• IZA GÚLEBE: 1963

• PADÉ LAABE: GRAN BRETAÑA

• NI NAQUIIÑEʼ GÁNNALUʼ: BISAANABE CARRERA RISACA STIBE

MODO BIBANEʼ DXIQUÉ:

Guleʼ ndaaniʼ ti distrito del sur de Londres ni láʼ Croydon. Bixhozeʼ ne jñaaʼ de isla caribeña de San Vicente laacaʼ. Gúpacabe gaʼ xiiñicabe, ne naa nga de lu xhoopaʼ. Neca jñaaʼ guyé yuʼduʼ stiʼ ca metodista la? naa qué nizaaladxeʼ ñannaʼ de religión. De xcuidi naa gucalaʼdxeʼ ñannaʼ de guiráʼ cosa. Ngue runi, cada gapaʼ vacación ritiéʼ ruaa ti lago ni nuu gaxha ne ruundaʼ guiráʼ ca libru ni rutiiñecabe naa ra biblioteca.

Chupa chonna iza despué de biluxe’ scuela, gudixheʼ iqueʼ gacaniáʼ ca binni ni qué gapa tu gacané laacaʼ. Bizuluáʼ gucaniáʼ ca binni de lu calle, ca ni napa xiixa discapacidad o ca ni raca nagana para laacaʼ guiziidicaʼ xiixa. Despué bizuluáʼ ti cursu de ciencias de la salud ra universidad. Guizáʼ bidxagayaaʼ purtiʼ gucaʼ graduar siaʼ guizáʼ galán guyé ni naa. Gupaʼ ti dxiiñaʼ nabé risaca ra biaxa galán, ngue runi bibaneʼ né stale luju. Gucaʼ gerente ne investigadora social independiente. Ti computadora portátil si ne internet nga riquiiñeʼ para guneʼ xhiiñaʼ. Gatigá bineʼ viajar guidxi zitu ne riaanaʼ chupa chonna semana ndaaniʼ hotel ni jma riuuladxeʼ, raqué riaaʼ gimnasio, ra rudiicabe masaje ne runeʼ disfrutar de ca lugar sicarú napa ni. Guníʼ iqueʼ gastiʼ cayaadxaʼ naa para guibaneʼ nayecheʼ. Peru neca zaqué, qué nusaanaʼ de ñuaaʼ xizaa pur ca binni pobre.

XIMODO GUCANÉ BIBLIA NAA PARA BICHAAʼ:

Stale iza nga gunabadiidxaʼ xi para biseendaʼ Dios laanu lu Guidxilayú ne xi propósitu napa xquendanabáninu, peru qué lica niníʼ iqueʼ ni nuyube’ ni lu Biblia. Lu iza 1999, málasi ti dxi, beeda ganna Margaret, bendaʼ ni jma nahuiiniʼ naa, laa ne ti xhamiga. Guirópacabe nácacabe testigu stiʼ Jehová. Guizáʼ nachaʼhuiʼ guca xhamígabe que né naa, de nin nudieeʼ cuenta, bineʼ aceptar guni estudiárnebe naa Biblia. Peru pur dxiiñaʼ stinneʼ que ne pur modo nabaneʼ qué napaʼ piaʼ tiempu, ngue runi guizáʼ nanene bineʼ progresar.

Lu verano de 2002, yendezaʼ suroeste stiʼ Inglaterra purtiʼ racalaʼdxeʼ guneʼ estudiar jma de investigación social para gapaʼ doctorado stinneʼ. Raqué la? jma gatigá yeniaʼ xiiñeʼ reunión ra Yoo stiʼ Reinu stiʼ ca testigu stiʼ Jehová. Neca guyaaʼ universidad, peru dxiruʼ bineʼ estudiar Biblia nga bieneʼ xiñee nga nuu ca guendanagana riʼ ne ximodo zaca chaahuicaʼ ni. Laaca gucané ca diidxaʼ ni zeeda lu Mateo 6:24 naa gudieeʼ cuenta qué zanda gapaʼ chupa xpixuaanaʼ: naquiiñeʼ cueʼ tobi si, Dios la? o bueltu. Pur decisión ni guicaaʼ que zusihuinneʼ xii nga ni jma risaca para naa.

