Jma maʼ stale binni runibiáʼ Jesús dede dxi guyuunisa. Lu ca iza riʼ, maʼ biiyaʼ mil de judíu ca milagru huayúnibe, ne guiráʼ ladu riníʼ binni de ca milagru riʼ. Yanna, stale binni canayubi laabe ra cayaca Saa stiʼ ca Tabernáculo (o stiʼ ca Cabaña), ndaaniʼ guidxi Jerusalén.

Gadxé gadxé ni riníʼ binni de Jesús. Nuu tu ná ti binni nachaʼhui laabe, ne xcaadxi ná caguítesibe binni (Juan 7:12). Ca primé dxi cayaca saa que, stale binni caniʼcaʼ de laabe peru chaahuidugá, peru guirutiʼ naʼ guiníʼ pur laabe purtiʼ ridxíbicaʼ ca líder stiʼ ca judíu.

Maʼ biaʼ tapa gubidxa de cayaca saa que, guyé Jesús ndaaniʼ templu ne bizulú cusiidiʼ. Nabé bidxagayaa stale binni purtiʼ nabé nánnabe gusiidibe. Qué lica huayé Jesús ndaaniʼ ca scuela stiʼ ca rabinu, ngue runi guníʼ ca judíu: «¿Ximodo nanna hombre riʼ stale de Stiidxaʼ Dios pa qué ñuni estudiar ndaaniʼ ca scuela ca pue?» (Juan 7:15).

Óraque bicabi Jesús: «Cadi ni rabeʼ nga rusiideʼ, sínuque rusiideʼ ni ná ni biseendaʼ naa. Pa nuu tuuxa racalaʼdxiʼ guni ni ná Dios, zanna pa de Dios zeeda ni cusiideʼ o pa rusiideʼ ni ná iqueʼ» (Juan 7:16, 17). Lu Ley stiʼ Dios zeeda guiráʼ ni bisiidiʼ Jesús, nga rusihuinni ni racalaʼdxiʼ Jesús nga gusisaca Jehová, ne cadi laa.

Ne guniʼruʼ Jesús: «¿Cadi dxandíʼ bidii Moisés laatu Ley la? Peru nin tobi de laatu qué runi ni ná Ley. ¿Xiñee nuutu guutitu naa pue?». Nuu caadxi raqué ni beeda de sti ladu ne qué gánnacaʼ pa nuu ca judíu guuticaʼ Jesús. Nabé cadxagayaacabe purtiʼ nuu binni racalaʼdxiʼ guuti ti maestru casi Jesús. Ngue runi guníʼ ique ca binni riʼ nuu ti demonio lu xcuerpu Jesús, ne gunabadiidxacaʼ laabe: «¿Tuu ndiʼ racalaʼdxiʼ guuti lii?» (Juan 7:19, 20).

Dxandíʼ ni purtiʼ raca ti iza arondaʼ gucalaʼdxiʼ ca líder stiʼ ca judíu ñuuticaʼ Jesús purtiʼ bisianda ti hombre dxi sábadu. Yanna biquiiñeʼ Jesús xiixa ni nánnacabe para gusihuinni qué riénecabe. Bisietenaláʼdxibe laacaʼ caquiiñeʼ gaca circuncidar ti hombrehuiiniʼ despué de xhono gubidxa de gale, casi ná Ley, neca guiaba ni dxi sábadu. De raqué gúdxibe laacaʼ: «Pa runi circuncidartu ti hombre neca dxi sábadu para cadi gucheenetu Ley stiʼ Moisés, yanna, ¿xiñee cadxiichinetu naa tisi bisiandaʼ ti hombre sábadu yaʼ? Cadi guni juzgartu pur ni rihuinni si: lagaca nachaʼhuiʼ ora guni juzgartu» (Juan 7:23, 24).

Óraque ná ca binni de Jerusalén ni runibiáʼ laabe: «Ndiʼ nga xa hombre ni racaláʼdxicabe [ca autoridad] guuticabe, ¿njaʼ? Peru, laguuyaʼ, caniʼbe nezalú binni ne cadi cayábicabe laabe gastiʼ. ¿Ñee laaca maʼ runi cré ca gobernante stinu dxandíʼ laabe nga Cristu la?». Peru stale binni qué runi cré pa Jesús nga Cristu. ¿Xiñee yaʼ? Purtiʼ nánnacaʼ padé Jesús ne runi crecaʼ «ora gueeda Cristu la? guirutiʼ zanna padé laa» (Juan 7:25-27).

Ne ndaaniʼ templu que gudxi Jesús ca binni que: «Laatu runibiaʼtu naa ne nánnatu padé naa. Cadi de naa si nga rabeʼ guendaʼ. Dxandíʼ nuu ni biseendaʼ naa, ne laatu qué runibiaʼtu laa. Naa runebiaʼyaʼ laabe, purtiʼ naa nga representante stibe, ne laabe biseendabe naa» (Juan 7:28, 29). Ora binadiaga ca binni que ni guniʼbe, gucaláʼdxicaʼ ninaazecaʼ laabe para guseguyoocaʼ ne guuticaʼ laabe, peru guirutiʼ ñuni ni, purtiʼ caʼruʼ guedandá hora stibe.

Neca zaqué, stale binni gupa fe Jesús pur guiráʼ milagru maʼ biʼniʼ: guzabe lu nisa, bicueezabe bi reciu, bidiibe ni gudó mil de binni né chupa chonna pan ne benda, maʼ bisiándabe binni huará, ca ni nachiitaʼ ñee, ca ciegu, ca ni  napa lepra... ¡Dede maʼ gundísabe gueʼtuʼ! Ngue runi né stale razón gunabadiidxacaʼ: «Ora gueeda Cristu maʼ qué zuni jma milagru que biaʼ maʼ biʼniʼ hombre riʼ, ¿njaʼ?» (Juan 7:31).

Binadiaga ca fariseu guiráʼ ni caníʼ binni de Jesús. Ngue runi biseendaʼ ca sacerdote principal ne ca fariseu caadxi guardia para guinaazecaʼ Jesús.