluʼ ca guendanagana ni guidxaagaluluʼ. Guidúʼyanu caadxi de laacani.

Zudii gana lii cúbaluʼ ni. Stale tuu laa, ca primé chonna gubidxa de bisaana de cuba gueza, guizáʼ rudii gana laacaʼ cúbacabe ni sti biaje ne chupa semana despué de bisaanacabe ni, maʼ qué rudii peʼ gana laacabe cúbacabe ni. Ti hombre ni guduʼbaʼ gueza dxiqué guníʼ: «Ca dxi ca, ziuu ora zudiiruʼ gana lii cúbaluʼ ni». Ne stale tuu laa, neca maʼ napa iza de qué rigúʼbani, málasi rudii gana laacaʼ cúbacaʼ ni. Peru pa guni huantarluʼ gaayuʼ minutu si la? zuuyaluʼ zadiʼdiʼ ni.

Xcaadxi cosa ni zazaacaluʼ ora maʼ cusaanaluʼ ni. Stale tu laa nacubi cusaana de cubaʼ gueza la? nabé rasi, ne qué randa raca concentrar, ne nuu tu laa dede riroo, zándaca laaca nuu tuu laa riuubaʼ, ribaba ladi, ruzunisa, rapa ru, nagueenda ridxiichi ne qué rapa paciencia, dede riábacaʼ lu depresión. Stale de ca ni bizéʼtenu riʼ, rindaa ca ni tapa o xhoopaʼ semana para tidiʼ ca ni.

Zanda gúniluʼ caadxi cosa ni zacané lii ora maʼ cadíʼdiluʼ lu ca guendanagana riʼ. Ndiʼ nga caadxi de laacani:

● Gulee tiempu para gásiluʼ maʼ xadxí.

● Güeʼ ziáʼ nisa o jugu, ne gudó cosa ni zacané lii.

● Biʼniʼ ejerciciu.

● Gucuaa bi nadipaʼ ne guníʼ ique, nayá bi cuguuluʼ ndaaniʼ pulmón stiluʼ.

Ca ni zanda gucaa lii cúbaluʼ gueza sti biaje. Zándaca pur modo guni sentirluʼ o ra gúniluʼ xiixa la? gudii gana lii cúbaluʼ gueza sti biaje. Casi pur ejemplu, pa dxiqué gúpaluʼ costumbre cúbaluʼ gueza ora cayeʼluʼ xiixa la? güeʼ ni nagueenda, zándaca despué maʼ zeluʼ ni chaahuidugá.

Peru neca maʼ biaa xcuérpucabe de ca gueza ni gudúʼbacabe la? zudiiruʼ gana laacabe cúbacabe ni. Sicaríʼ guníʼ Torbe, hombre bizéʼtenu nagasi que: «Neca maʼ gudiʼdiʼ diecinueve iza de bisaanaʼ de cubaʼ gueza la? rudiiruʼ gana naa cubaʼ ni ora maʼ cayeeʼ café». Stale tuu laa, riné tiempu para maʼ cadi gudii gana laa cubaʼ gueza ora cayuni xiixa, purtiʼ biaabe gúnibe ni.

Peru maʼ gadxé si ni rizaaca ora ca ni bisaana de cubaʼ gueza ca, guecaʼ nisadxuʼniʼ. Galán gúnicabe cadi guécabe ne cadi chécabe ca lugar ra rudiicabe ni. Purtiʼ stale de ca ni reʼ nisadxuʼniʼ o riecaʼ ca lugar ra rudiicabe ni la? ribiguetaʼ rigúʼbacabe gueza sti biaje. ¿Xiñee yaʼ?

● Neca tuudxihuiiniʼ nisadxuʼniʼ guécabe la? rucaani laacabe guni sentírcabe casi ora nigúʼbacabe gueza.

● Pa guidxaagaluʼ xcaadxi para guéneluʼ laacaʼ nisadxuʼniʼ la? cadi guiaandaʼ lii, laaca zándaca zudiicabe lii gueza racá.

● Ora reʼ binni nisadxuʼniʼ la? qué rudiicaʼ cuenta xi rúnicaʼ, ne raca nagana laacaʼ gúnicaʼ ni jneza. Nga runi Biblia ná: «Binni ni reʼ vinu la? qué runi ni jneza» (Oseas 4:11).

Ca binni ridxaagaluʼ. Cadi guidxaagaluʼ ca ni riguʼbaʼ gueza o ca ni zanda gucaa lii cúbaluʼ ni. Jma galán gúniluʼ pa guixéleluʼ de laacabe. Laaca galán guixéleluʼ de ca ni runi burla lii o ca ni qué rusisaca stipa ni rúniluʼ pur gusaanaluʼ de cúbaluʼ gueza.