Ti iza ante, nabé guyaaʼ estudiu de libru ni rapa ca Testigu ra lidxi ti hermanu, raqué bidúʼndadu libru ni láʼ ¿Existe un Creador que se interese por nosotros? a Pur ca ni biziideʼ que bieneʼ, Jehová, Dios ni bizáʼ laanu, laasibe nga zanda guni chaahuibe guiráʼ ca guendanagana ni napa binni. Peru ra universidad rusiidicabe, para guibániluʼ nayecheʼ la? cadi caquiiñeʼ guni creluʼ nuu tu bizáʼ laanu. Guizáʼ bichiichi ngue naa. Ngue runi, neca chupa beeu si ziniáʼ raqué la? bisaanaʼ clase que, ne gudixheʼ iqueʼ iquiiñeʼ tiempu stinneʼ para chuaaʼ jma gaxha de Dios.

Ti textu ni gucané naa guchaaʼ modo nabaneʼ nga Proverbios 3:5, 6, nani: «Gupa confianza Jehová de guidubi ladxidoʼloʼ, ne cadi chinándaluʼ ni ná xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu». Gástiruʼ sti cosa jma galán qué gunebiaʼyaʼ Dios ni nadxii laanu, ne qué zanda guchaagaʼ ni ti doctorado, bueltu o gunibiáʼcabe naa casi ti binni risaca. Ra jma biziideʼ xi naguixhe ique Dios guni lu Guidxilayú riʼ ne de sacrificiu ni bi’ni’ Jesús ra gutiʼ pur laanu la? jma gucuá iqueʼ gudieeʼ xquendanabaneʼ Dios. Ngue runi abril de 2003 guyuaanisaʼ casi ti testigu stiʼ Jehová ne de raqué maʼ bibaneʼ ti vida sencíu.

XI MAʼ GULEENDUÁʼ:

Gástiruʼ sti cosa jma risaca que gacaʼ xhamiguaʼ Dios. Yanna ra maʼ runebiaʼyaʼ laabe, maʼ nuudxí ladxiduáʼ ne nabaneʼ nayecheʼ. Ne laaca nayecheʼ riuaaʼ lade ca xpínnibe ni qué rusaana laabe.

Ni racané naa guneʼ satisfacer necesidad ni napaʼ de guiziideʼ jma nga guneʼ estudiar Biblia ne cadi guiaadxaʼ ca reunión ca. Laaca guizáʼ riuuladxeʼ guinieniáʼ xcaadxi binni de ni runeʼ cré, ngue runi maʼ laani nga nácani carrera stinneʼ. Ne dede lu junio de 2008 que maʼ nacaʼ precursora, zacá la? racaniáʼ xcaadxi binni guibani jma galán ne rápacaʼ oportunidad guibánicaʼ ndaaniʼ ti guidxilayú sicarú despué. Qué huayuu dxi chuaaʼ nayecheʼ casi yanna ne maʼ dxátipa ladxiduáʼ. Rudieeʼ xquixe peʼ Dios purtiʼ yanna huaxa maʼ napa xquendanabaneʼ propósitu.

• IZA GÚLEBE: 1973

• PADÉ LAABE: AUSTRIA

• NI NAQUIIÑEʼ GÁNNALUʼ: NABÉ GUYUULADXEʼ JUEGU NE APUESTA

MODO BIBANEʼ DXIQUÉ:

Guleʼ ndaaniʼ ti guidxihuiiniʼ láʼ Braunau (Austria), ndaaniʼ ti familia católica. Nabé galán nabani binni lugar que ne huaxiéʼ delincuencia nuu.

Rietenalaʼdxeʼ ti huadxí lu iza 1984, dxi napaʼ 11 iza, bizaaca xiixa ni bichaa xquendanabaneʼ. Guti tobi de ca xhamiguaʼ ni gudxiteniáʼ fútbol lu ti accidente. Stale iza gucaʼ traumar, siempre guníʼ iqueʼ xi rácanu ora maʼ gútinu.

