LECCIÓN 18
Tuu nga ca ni dxandíʼ xpinni Cristu
Stale millón de binni ná xpinni Cristu laa, peru cadi ngueca runi crécabe ne gadxé gadxé ni rúnicabe. Yanna, ¿ximodo zanda gánnanu tuu nga ca ni dxandíʼ xpinni Cristu yaʼ?
1. ¿Tuu nga ti binni ni dxandíʼ xpinni Cristu?
Ca xpinni Cristu la? nácacabe discípulo stiʼ Jesús (biindaʼ Hechos 11:26). Peru ¿ximodo rusihuínnicabe zinándacabe Jesús yaʼ? Laa guníʼ: «Pa qué guixéletu de ni rusiideʼ, dxandíʼ peʼ discípulo stinneʼ laatu» (Juan 8:31). Rusihuinni ca diidxaʼ riʼ zinanda ca ni dxandíʼ xpinni Cristu guiráʼ ni bisiidiʼ Jesús. Guiráʼ ni bisiidiʼ Jesús zeedacani lu Stiidxaʼ Dios, nga runi ca ni dxandíʼ zinanda laabe la? laaca rusiidicabe ni zeeda lu Biblia (biindaʼ Lucas 24:27).
2. ¿Ximodo rusihuinni ca ni dxandíʼ xpinni Cristu nadxiisaacaʼ?
Ndiʼ nga ni gudxi Jesús ca discípulo stiʼ: «Lagannaxhiisaa cásica huayannaxhieeʼ laatu» (Juan 15:12). ¿Ximodo bisihuinni Jesús nadxii ca discípulo stiʼ yaʼ? Guluube gana laacaʼ ne guleebe tiempu para gacanebe laacaʼ, dede bidiibe xpídabe pur laacaʼ (1 Juan 3:16). Cásica Jesús la? ca ni dxandíʼ xpinni Cristu qué riníʼsicaʼ nadxiisaacaʼ; laaca rusihuínnicabe ni pur ni rúnicabe.
3. ¿Gunáʼ nga dxiiñaʼ ni jma risaca ni runi ca ni dxandíʼ xpinni Cristu?
Bisaana Jesús ti dxiiñaʼ para guni ca discípulo stiʼ, «biseendabe laacaʼ para chiguni predicarcaʼ Reinu stiʼ Dios» (Lucas 9:2). Cadi ca lugar si ra runi adorárcabe Dios nga biʼniʼ predicar ca primé xpinni Cristu, laaca biʼniʼ predicárcabe ca lugar ra rié stale binni ne de yoo pur yoo (biindaʼ Hechos 5:42; 17:17). Yanna riʼ, laaca rusiidiʼ ca ni dxandíʼ xpinni Cristu ni ná Biblia ra tiica nuu binni. Cumu nadxiicabe binni la? riéchecabe iquiiñecabe tiempu ne stipa stícabe para gusiidicabe binni ni ná Biblia ne quixhedxícabe ladxidoʼcaʼ (Marcos 12:31).
GUIZÍʼDIRUNU JMA
Guidúʼyanu xiñee maʼ gadxé nga ca ni dxandíʼ xpinni Cristu de xcaadxi binni ni cadi zinanda ejemplu stiʼ Jesús ne guiráʼ ni bisiidiʼ.
4. Rusisácacabe guiráʼ ni rusiidiʼ Biblia
Bisisaca ca primé xpinni Cristu Stiidxaʼ Dios.
Cadi guiráʼ binni ni ná xpinni Cristu laa rusisaca guiráʼ ni rusiidiʼ Biblia. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Xi biʼniʼ caadxi ni ná xpinni Cristu laa para gucueezacaʼ de guiziidiʼ binni guiráʼ ni bisiidiʼ Jesús?
Bisiidiʼ Jesús ca ni dxandíʼ rusiidiʼ Stiidxaʼ Dios. Laguundaʼ Juan 18:37 ne laiquiiñeʼ pregunta riʼ para güitu diidxaʼ:
-
Pur ni guníʼ Jesús riʼ, ¿ximodo zanda gánnanu tuu nga ca xpinni Cristu «ni nuu pur ni dxandíʼ»?
5. Rusiidicabe ni ná Biblia
Bisisaca ca primé xpinni Cristu Stiidxaʼ Dios, bisiidicabe ni nani ne gunnaxhiisaacabe.
