Biyubi gacanécabe lii

«Zanda guni ganárcabe tuuxa ora nuu stubi, peru ora nuu chupa binni juntu la? zanda gudxiilucaʼ ca ni cucaalú laacaʼ» (Eclesiastés 4:12).

ORA riuu tu racané laanu la? maʼ zanda gudxiilunu tutiica ni gucaalú laanu. Nga runi, pa racaláʼdxiluʼ gusaanaluʼ de cúbaluʼ gueza la? galán guinábaluʼ gacané ca familia o ca xhamíguluʼ lii o tuuxa ni nánnaluʼ zapa paciencia lii.

¿Xiñee qué guyúbiluʼ gacané tuuxa ni maʼ bisaana de cuba gueza lii yaʼ? Laacabe ziénecabe ne zacanécabe lii. Sicaríʼ guníʼ ti xpinni Cristu ni nabeza Dinamarca láʼ Torbe: «Guizáʼ galán bineʼ sentir ora guyuu tuu gucané naa». Ne Abraham ni nabeza ndaaniʼ guidxi India bicaa: «Pur guendarannaxhii ni bisihuinni familia stinneʼ naa ne ca hermanu, gunda bisaanaʼ viciu riʼ». Peru nuu biaje la? cadi caquiiñeʼ si gacané ca familia ne ca xhamígunu laanu.

Ti hombre láʼ Bhagwandas guníʼ: «Veintisiete iza guduʼbaʼ gueza, peru cumu biziideʼ de lu Biblia xii nga ca cosa ni runi biidiʼ cuerpu stinu la? gudixheʼ iqueʼ gusaanaʼ de cubaʼ gueza. Bineʼ stipa gusaanaʼ ni chaahuiʼ chaahuiʼ. Bixheleʼ de ca xhamiguaʼ ni gupaʼ dxiqué. Guyaaʼ ra nuu doctor. Peru nin tobi ni qué ñacané naa, dede ora ruʼ bineʼ ti oración Jehová ne gunabaʼ laabe gacanebe naa gusaanaʼ viciu que ne zaqué nga gunda bisaanaʼ ni».

Laaca naquiiñeʼ chuʼluʼ listu para gudxiiluluʼ ca guendanagana ni zándaca guidxaagaluluʼ ora gacaláʼdxiluʼ gusaanaluʼ de cúbaluʼ gueza. Lu sti artículo ca zadúʼyanu caadxi de laacani.

[Cuadru]

¿ÑEE CAQUIIÑEʼ GUEʼ MEDICINA LA?

Ca medicamentu ni riquiiñecabe para gacanécabe binni gusaana de cubaʼ gueza, casi ca parche de nicotina, guizáʼ stale binni riquiiñeʼ ca ni, pur nga runi ganárcabe stale millón de dólar lúcani. Peru, ante iquiiñeluʼ ca ni guníʼ ique ca ni chiguzéʼtenu riʼ.

¿Ximodo zacané ni lii? Nácabe racané ca tratamientu ca binni gusaana de cubaʼ gueza, purtiʼ maʼ qué rudii gana laacabe de cúbacabe ni. Peru nuu tuu riníʼ, ora maʼ xadxí de riquiiñecabe ca medicamentu ca la? maʼ qué racané ni laacabe.

¿Ximodo zuniná ni lii? Nuu de ca medicamentu ca, runi feu ca ni ladxidóʼ binni, rindísacani depresión ne dede rucaacani laacabe guníʼ íquecabe guuticabe laca laacabe. Cadi guiaandaʼ laanu, ora guécabe medicamentu ni napa nicotina o iquiiñecabe xcaadxi cosa ni nápani la? laaca zuni huará ni laacabe, purtiʼ laaca si cayuuni lu cuerpu stícabe. Nga runi, ca binni ni iquiiñeʼ clase tratamientu riʼ, casi ñaca qué nusaana de nigú’bacabe gueza.

¿Xiruʼ zanda guneʼ para gusaanaʼ ni yaʼ? Ti encuesta ni bíʼnicabe ca binni ni bisaana de cubaʼ gueza, 88% de laacaʼ gúnicaʼ bisaanacaʼ ni zacá si sin iquiiñecaʼ medicamentu.