Maʼ gunda primavera de iza 29 de ca dxi stiʼ Jesús. Maʼ gudiʼdiʼ diecisiete iza dede dxi guyuu Jesús ndaaniʼ templu que ne canabadiidxaʼ ca maestru que. Yanna, stale binni caníʼ de Juan, pariente stiʼ Jesús, cayuni predicar guidubi región ni riaana ladu oeste stiʼ guiiguʼ Jordán.

Nabé ridxagayaa binni Juan pur modo racu lari ne modo riníʼ. De guicha ladi camellu xhábabe ne xiʼ ti cinturón de guidi ndaanibe. Robe dxiña yaga ne langosta, ti manihuiiniʼ casi uxharu. Ne cayuni predicarbe mensaje riʼ: «Lagaca arrepentir, purtiʼ maʼ bidxiña Reinu ni nuu guibáʼ» (Mateo 3:2).

Rindá mensaje stiʼ Juan ndaaniʼ ladxidóʼ ca binni ni cadxiña ne cucaadiaga laa. Stale tu cudii cuenta caquiiñeʼ gaca arrepentir, guchaa modo laa, guchaa xpiáʼ ne gusaana modo bibani dxiqué. Ne reeda «binni de guidxi Jerusalén, de guidubi Judea ne de ca guidxi nuu gaxha de guiiguʼ Jordán ra nuube» (Mateo 3:5). Cayaca arrepentir stale de ca binni riʼ de ca pecadu sticaʼ ne caguunisa Juan laacaʼ, rúnibe ni ora ruchaazibe laacaʼ ndaaniʼ guiiguʼ Jordán. ¿Xiñee riguunísabe ca binni riʼ yaʼ?

Bíʼnibe ni para guihuinni maʼ guca arrepentir ca binni riʼ de guidubi ladxidoʼcaʼ purtiʼ maʼ bicheenecaʼ pactu stiʼ Ley stiʼ Dios (Hechos 19:4). Peru cadi guirácabe runi cumplírcabe ca requisitu para chuʼnísacabe. Ora zidxiña caadxi fariseu ne saduceu Juan, gúdxibe ca xaíque yuʼduʼ riʼ «xiiñiʼ beendaʼ» ne laaca guniʼbe: «Primeru lagusihuinni pur ni gúnitu maʼ guca arrepentirtu. Ne qué chuʼ ora guiniʼtu ndaaniʼ ladxidoʼto: “Abrahán nga bixhózedu”. Purtiʼ gábecaʼ laatu zanda guindisaʼ Dios xiiñiʼ Abrahán de lade ca guié riʼ. Maʼ nuu jacha para ugá yaga dede xcu. Nga runi, guiráʼ yaga ni qué rudii cuananaxhi galán napa xidé igá ne gulaacabe laa lu bele» (Mateo 3:7-10).

Guiráʼ binni caníʼ de Juan. Ne laaca cudiibe ti mensaje nabé risaca ne caguunísabe stale binni. Pur ngue, biseendaʼ ca judíu chupa chonna sacerdote ne levita para guinabadiidxacaʼ laabe: «¿Tu lii pue?».

Bicabi Juan laacabe: «Cadi naa diaʼ nga Cristu».

Para gúdxicaʼ laabe: «Entonce, ¿tu lii yaʼ? ¿Ñee lii nga Elías la?»

«Coʼ, cadi Elías diʼ naa», ná Juan.

Para nacaʼ: «¿Lii nga xa Profeta que la?», zácaxacaʼ laabe ngue profeta ni guníʼ Moisés gueeda que (Deuteronomio 18:15, 18).

«¡Coʼ!», ná Juan rabi laacabe.

Peru qué nireecaʼ gana ne biguetaʼ gunabadiidxacaʼ laabe: «Gudxi laadu tu lii ti gápadu xi gábidu ca ni biseendaʼ laadu. ¿Xi zanda gaʼbuʼ laadu de lii yaʼ?». Óraque guniʼbe: «Naa nga stidxi tuuxa ni caníʼ lu desiertu “¡Laguni ca neza stiʼ Jehová derechu!”, casi guníʼ profeta Isaías» (Juan 1:19-23).

Cumu nuucaʼ gánnacaʼ jma la? gúdxicaʼ laabe: «Pa cadi lii nga Cristu nin Elías nin xa Profeta que, ¿xiñee runi bautizarluʼ yaʼ?». Óraque gudxi Juan laacabe ti cosa nabé risaca: «Naa runeʼ bautizar ndaaniʼ nisa. Peru nuu tobi ládetu ni qué runibiaʼtu. Laabe zeedabe atrá de naa» (Juan 1:25-27).

Pur ca diidxaʼ guníʼ Juan riʼ, bisihuinni dxiiñaʼ stiʼ nga guni preparar ti neza, nga riníʼ, gacanebe binni ni nachaʼhuiʼ ladxidóʼ para guidxaagalú Mesías ni maca nexheʼ gueeda que, ni chigaca Rey. Sicaríʼ guníʼ Juan de laabe: «Ni zeeda despué de naa jma nadipaʼ que naa, ne qué runeʼ merecer guindadeʼ elaguidi ñee» (Mateo 3:11). Ne laaca guníʼ: «Ni zeeda atrá de naa maʼ zániru luaʼ, purtiʼ maca nuube ante de naa» (Juan 1:15).

Biaʼsi peʼ mensaje ni bidii Juan riʼ: «Lagaca arrepentir, purtiʼ maʼ bidxiña Reinu ni nuu guibáʼ», purtiʼ mayaca guzulú Jesús, ni chigaca Rey, guni xhiiñaʼ Dios (Mateo 3:2).