Bizulú guyuu guendaquéiquiiñeʼ lu Guidxilayú riʼ dxi bisiguii Binidxabaʼ primé biaje. Ti ángel ni nachaʼhuiʼ ne ni qué ruchee nga laabe dxi guyaʼbe, peru despué maʼ qué ñúnibe ni jneza (Juan 8:44). Chaahuiʼ chaahuiʼ bizulú guyuuláʼdxibe guni adorárcabe laabe, peru Dios si nga napa derechu ca. Ne ti guendarusiguii si gudxítebe Eva, primé gunaa, ne bicuudxibe laa guzuubaʼ stiidxabe ne cadi guzuubaʼ stiidxaʼ Dios. Nérusica Adán yenanda lu xtoo xheelaʼ ra bicheené Dios. Ni gudixhe íquecabe gúnicabe que bedaneni guendananá ne guendaguti. Biindaʼ Génesis 3:1-6, 19.

Ra bicaa Binidxabaʼ Eva gucheené Dios nga bizulú bicaalú Binidxabaʼ Jiobá. Qué ninabe ñuuyabe Jiobá, Dios ni jma nandxóʼ, casi ti binni ni napa derechu guni mandar guibáʼ ne Guidxilayú. Cumu stale binni qué ruzuubaʼ stiidxaʼ Dios cásica Binidxabaʼ la? nga runi, maʼ beeda gaca Binidxabaʼ «xaíque sti guidxilayú». Biindaʼ Juan 14:30 ne 1 Juan 5:19.

Guiráʼ ni ruzáʼ Jiobá qué gapa cani paraa quiñeyú binni cani. Ca binni ni bizaʼbe primé ne ca ángel ñanda nuzuubacaʼ stiidxabe lu guiráʼ cosa (Deuteronomio 32:4, 5). Laabe bidiibe lugar laanu cuinu xi gúninu, pa gúninu ni jneza o pa coʼ. Nga runi, zanda quixhe íquenu guzúʼbanu stiidxabe purtiʼ nadxiinu laabe. Biindaʼ Santiago 1:13-15 ne 1 Juan 5:3.

Ti tiempu si nga cudii Jiobá lugar gucaalúcabe derechu ni napa de guni mandar guibáʼ ne Guidxilayú. Xi para yaʼ. Para gusihuínnibe qué zanda gacané nin ti gobiernu binni guidxilayú pa qué gápacaʼ ndaayaʼ stibe (Eclesiastés  7:29; 8:9). Lu xhoopaʼ mil iza de nabani binni lu Guidxilayú riʼ maʼ bihuinni nin tobi de cani huayuni mandar luni qué huayanda cuee guiráʼ cosa malu, casi guendaridinde, guendahuará ne guiráʼ cosa ni qué raca jneza. Biindaʼ Jeremías 10:23 ne Romanos 9:17.

Peru pa gudiʼnu lugar gabi Dios laanu xi naquiiñeʼ gúninu la? zabeendunu stale cosa galán (Isaías 48:17, 18). Mayaca cuee Jiobá guiráʼ ca gobiernu ni nuu lu Guidxilayú riʼ. Ca binni si ni zabani luni nga cani guni ni na gobiernu stibe (Isaías 11:9). Biindaʼ Apocalipsis 11:15.

Biiyaʼ videu ni láʼ¿Xiñee cudii Dios lugar chuʼ guendananá?

Binidxabaʼ na runi binni guidxilayú ni na Dios pur guicaacaʼ xiixa. Peru pur napa Jiobá paciencia laanu la? nga runi zanda gusihuínninu pur modo nabáninu rusiguii Binidxabaʼ ne laaca rusihuínninu cayúninu ni na gobiernu stiʼ Dios ne cadi ni na ca gobiernu ni nuu lu Guidxilayú. Biindaʼ Job 1:8-12 ne Proverbios 27:11.

Primeru naquiiñeʼ gánnanu ximodo nabe guni adorarnu laabe, laaca naquiiñeʼ guizíʼdinu gúninu ni na religión ni rusiidiʼ ni dxandíʼ, purtiʼ laani nga rusiidini ni cá lu Biblia (Juan 4:23). Ne pa chinándanu ejemplu stiʼ Jesús ra cadi chuʼnu lu política nin lu guendaridinde la? zusihuínninu qué racaláʼdxinu guni mandar Binidxabaʼ laanu. Biindaʼ Juan 17:14.

Binidxabaʼ riquiiñeʼ poder stiʼ para guyubi modo gucaa binni guni ni cadi jneza ne cosa dxabaʼ. Ora gucáʼnanu ca cosa ca zándaca gucaa nga ca xhamígunu ne ca binnilídxinu guni búrlacaʼ o gucaalucaʼ laanu (1 Pedro 4:3, 4). Pa guizaacanu zacá, naquiiñeʼ guyúbinu guidxaaganu ca binni ni nadxii Dios ne chinándanu ni na ca ley stibe. Zacá zusihuínninu bisiguii Binidxabaʼ ora guníʼ guirutiʼ zuzuubaʼ stiidxaʼ Dios ora tiidiʼ lu guendanagana. Biindaʼ 1 Corintios 6:9, 10 ne 15:33.

Cumu nadxii Dios laanu la? nga rusihuinni zabeebe guendananá ne guendaquéiquiiñeʼ. Cani gusihuinni napa fe ne chuʼ ladu stiʼ Dios la? zabani lu Guidxilayú sin qué chuʼ dxi gati. Biindaʼ Juan 3:16.