Estrés ne ca ni runi sentirluʼ. Ti estudiu ni guca, rusihuinni maʼ de sesenta por ciento de ca binni ni bibiguetaʼ guduʼbaʼ gueza la? gudúʼbacabe ni purtiʼ guca estresárcabe o pur bidxiichicabe. Pa gúʼyaluʼ cudii gana lii, cúbaluʼ gueza pur cayuni sentirluʼ, biʼniʼ xiixa ni guni distraer lii, casi gueluʼ nisa, gásaluʼ yaala ne laaca zanda guireeluʼ saluʼ. Biʼniʼ stipa guiníʼ íqueluʼ cosa ni zacané lii, gunabaʼ Dios lu oración gacané lii o biindaʼ chupa chonna capítulo de lu Biblia (Salmo 19:14).

Ni cadi naquiiñeʼ guiníʼ íqueluʼ

● Chiguneʼ prueba siá’ ni.

Ni zazaacaluʼ. Neca guni prueba siouʼ ni la? zandaa chonna hora para tidiʼ efectu stini ne zucuaani ni parte de cerebru stiluʼ ra rindaa nicotina ca. Ne pur nga stale tuu laa ribiguetaʼ riguʼbaʼ ni sti biaje.

● Pa cubaʼ gueza maʼ qué zacaʼ estresar.

Ni zazaacaluʼ. Ca investigación ni huayúnicabe rusihuínnicani jma rudxiibaʼ nicotina ca hormona ni runi estresar binni. Nga runi, pa runi sentirluʼ galán ora cúbaluʼ gueza la? zándaca purtiʼ maʼ qué rudii peʼ gana lii cúbaluʼ ni.

● Ma’ qué zanda gusaana ni.

Ni zazaacaluʼ. Pa guiníʼ íqueluʼ zacá, qué zacané ni lii. Biblia ná: «Pa guireeluʼ gana ora cadíʼdiluʼ ra nagana la? zará stipa stiluʼ» (Proverbios 24:10). Nga runi, cadi guiniʼluʼ qué zanda. Tutiica binni gacalaʼdxiʼ gusaana gueza ne guni ni ná ca principiu ni bizéʼtenu lu revista riʼ la? zanda guni ni racalaʼdxiʼ.

● Qué randa rucueeza naa ora rudii gana naa cubaʼ ni.

Ni zazaacaluʼ. Nagana nga gusaanaluʼ de cúbaluʼ gueza, peru lu chupa chonna si semana zadiʼdiʼ ni. Guníʼ iqueʼ xi peʼ nga racaláʼdxiluʼ. Zándaca ra tidiʼ beeu o iza, zudii gana lii cúbaluʼ gueza ca sti biaje, peru pa qué gucaaguiluʼ ni la? zuuyaluʼ chupa chonna si minutu zadiʼdiʼ ni.

● Cadi cá iqueʼ gusaanaʼ ni purtiʼ napaʼ ti guendahuará mental.

Ni zazaacaluʼ. Pa cacaaluʼ ti tratamientu purtiʼ nápaluʼ depresión o equizofrenia la? gunabaʼ doctor ni ruuyaʼ lii gacané lii gusaanaluʼ gueza ca. Zándaca zudii doctor ca lii ti tratamientu para gusaanaluʼ de cúbaluʼ gueza peru sin guninani guendahuará ni maca nápaluʼ ca.

● Cadxibeʼ guneʼ sentir qué risacaʼ pa cubaʼ ni sti biaje.

Ni zazaacaluʼ. Pa ibigueta cúbaluʼ gueza sti biaje la? qué riníʼ ndiʼ nga qué zanda gusaanaluʼ ni, zacá rizaaca stale. Lii bidxiilú. Pa ibigueta cúbaluʼ ni la? qué riníʼ ndiʼ nga qué risácaluʼ o de pur gana si guiráʼ stipa ni maʼ bíʼniluʼ. Nga runi, ¡cadi guireeluʼ gana!, zanda gusaanaluʼ de cúbaluʼ gueza ca.

Zaca peʼ nga bizaaca Romualdo, laa guduʼbaʼ gueza veintiséis iza, ne maʼ raca treinta iza de bisaanabe ni. Sicaríʼ gúnibe: «Ma’ nin qué gannaʼ panda biaje bibiguetaʼ guduʼbaʼ ni sti biaje, ne cada biaje cubaʼ ni runeʼ sentir qué risacaʼ. Peru dxi gudixheʼ iqueʼ chuaaʼ nayá nezalú Jehová, qué nusaanaʼ de ninabaʼ laabe ñacanebe naa, zaqué gunda bisaanaʼ de cubaʼ gueza ca tobi si tiru».

