CANI runi cré Trinidad la? nácabe chonna binni nga ti Dios: Dios, Xiiñiʼ ne Espíritu Santu. Ne nácabe tobi si nga guionnaʼ binni ca, guiráʼ xixé cosa zanda gúnicaʼ ne nin tobi de laacaʼ qué ñápacaʼ ra bizulú xquendanabánicaʼ. Trinidad ca rusiidiʼ ni Padre ca nga Dios, Xiiñibe laaca Dios laa ne Espíritu Santu ca laaca Dios ni, peru ti Dios si nga nuu.

Stale de cani runi cré Trinidad, riniʼcaʼ qué zanda gusiénecaʼ ni. Zándaca riníʼ íquecabe Stiidxaʼ Dios nga rusiidiʼ ni. Peru  naquiiñeʼ gánnanu nin ti biaje cadi cá diidxaʼ Trinidad lu Biblia. Yanna, ñee nuu xiixa versículo lu Biblia ni culuíʼ nuu ti Trinidad la? Para guicábinu ni gunabadiidxanu riʼ la? guidúʼyanu ti textu ni nabé riquiiñecabe para guluíʼcabe riníʼ Biblia de laani.

Juan 1:1 na: «Dxi bizulú Dios bizáʼ guidxilayú ne ibáʼ maca nuu tobi ni rabi cabe Diidxaʼ, ne uyuu Diidxa que ra nuu Dios, ne Diidxa que Dios laa». Laaca lu capítulo riʼ zeeda xcaadxi versículo ra bisiene apóstol Juan «Diidxa que» nga Jesús (Juan 1:14). Cumu Juan 1:1 na Dios nga Diidxaʼ que la? nuu tu laa ora guʼndaʼ ni riníʼ ique ti Dios si nga Padre ca ne Xiiñiʼ.

Naquiiñeʼ gánnanu gucuá ca textu riʼ primé lu diidxaʼ griegu, de racá bitiixhicabe ni lu xcaadxi diidxaʼ. Neca nuu tu bicaa «Diidxa que Dios laa» la? xcaadxi maʼ gadxé modo bicaa ni. Xiñee yaʼ. Purtiʼ ra biʼyaʼ chaahuicabe xipeʼ nga riníʼ diidxaʼ griegu que la? biiyacabe nápacabe xidé iquiiñecabe gadxé diidxaʼ ti guiníʼcabe cásipeʼ nani. Chiguidúʼyanu caadxi ejemplu: «ti binni casi Dios nga [Diidxaʼ que]», «Diidxaʼ que casi Dios laa» ne «dios nga Diidxaʼ que» (Juan. Texto y comentario, stiʼ J. Mateos ne J. Barreto, sti modo guiuundaʼ ni; Los escritos originales de la comunidad del discípulo «amigo» de Jesús, stiʼ Senén Vidal; Cuarto Evangelio. Cartas de Juan, stiʼ J. J. Bartolomé). Casi na ca Biblia ca, Diidxaʼ que cadi laaca Dios diʼ laabe. * Ni cayabi versículo riʼ laanu nga napa Diidxaʼ ca ti puestu jma risaca lade ca ángel stiʼ Jiobá, nga runi racá na ti «dios» laabe. Diidxaʼ «dios» lu Juan 1:1 riʼ cuzeeteʼ ni de «tuuxa ni napa poder».

Stale binni qué ganna diidxaʼ griegu ni biquiiñecabe para gucuá Biblia. Yanna, ximodo gánnaluʼ xipeʼ nga ni gucalaʼdxiʼ apóstol Juan niníʼ yaʼ. Guníʼ ique ejemplu chitíxhenu riʼ, ti maestru cusiénebe ti tema cani rusiidibe, peru despué gadxé  gadxé modo caniʼcaʼ de ni gucaláʼdxibe nusiidibe laacaʼ. Ximodo gánnacabe xipeʼ nga laani yaʼ. Naquiiñeʼ guinabadiidxarucabe maestru que xa. Zacá jma ziénecabe ni guniʼbe que. Zacaca nga para guiene chaahuinu ni na Juan 1:1 ne jma jneza laca Juan gacané laanu guiénenu ni. Luni chiguyúbinu xiruʼ caníʼ ni de puestu napa Jesús. Ora guidxélanu ni, maʼ qué zaca nagana para laanu guiénenu ca cosa ca jneza.