Ante guibiguetaʼ Jesús guibáʼ, bisaananebe ca discípulo stibe ti dxiiñaʼ ni cayaca dede yanna. Laguundaʼ Mateo 28:19, 20 ne Hechos 1:8, ne laiquiiñeʼ pregunta riʼ para güitu diidxaʼ:
-
¿Hasta padxí ne pa idubi zaca predicar?
6. Rúnicabe ni rusiidicabe
Biiyaʼ xi gucané ti hombre láʼ Tom ganna tu peʼ nga ca ni dxandíʼ xpinni Cristu. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
Casi bidúʼyanu lu videu riʼ, ¿xi qué ñuulaʼdxiʼ Tom de religión stiʼ?
-
¿Xiñee nuu Tom seguru dxandíʼ guiráʼ ni caziidiʼ?
Pur ni runi binni rusihuinni tu naca. Laguundaʼ Mateo 7:21 ne laiquiiñeʼ pregunta riʼ para güitu diidxaʼ:
-
Xii nga ni jma risaca para Jesús: ¿ni rininu runi crenu la? ¿O ni rusihuínninu pur ca ni rúninu?
7. Nadxiisaacabe
Gunnaxhiisaa ca primé xpinni Cristu.
¿Ñee nuu ca xpinni Cristu dispuestu gudiicaʼ xpídacaʼ pur ca hermanu sticaʼ la? Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
¿Xi bicaa hermanu Lloyd chuʼ dispuestu gudii xpida pur hermanu Johansson?
-
¿Ñee bisihuínnibe dxandíʼ xpinni Cristu laabe la?
Laguundaʼ Juan 13:34, 35 ne laiquiiñeʼ ca pregunta riʼ para güitu diidxaʼ:
-
¿Ximodo naquiiñeʼ guni tratar ca discípulo stiʼ Jesús ca binni de sti raza o de sti guidxi?
-
¿Ximodo zanda gusihuínnicabe nadxiicabe binni ora cayaca guerra?
NUU TU NÁ: «Pur guiráʼ cosa feu ni maʼ biʼniʼ ca ni ná xpinni Cristu laa. ¿Ximodo gánnaluʼ gunáʼ nga religión ni rusiidiʼ ni dxandíʼ?».
-
¿Xi textu niquiiñeluʼ para nusiéneluʼ tuuxa tuu nga ca ni dxandíʼ xpinni Cristu?
XI BIZÍʼDINU
Ca ni dxandíʼ xpinni Cristu zinándacaʼ guiráʼ ni rusiidiʼ Biblia, nadxiicaʼ binni ne nuucaʼ dispuestu gudiicaʼ xpídacaʼ pur laacabe ne rusiidicabe ni zeeda lu Biblia.
Xi biziidiluʼ
-
¿Paraa zeeda guiráʼ ni runi cré ca xpinni Cristu?
-
¿Xi rusihuinni ca ni dxandíʼ naca xpinni Cristu?
-
¿Xi dxiiñaʼ risaca rúnicabe?
BIIYAʼ XIRUʼ ZANDA GUIZIIDILUʼ
Biiyaʼ tu clase binni nga runi stipa pur chinanda ejemplu stiʼ Jesús ne guiráʼ ni bisiidiʼ.
Biiyaʼ ximodo bidxela ti gunaa ni guca monja «ti familia ni dxandíʼ riuulaʼdxiʼ guni ni ná Dios».
«Biquiiñecabe Biblia para bicábicabe ca pregunta stinneʼ» (Torre stiʼ ni rapa, 1 de abril de 2014)
Biiyaʼ ximodo rusihuinni ca ni dxandíʼ xpinni Cristu nadxiicaʼ ca hermanu sticaʼ ora gaca xiixa desastre.
Racanedu ca hermanu ora gaca xiixa desastre (fragmentu) (3:57)
Guníʼ Jesús xi guiráʼ zusihuinni ca ni dxandíʼ zinanda laa. Biiyaʼ ximodo bisihuinni ca primé xpinni Cristu ni ne ximodo rusihuinni ca xpinni Cristu de yanna ni.
«¿Xi rusihuinni ca ni dxandíʼ naca xpinni Cristu?» (Tema ni zeeda lu Torre stiʼ ni rapa)
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