Dxi maʼ qué ñaaʼ scuela la? maʼ bineʼ dxiiñaʼ de electricista. Qué nindaa maʼ guyuuladxeʼ quiteʼ juegu ne apuesta. Neca riguiteʼ stale bueltu qué ñaadxaʼ gastiʼ naa. Nabé bineʼ deporte ne bicaadiagaʼ música heavy metal ne punk. Bibaneʼ ti vida inmoral ne nabé guyaaʼ discoteca ne saa. Bineʼ guiráʼ ni racala’dxe’, peru neca zacá bineʼ sentir cayaadxaʼ xiixa lu xquendanabaneʼ.

XIMODO GUCANÉ BIBLIA NAA PARA BICHAAʼ:

Lu iza 1995, bixhidxináʼ ti testigu stiʼ Jehová ni maʼ huaniisi ra puertaʼ stinneʼ. Ne bi’ni’ ofrecerbe naa ti libru ni biree de lu Biblia, cacabi ni pregunta: «¿Xi rizaaca binni ora maʼ guti?». Gucuaaʼ ni purtiʼ riuaarua’ xizaa pur modo guti xhamiguaʼ que. Ngue runi, cadi capítulo si ni cacabi pregunta ca biindaʼ, sínuque interu peʼ libru ca.

Cadi bicabi si ni ca pregunta ni runeʼ de guendaguti, sínuque biziideʼ stale cosa. Cumu ndaaniʼ ti familia católicu nga biniiseʼ la? Jesucristu si nga bineʼ cré. Peru ra maʼ bineʼ estudiar chaahueʼ Biblia la? maʼ gucaʼ xhamiguaʼ Jehová Dios, Bixhoze Jesús. Guizáʼ biecheʼ ora gunnaʼ rizaalaʼdxiʼ Dios ca xpinni ne racanebe laacaʼ para guidxíñacaʼ laabe (Mateo 7:7-11). Laaca biziideʼ nápabe sentimientu ne runi cumplirbe stiidxabe. Ndiʼ gucané naa guizaalaʼdxeʼ gannaʼ ximodo guca cumplir ca profecía ni zeeda lu Biblia. Ni biziideʼ riʼ, gucané ni naa iguidxi fe ni napaʼ Dios.

Qué nindaa bidieeʼ cuenta ca Testigu si nga racanecaʼ binni guiene xi rusiidiʼ Biblia. Rucaaʼ guiráʼ ca versículo ni zeeda lu publicación stícabe, ne despué ruyubeʼ ni lu Biblia católicu stinneʼ. Ra jma bineʼ investigar la? jma guyuaaʼ seguru maʼ bidxelaʼ religión ni rusiidiʼ ni dxandíʼ.

Laaca biziideʼ de lu Biblia, ribeza Jehová chinandaʼ ca regla stiʼ. Ora biindaʼ Efesios 4:22-24, bieneʼ naquiiñeʼ gusaanaʼ modo bibaneʼ dxiqué ne guibaneʼ «modo racala’dxi’ Dios» casi ora ñacuaʼ ti lari nacubi. Nagueendaca bisaanaʼ vida inmoral ni gupaʼ que né ca cosa ni rucaa naa gapaʼ jma, casi ca juegu ne ca apuesta que (1 Corintios 6:9, 10). Bidieeʼ cuenta para ganda guchaaʼ modo nabaneʼ que la? naquiiñeʼ gusaanaʼ de guidxaagaʼ ca binni ni guca xhamiguaʼ dxiqué ne guidxaagaʼ ca binni ni rinándacaʼ ca principiu ni zeeda lu Biblia.

Nagana guca ni, peru ra maʼ guyaaʼ reunión stiʼ ca Testigu ni raca gaxha de ra nabezaʼ que, maʼ bidxelaʼ ca amigu ni cuyubeʼ que. Laaca qué nusaanaʼ de ñuneʼ estudiar Biblia ne de niníʼ iqueʼ ni caziideʼ. Ngue runi chaahuiʼ chaahuiʼ bisaanaʼ de gucaadiaʼgaʼ ca música que, bichaaʼ ca meta stinneʼ ne modo ruzuchaahueʼ. Ngue runi lu 1995 maʼ guyuaanisaʼ casi ti Testigu.

