NDAA 9
Ximodo zanda guibani binni nayecheʼ né binnilidxi
1. Xiñee nabé risaca guichaganáʼ binni casi na ley
Jiobá nga ti Dios ni nayecheʼ ni rabi laanu stale diidxaʼ sicarú ne racalaʼdxiʼ guibani binni nayecheʼ né binnilidxi (1 Timoteo 1:11, TNM). Laabe nga gudixhestibe guendaxheelaʼ. Ca binni ni guichaganáʼ casi na ley la? jma riuucaʼ nayecheʼ ne runi sentircaʼ nuu tu nadxii laacaʼ ne zacaca runi sentir ca xiiñicaʼ. Ca xpinni Cristu napa xidé chinándacaʼ ley stiʼ gobiernu ra na naquiiñeʼ gaca ti guiʼchiʼ ni gusihuinni maʼ bichaganacaʼ. Biindaʼ Lucas 2:1, 4, 5.
Ñee para chupa gubidxa si nga gudixhe Dios guichaganáʼ ti hombre ne ti gunaa la? Coʼ, sínuque para guidubi xquendanabánicabe. Jiobá qué riuulaʼdxiʼ gucheené binni xheelaʼ (Hebreos 13:4). Laabe nanaláʼdxibe gaca divorciar binni (Malaquías 2:16). Peru rudiibe lugar gaca divorciar binni ne guichaganáʼ stiʼ biaje pa chuʼné xheelabe stobi. Biindaʼ Mateo 19:3-6, 9.
2. Ximodo naquiiñeʼ gaca binni né xheelaʼ
Dxiiñaʼ ni gudíxhe Jiobá guni ti hombre ne ti gunaa biáʼsipeʼ laacani nga caquiiñeʼ lu ti guendaxheelaʼ (Génesis 2:18). Hombre nga gudíxhebe gaca xaíque, nga runi laabe nga gudiibe ni caquiiñeʼ binnilídxibe ne gusiidibe laacaʼ de Dios. Laaca naquiiñeʼ gúnibe stale cosa para gusihuínnibe nadxiibe xheelabe neca gácani nagana para laabe. Cani maʼ bichaganáʼ naquiiñeʼ gannaxhiisaacaʼ ne guni respetársaacaʼ. Ne cumu guirópacabe binni ruchee laacabe la? laaca naquiiñeʼ guiziidicabe gutiidiláʼdxicabe stóndacabe para ganda guibánicabe nayecheʼ. Biindaʼ Efesios 4:31, 32; 5:22-25, 33, ne 1 Pedro 3:7.
3. Ñee jneza nga gusaanaluʼ xheelaluʼ pa cadi nabézaneluʼ laabe nayecheʼ la?
Pa cadxaagalú chupa binni guendanagana lu xquendaxheelacaʼ la? guirópacabe nga naquiiñeʼ gúnicabe stipa pur gannaxhiisaacabe (1 Corintios 13:4, 5). Stiidxaʼ Dios na cadi jneza diʼ guiníʼ ique binni zaca chaahuiʼ ca guendanagana ni rapa lu xquendaxheelaʼ pa gusaana xheelaʼ. Biindaʼ 1 Corintios 7:10-13.
4. Ximodo riuulaʼdxiʼ Dios guibani xiiñiʼ binni
Jiobá racalaʼdxiʼ guibani xiiñiʼ binni nayecheʼ. Nga runi, rusiidibe laacaʼ ximodo zanda cueenducaʼ ni galán laga nahuiinicaʼ. Laaca riuuláʼdxibe guiziidicaʼ guiráʼ ni nanna bixhózecaʼ ne jñaacaʼ (Colosenses 3:20). Ne racaláʼdxibe chuʼcaʼ nayecheʼ ora gúnicaʼ ni nabe ne ni na Xiiñibe. Biindaʼ Eclesiastés 11:9–12:1; Mateo 19:13-15, ne 21:15, 16.
5. Ximodo zanda gacané binni xiiñiʼ para guibani nayecheʼ
Bixhoze ne jñaa binni nga naquiiñeʼ guni stipa pur guyaanaʼ ca xiiñiʼ, gudii ra gásicabe ne ni gácucabe (1 Timoteo 5:8). Peru cadi ngasi nga naquiiñeʼ gúnicabe, sínuque laaca naquiiñeʼ gusiidicabe laacaʼ gannaxhiicaʼ Dios ne guiziidicaʼ gácacaʼ casi laabe (Efesios 6:4). Ora gusihuinni binni nadxii Dios la? racaneni xiiñicaʼ guni casi rúnicaʼ. Ne ora guiziidiʼ xiiñicabe cani zeeda lu Stiidxaʼ Dios racaneni laacaʼ guchaacaʼ modo riníʼ íquecaʼ ne guiníʼ íquecaʼ jneza. Biindaʼ Deuteronomio 6:4-7 ne 2 Timoteo 3:15.
Laaca naquiiñeʼ uguu binni gana xiiñiʼ ora guni ni jneza. Ne nuu tiru laaca naquiiñeʼ gulídxecabe xiiñicabe ne uguu jnézacabe laacaʼ. Pa gúnicabe zacá la? zacanécabe laacaʼ para cadi gúnicaʼ xiixa ni guniná laacaʼ (Proverbios 22:15). Neca naquiiñeʼ gulídxecabe ca xiiñicabe, peru cadi naquiiñeʼ guninácabe laacaʼ. Biindaʼ Colosenses 3:21.
Ca testigu stiʼ Jiobá maʼ huabeecaʼ stale libru para gacané bixhoze ne jñaa binni ne para xiiñicaʼ. Lu Biblia nga biree guiráʼ ni zeeda lu ca libru ca. Biindaʼ Salmo 19:7, 11.
Laaca zándaca ziuuláʼdxiluʼ ca ndiʼ
ZANDA GUIBANI FAMILIA STIUʼ NAYECHEʼ
Laguyubi Dios ti chuʼtu nayecheʼ lu xquendaxheelatu
Zanda gacané chupa guendarinabadiidxaʼ lii guibanuʼ nayecheʼ lu xquendaxheelaluʼ.
ZANDA GUIBANI FAMILIA STIUʼ NAYECHEʼ
Ximodo guni chaahuitu guendanagana
Modo gudxiilutu ca guendanagana stitu zacaneni chuʼ xquendaxheelatu naguidxi ne zabánitu nayecheʼ, peru pa cada tobi de laatu guni ni gacalaʼdxiʼ la? qué ziuu ni naguidxi ne qué zabánitu nayecheʼ.