Lu últimu artículo stiʼ serie riʼ, zeeda caadxi sugerencia ni zacané lii gusaanaluʼ de cúbaluʼ gueza ca ne guibániluʼ nayecheʼ.

[Imagen]

GUIRÁʼ CA CLASE GUEZA CA MALU CA NI

Gadxé gadxé presentación rutoocabe gueza, ndaaniʼ stale gudxi rutoocabe caadxi producto ni gucané gueza ndaaniʼ ca tienda naturista. Peru Organización Mundial de la Salud guníʼ, «guiráʼ ca clase gueza ca, malu ca ni». Stale de ca guendahuará ni rapa binni pur riguʼbaʼ gueza, casi cáncer o guendahuará de corazón, ruuticani binni. Ca gunaa ni nacaxiiñiʼ ne riguʼbaʼ gueza la? laaca riguucaʼ ca baʼduhuiiniʼ sticaʼ ra naxoo. ¿Xi guiráʼ modo zanda cubaʼ binni gueza yaʼ?

Bidis. Clase gueza riʼ, lu nácabe ruzeechucabe ni ne nalaseʼ ni. Ne nabé rigúʼbacabe ni caadxi lugar stiʼ Asia. Jma stale alquitrán, nicotina ne monóxido de carbono nápani que ca gueza normal ni riguʼbaʼ binni.

Puru. Rácani ne gueza ni rucaachecabe ne rucheendacabe ni ndaaniʼ bandaga stiʼ gueza ca o guiʼchi ni gucané gueza ca. Ca gueza normal ca naíʼ ca ni, peru ca puru ca naxhi ca ni. Nga runi, jma fácil chuʼ nicotina ca ndaaniʼ ruaacabe neca qué gucaaguícabe ni.

Kreteks, o gueza de clavu. Napa ni sesenta por ciento de gueza ne cuarenta por ciento de clavu. Jma nápani alquitrán, nicotina ne monóxido de carbono que ca gueza normal ni riguʼbaʼ binni.

Pipa. Laaca malu ni cásica gueza purtiʼ ngueca cáncer ne guendahuará rindisaʼ ni luguiáʼ ca binni ni riguʼbaʼ ni.

Gueza sin guʼxhuʼ. Gadxé gadxé modo reedacani, nuu de laacani rásacabe ni, casi rapé ne gutkha, ruguuchacabe ni xiixa ni rindaʼ naxhi ne riquiiñecabe ni ladu gueteʼ stiʼ Asia. Riuu nicotina ca lu rini stícabe ora rásacabe ni. Nga runi neca qué gapa ni guʼxhuʼ la? peru laaca malu ni cásica xcaadxi gueza.

Pipa de nisa (bongs, hookahs, narghiles, shishas). Laacani nga xiixa ni riquiiñecabe para tidiʼ guʼxhuʼ ca ndaaniʼ nisa ante cúbacabe ni. Peru neca rigúʼbacabe ni zacá la? laaca si rié ca sustancia malu ca lu pulmón stícabe, lade ca ni nuu ca ni rindisaʼ cáncer.

[Imagen]

NI ZANDA GÚNILUʼ PARA GACANELUʼ TUUXA

● Guca positivu. Jma galán cuʼluʼ gana binni ca ne gábiluʼ laa galán stipa ni cayuni, que tindeneluʼ laa o gábiluʼ laa xi naquiiñeʼ guni. Galán gábiluʼ laabe casi: «Bizulú de nuevu. Nannaʼ lii zanda», jma zaguuluʼ gana laabe zacá, que gaʼbuʼ laabe: «¿Ma’ cagúʼbaluʼ gueza sti biaje la?».

● Biene laabe. Pa cadxiichibe pur modo nuube ca ne guiníʼnebe lii naduxhuʼ la? biʼniʼ perdonar laabe. Gudxi laabe diidxaʼ galán ne ni gacané laabe casi: «Nannaʼ cadi fácil ni, peru ridxagayaaʼ stipa ni cayúniluʼ». Qué chuʼ dxi gábiluʼ laabe: «Jma galán carácter gúpaluʼ dxi rigúʼbaluʼ gueza».

● Bisihuinni dxandíʼ xhamíguluʼ laabe. Biblia ná: «Ni dxandíʼ xhamígunu la? guiráʼ ora nadxii laanu ne zácabe bíchinu ora nápanu xiixa guendananá» (Proverbios 17:17). Nga runi, guiráʼ ora, ora tiica si ne modo tiica si cayuni sentirbe, bi’ni’ stipa gápaluʼ paciencia ne gácaluʼ nachaʼhuiʼ né laabe.