XI MA’ GULEENDUÁʼ:

Yanna riʼ, maʼ bichaa modo ruuyaʼ gapa binni bueltu ne cosa material. Laaca maʼ biziideʼ guneʼ controlar carácter stinneʼ ne cadi guidxiicheʼ nagueenda casi dxiqué, ne laaca maʼ qué riuaaʼ piaʼ xizaa xi guizaaca despué.

Guizáʼ nayecheʼ runeʼ sentir purtiʼ nuaa’ lade ti grupu de binni de guiráʼ guidxi ni runi ni ná Jehová. Neca gadxé gadxé guendanagana ridxaagalúcabe, peru qué rusaanacabe de gúnicabe ni nabe. Né stale guendanayecheʼ zanda guinieeʼ, ni jma cá iqueʼ yanna nga guneʼ ni ná Jehová ne gacaniáʼ xcaadxi binni ne cadi guneʼ ni racala’dxe’.

• IZA GÚLEBE: 1963

• PADÉ LAABE: GRAN BRETAÑA

• NI NAQUIIÑEʼ GÁNNALUʼ: GUCA DECEPCIONARBE DE GUENDANABANI

MODO BIBANEʼ DXIQUÉ:

Guleʼ Inglaterra, peru dxi napaʼ gadxe iza yendeza familia stinneʼ Australia ti lugar turístico stiʼ Queensland ni láʼ Gold Coast. Neca qué ñácadu ricu, peru qué ñuu dxi ñaadxaʼ gastiʼ laadu.

Neca gupaʼ guiráʼ ni caquiiñeʼ, peru qué ñuaaʼ nayecheʼ. Gucaʼ decepcionar de guendanabani. Cumu guizáʼ guxudxi bixhozeʼ la? qué ñannaxhieeʼ piaʼ laabe. Qué ñuuladxeʼ modo bi’ni’ tratarbe jñaaʼ ne purtiʼ guizáʼ guxúdxibe. Despué de stale iza gunnaʼ guizáʼ bi’ni’ sufrirbe dxi guyuube lu ejércitu Malasia, ne oraqueruʼ bieneʼ xiñee zaqué laabe.

Bizuluáʼ guxudxeʼ dxi maʼ adolescente naa, ne dxi napaʼ 16 iza, bisaanaʼ de chaaʼ scuela ne maʼ guyaaʼ ra marina. Biaʼ tiempu guyuaaʼ raqué, bineʼ prueba gadxé gadxé droga, gupaʼ viciu de gueza ne gucaʼ ti alcohólicu. Bizuluáʼ guxudxeʼ ca fin de semana ca, peru despué maʼ guxudxeʼ guirá dxi.

Dxi napaʼ biaʼ 20 iza bineʼ dudar pa dxandíʼ nuu Dios, ne guníʼ iqueʼ pa nuube, ¿xiñee rudiibe lugar guni sufrirnu ne gátinu? Dede bicaaʼ poema ra cugaaneʼ donda Dios pur guiráʼ ca cosa malu ni ruuyaʼ lu guidxilayú.

Dxi napaʼ 23 iza bisaanaʼ de ñaaʼ ra marina. Bineʼ gadxé gadxé dxiiñaʼ ne bineʼ viajar ti iza guidxi zitu, peru neca zaqué qué nidxelaʼ xi ñuneniaʼ xquendanabaneʼ. Qué ñapaʼ nin ti meta ne nin ti deseu o ti razón ni nucaa naa ñuneʼ xiixa. Guníʼ iqueʼ pur gana si nga gapaʼ ti dxiiñaʼ ti yoo o ti puestu galán, ni jma gucuá iqueʼ nga xhudxeʼ ne gucaadiaʼgaʼ música.

Rietenaladxeruáʼ dxi bineʼ sentir deseu de gannaʼ xi propósitu napa guendanabani. Bizaacani Polonia dxi guyaaʼ de visita lu campu de concentración stiʼ Auschwitz, ti lugar bizaaca stale cosa malu. Maca huayuundaʼ pabiáʼ feu modo bininácabe binni raqué, peru guizáʼ triste guyuaaʼ ora biiyaʼ pabiáʼ naro’ba’ campu que. Guca nagana naa guieneʼ xiñee runi binni guiráʼ ca guendaquéiquiiñeʼ ca. Laga zizayaʼ ndaaniʼ campu que ne cayuunaʼ, guníʼ iqueʼ: ¿Xiñee, xiñee pue?