Guidúʼyanu xiruʼ bicaa Juan lu capítulo 1, versículo 18: «Iruti binni guidxilayú qué huayuuya Dios [ni jma nandxóʼ]». Peru nuu binni biiyaʼ Xiiñiʼ Dios, Jesús, purtiʼ Juan na: «Beda gaca dxa Diidxa que binni, ne uleza be lade du. Ne biduʼya du enda nandxóʼ stibe» (Juan 1:14). Yanna, ximodo nga gaca Dios chupa binni, gácabe Dios ni jma nandxóʼ ne gácabe Jesús yaʼ. Juan na: «Uyuu Diidxaʼ que ra nuu Dios». Ximodo ndiʼ zanda chuʼ tuuxa ra nuu sti binni pa laca laabe ni yaʼ. Lu Juan 17:3 ridúʼyanu cusiene Jesús gadxé nga laabe de Bixhózebe ni nuu guibáʼ ne laabe nabe Bixhózebe nga «tobi lucha Dios ni dxandíʼ». Ne ra mayaca guiluxe Juan de gucaa Evangeliu stiʼ que la? bicaabe xii nga guiráʼ ni guniʼbe: «Ca ndi ucuá ti guni cre tu dxandí Jesús nga ni ulí Dios, ne Xiiñi laabe» (Juan 20:31). Lu versículo riʼ ridúʼyanu cadi nani Dios nga Jesús, sínuque Xiiñiʼ Dios laabe. Guiráʼ ni caníʼ Evangeliu stiʼ Juan ca cusihuinni cani ximodo guiénenu Juan 1:1. Jesús, Diidxaʼ que, ti dios laabe o tobi ni napa ti puestu jma risaca, peru cadi biaʼca Dios ni jma nandxóʼ laabe.

Chiguzéʼtenu maestru que sti biaje. Bixuiʼlú neca maʼ bisiénebe ca baʼduscuela que, caníʼ íquerucaʼ pa biaʼsi nga ni guniʼbe que. Xiruʼ zanda gúnicabe yaʼ. Zanda guyúbicabe sti maestru ni gusiéneruʼ ni laacabe. Pa sti maestru ca guiníʼ dxandíʼ nga ni na xmaéstrucabe que la? stale de laacabe maʼ zanna dxandíʼ nga ni guniʼbe. Zacaca nga gúninu pa qué ganda guiénenu xii nga gucalaʼdxiʼ apóstol Juan niníʼ de Jesús ne de Dios ni jma nandxóʼ. Zanda guyúbinu gusiene stobi de cani bicaa Biblia ca laanu. Casi Mateo, laa bicaa ca diidxaʼ guníʼ Jesús riʼ: «Padxí ne pora [gueeda fin stiʼ ca cosa malu ca] la?  iruti ganna, nin ca ángel ni nuu ibáʼ, dede nin naa [Xiiñibe] qué gannaʼ sínuque Bixhoze siaʼ nga nanna» (Mateo 24:36). Ximodo rusihuinni ca diidxaʼ ca cadi Jesús diʼ nga Dios ni jma nandxóʼ yaʼ.

Jesús na jma nanna Bixhoze que laa. Peru pa ñaca laca Jesús nga Dios ni jma nandxóʼ ca la? laaca ñánnabe ni nanna Bixhózebe xa. Nga runi, nánnanu cadi tobi si nga Padre ca ne Xiiñiʼ. Peru neca gusiéneluʼ ni zacá, nuu tu zaníʼ: «Peru Jesús gúcabe chupa clase binni: gúcabe Dios ne gúcabe hombre, ne raríʼ guniʼbe casi hombre». Gudixhe lii ñaca ni dxandíʼ. Yanna, espíritu santu ca yaʼ. Pa ñaca dxandíʼ tobi si espíritu santu ne Padre ca, xiñee qué niníʼ Jesús laaca nanna espíritu ca ni nanna Dios yaʼ. Ni guniʼbe nga Bixhózesibe nanna ni.

Ra jma gúʼndaluʼ Biblia, zuuyaluʼ xcaadxi ra cayeeteʼ de tema riʼ. Guiráʼ racá caníʼ ni dxandíʼ de Dios, de Xiiñiʼ ne de espíritu santu (Salmo 90:2; Hechos 7:55; Colosenses 1:15).