¿ÑEE huayuuyaluʼ ndaaniʼ guidxilayú riʼ nuu stale binni ni riuulaʼdxiʼ gusisácacabe laa o guni tendércabe laa jma que sti binni la? Neca rusisaca binni laacabe peru riníʼ íquecabe caquiiñeʼ gusisaca binni laacabe jma. Rusihuínnicabe nácacabe ti binni ni ruyubi puru para laasi ne qué rudii xquixe peʼ sti binni. Ne zacá peʼ nga ruzeeteʼ Biblia zaca xpiaʼ binni lu ca últimu dxi riʼ (2 Tim. 3:2).

Peru dede dxiqué maca guyuu binni ni ruyubi puru para laasi. Guzéʼtenu chupa chonna ejemplu. Casi Adán ne Eva guníʼ íquecaʼ laacaʼ nga nápacaʼ derechu quíxhecaʼ xii nga ni jneza ne ni cadi jneza, ne pur ni bíʼnicabe riʼ guiranu cayacananu. Gayuaa iza despué, rey Uzías de guidxi Judá bichee ora guníʼ ique zanda guzaaquiʼ inciensu ndaaniʼ templu, ti dxiiñaʼ ni qué raca caber laabe gúnibe (2 Crón. 26:​18, 19). Ne ca fariseu ne ca saduceu guníʼ íquecaʼ naquiiñeʼ guicaacaʼ ndaayaʼ stiʼ Dios purtiʼ zacaʼ de Abrahán (Mat. 3:9).

Cumu nabáninu lade binni ni ruyubi puru para laasi ne orgulloso la? zanda gueeda guicá xpiáʼcabe laanu (Gál. 5:26). Zándaca gueeda guiníʼ íquenu runi merecernu xiixa privilegiu o gusisácacabe laanu. ¿Xi zanda gúninu para cadi guicá xpiaʼ binni guidxilayú laanu yaʼ? Primeca ni naquiiñeʼ gúninu nga guiene chaahuinu ximodo ruuyaʼ Jehová ni. Guidúʼyanu chupa principiu ni zeeda lu Biblia.

 Jehová nga riníʼ xi naquiiñeʼ guicaanu. Guidúʼyanu chupa chonna ejemplu.

• Ndaaniʼ familia, racalaʼdxiʼ Jehová guni respetar gunaa xheelaʼ ne hombre gannaxhii xheelaʼ (Efes. 5:33). Cadi naquiiñeʼ gusihuinni ca ni maʼ bichaganáʼ riuuláʼdxicaʼ sti binni, sínuque gusihuínnicaʼ nadxiicaʼ xheelacaʼ ne laasibe nga naquiiñeʼ gudiicaʼ cariñu (1 Cor. 7:3). Napa ca ni napa xiiñiʼ derechu guzuubaʼ xiiñicaʼ stiidxacaʼ. Ne ca baʼduʼ nápacaʼ derechu gapa ne gannaxhii bixhózecaʼ ne jñaacaʼ laacaʼ (2 Cor. 12:14; Efes. 6:2).

• Ndaaniʼ congregación, naquiiñeʼ guni respetarnu ca ancianu pur dxiiñaʼ nadipaʼ rúnicaʼ (1 Tes. 5:12). Peru qué gápacabe derechu de gábicabe ca hermanu o hermana xi peʼ caquiiñeʼ gúnicaʼ lu xquendanabánicaʼ (1 Ped. 5:​2, 3).

• Maʼ bidii Dios autoridad ca gobiernu ca para guinábacaʼ laanu quíxenu impuestu ne guzúʼbanu stiidxacaʼ (Rom. 13:​1, 6, 7).

Guizáʼ nadxii Jehová laanu ne maʼ bidiibe laanu jma de ni runi merecernu. Cumu nácanu binni ruchee la? ni runi merecérsinu nga gátinu (Rom. 6:23). Peru cumu qué rusaana Jehová de gannaxhii laanu la? rudiibe laanu stale cosa galán (Sal. 103:​10, 11). Guiráʼ ndaayaʼ ne privilegiu ni rudii Dios laanu la? rudiibe ni laanu purtiʼ nacháʼhuibe (Rom. 12:​6-8; Efes. 2:8).

Gápanu cuidadu cadi guicá modo riníʼ ique binni guidxilayú laanu. Sin gudiʼnu cuenta zanda guiníʼ íquenu runi merecernu guicaanu jma cosa que xcaadxi binni. Ti biaje, bizeeteʼ Jesús ti historia ni rusihuinni cadi nagana nga guiníʼ íquenu zacá. Guniʼbe de ti hombre ni napa ti layú ra zuhuaa lubáʼ uva ne biyubi trabajador guni dxiiñaʼ lu layú stiʼ guidubi dxi ne zaguixe laacabe ti denariu. Despué, biyúbibe jma trabajador ne bíʼnicaʼ dxiiñaʼ chupa chonna si hora, nuu de laacaʼ ti hora si. Ora bixhinni, gudíxebe guiracaʼ ti denariu. Peru ca ni bizulú biʼniʼ dxiiñaʼ dede tempranu cabézacaʼ guiáxacaʼ jma pur dxiiñaʼ nadipaʼ ni bíʼnicaʼ lu gubidxa ndaʼ que (Mat. 20:​1-16). Né ejemplu riʼ bisiidiʼ Jesús ca xpinni chuʼcaʼ nayecheʼ né ni gudii Dios laacaʼ.

Gudiʼnu xquixe peʼ ne cadi cuézanu gúnicabe xiixa pur laanu (1 Tes. 5:18). Galán quixhe íquenu  chinándanu ejemplu stiʼ apóstol Pablo, qué ninábabe nudii ca hermanu de Corinto laabe ca cosa ni caquiiñebe neca nápabe derechu guinábabe ni (1 Cor. 9:​11-14). Lugar de guinábanu gudiicabe laanu xiixa la? ni jma galán gúninu nga gudiʼnu xquixe peʼ pur guiráʼ ca cosa ni gudiicabe laanu.

Gácanu humilde. Ora rusisaca tuuxa laa riníʼ ique runi merecer gapa jma de biaʼ napa. Pa guiníʼ íquenu zacá zeeda gácani casi ti venenu peru medicina stini nga gácanu humilde.

Galán ejemplu bisaana profeta Daniel purtiʼ guca humilde. Zabe de ti familia risaca, nayá hombre laabe, guizáʼ nuu xpiaanibe ne nápabe stale gracia. Pur ca ni bizéʼtenu riʼ, ñándaca niníʼ íquebe runi merecerbe ca privilegiu ne tratu bidiicabe laabe que (Dan. 1:​3, 4, 19, 20). Peru lugar de nga gúcabe humilde ne pur nga biiyaʼ Jehová laabe casi ti hombre risaca (Dan. 2:30; 10:​11, 12).

Cadi gudiʼnu lugar guicá xpiaʼ binni guidxilayú laanu, laacaʼ nácacaʼ binni orgulloso ne ni ruyubi puru para laasi. Ni jma galán gúninu nga chuʼnu nayecheʼ né ca ndaayaʼ gudii Jehová laanu purtiʼ nachaʼhuiʼ né laanu.