XIMODO GUCANÉ BIBLIA NAA PARA BICHAAʼ:

Lu iza 1993, biguetaʼ siaʼ de viaje que, gudixhe iqueʼ guyubeʼ ca respuesta que lu Biblia. Qué nindaa bixhidxináʼ chupa testigu stiʼ Jehová ra puertaʼ lidxeʼ ne bi’ni’ invitárcabe naa ti asamblea ni chigaca ra ti estadio ni nuu gaxha de ra nabezaʼ. Ne guyaaʼ ni.

Chupa chonna beeu ante guyaaʼ ra estadio que yeguuya ti partidu, peru biaje riʼ la? maʼ gadxé peʼ modo biiyaʼ ni. Nabé nacha’hui’ ca Testigu, galán modo ruzuchaahuicaʼ ne ribidxí ca xiiñicaʼ. Ora intermediu que bizaaca xiixa ni bicaa naa guidxagayaaʼ, neca gayuaa de ca Testigu que gudocaʼ lu campu que, peru ora biguétacabe lugar stícabe la? qué nusaanacabe nin ti guixihuiiniʼ layú que. Peru ni jma bidxagayaaʼ nga ora biiyaʼ pabiáʼ nayecheʼ nuucabe ne nuucabe tobi si. Ne nga peʼ nga ni racala’dxe’. Qué rietenalaʼdxeʼ nin tobi de ca discursu ni biete raqué, peru qué ziuu dxi guiaandaʼ naa ximodo naca ca Testigu.

Huaxhinni queca bietenaladxeʼ de ni gudxi xprimuaʼ naa chupa chonna iza ante, laabe runibiaʼbe Biblia ne nánnabe stale de ca religión ca. Gúdxibe naa guníʼ Jesús, zunibiáʼcabe ca ni dxandíʼ xpinni Cristu pur ni rúnicaʼ (Mateo 7:15-20). Ngue runi gucuá iqueʼ gannaʼ xiñee gadxé peʼ naca ca Testigu. Ne ngue nga primé biaje gupaʼ ti esperanza ne guizáʼ biecheʼ.

Sti semana que beeda ganna ca Testigu ni bi’ni’ invitar naa asamblea que sti biaje. Bi’ni’ ofrecércabe naa ti cursu de lu Biblia, ne gudxeʼ laacabe zaa gusiidicabe naa. Ne maʼ bizuluáʼ guyaaʼ ca reunión ni rápacabe.

Ra jma bineʼ estudiar Biblia la? bichaa modo riníʼ iqueʼ de Dios. Biziideʼ cadi laadibe nápabe donda de ca guendanagana ne ca yuubaʼ ni nuu, sínuque racanabe ora gúʼyabe de guiráʼ ca cosa malu ni runi binni (Génesis 6:6; Salmo 78:40, 41). Gudixhe iqueʼ guneʼ stipa cadi gunenaʼyaʼ laabe, sínuque gusiecheʼ ladxidoʼbe (Proverbios 27:11). Ngue runi bisaanaʼ de cubaʼ gueza de xhudxeʼ ne ca práctica inmoral ni bineʼ que. Ne qué nindaa, lu beeu marzo iza 1994 guyuaanisaʼ casi testigu stiʼ Jehová.

XI MA’ GULEENDUÁʼ:

Yanna huaxa maʼ nuaa’ nayecheʼ ne maʼ dxátipa ladxiduáʼ. Maʼ qué rixudxéʼ para gusiaandaʼ guiráʼ ca cosa ni riguu xizaa naa, sínuque rusaanaʼ ca ni lu náʼ Jehová (Salmo 55:22).

Ma’ napaʼ chii iza de bichaganayaʼ ti Testigu láʼ Karen, ne napaʼ ti hijastra guizáʼ nuu xpiaaniʼ láʼ Nella. Guiónnadu runi predicardu né stale gana para gacanedu xcaadxi binni gánnacaʼ ni dxandíʼ de Dios. Yanna huaxa maʼ nannaʼ xi guneniaʼ xquendanabaneʼ.