Santiago 2:1-26
2 Hermanu ni nadxieeʼ caʼ, pa maʼ nápatu fe Jesucristu Señor stinu ni nandxóʼ,* ¿xiñee rusisácatu caadxi binni ne rúnitu menu xcaadxi pue?*
2 Purtiʼ pa cheʼ ti hombre nuu aníu de oro náʼ ne nacu lari risaca tobi de ca reunión stitu, ne cheʼ ti pobre ni nabiidiʼ xhaba,
3 peru jma galán guni tendertu ni nacu lari risaca que ne gábitu laa «Gurí raríʼ, ra jma galán riʼ», ne gábitu pobre que «Bizuhuaa racá» o «Gurí raricaʼ, cueʼ banguhuiiniʼ ra riguixheñeeʼ».*
4 Pa gúnitu zacá, ¿ñee cadi maʼ nácatu ti juez ni ricaa decisión ni cadi jneza, purtiʼ jma cusisácatu caadxi binni ne cayúnitu menu xcaadxi la?
5 Hermanu ni nadxieeʼ caʼ, lagucaadiaga. ¿Ñee cadi ca pobre para binni guidxilayú nga ca ni gulí Dios para gápacaʼ stale fe la? Laacaʼ nga ca ni gulí Dios para guicaacaʼ Reinu casi ti herencia ni biʼniʼ prometerbe gudiibe ca ni nadxii laabe.
6 Peru laatu runi despreciartu ca pobre. ¿Ñee cadi ca ricu ca nga ca ni ruquiichináʼ laatu ne rinecaʼ* laatu nezalú justicia la?*
7 Dios nga ni nuu lu ti puestu jma risaca, ne xpínnibe laatu, peru laacabe la? riníʼcabe contra lá binni ni gulí laatu.*
8 Cá ti ley risaca* lu Stiidxaʼ Dios ni ná «Gunnaxhii prójimo stiluʼ cásica nadxiiluʼ lii». Ne pa dxandíʼ cayúnitu casi ná ni la? jneza cayúnitu.
9 Peru pa dede yanna rusisácatu caadxi binni ne rúnitu menu xcaadxi la?* cucheetu ne zaguiʼbaʼ donda íquetu purtiʼ cadi cayúnitu ni ná ley.
10 Purtiʼ pa nuu tobi cayuni guiráʼ ni ná Ley peru gucheené neca ti mandamientu si la? pur tobi si que zaguiʼbaʼ donda ique, purtiʼ casi ñaca maʼ bicheené guidubi naca Ley.
11 Purtiʼ guníʼ Dios: «Cadi gápaluʼ jnadxiiluʼ»,* ne laaca guníʼ: «Cadi guutiluʼ». Yanna, pa qué rápaluʼ jnadxiiluʼ, peru ruutiluʼ la? cucheeluʼ, purtiʼ cadi cayúniluʼ ni ná ley.
12 Naquiiñeʼ guiniʼtu ne guibánitu casi ti binni ni chigaca juzgar pur ley ni runi binni libre.
13 Purtiʼ ti binni ni qué riá la?* laaca qué ziácabe laa ora gaca juzgar. Peru ti binni ni riá la? zuni ganar ora guni juzgárcabe laa.
14 Hermanu caʼ, ¿paraa iquiiñeʼ ni ti binni pa guiníʼ napa fe, peru qué gusihuinni ni né ca obra stiʼ yaʼ? ¿Ñee natu zanda guilabe purtiʼ si nápabe fe la?
15 Pa qué gapa ti hermanu o ti hermana lari ni gacuʼ ne qué zugaanda guendaró stiʼ para tidiné dxi,
16 ne gabi tobi de laatu laabe: «Sicarú guyé ne biiyaʼ ximodo chuʼluʼ nadxaa ne gudó dede ra guidxaluʼ», peru qué gudiitu laabe ni caquiiñebe,* ¿ñee natu zacané nga laabe la?
17 Zaqueca nga binni ni ná napa fe peru que rusihuinni ni né ca obra stiʼ. Qué iquiiñeʼ fe stiʼ.*
18 Zándaca chuʼ tu guiníʼ: «Lii nápaluʼ fe, peru naa zulueeʼ lii napaʼ obra. Qué zanda di’ gábilu’ naa nápalu’ fe pa qué rusihuínniluʼ ni né ca obra stiluʼ. Peru naa zanda guluéʼ lii dxandíʼ napaʼ fe pur ca obra stinneʼ».
19 Lii runi creluʼ ti Dios si nga nuu, ¿njaʼ? Jneza rúniluʼ. Dede ca demonio laaca runi crecaʼ ni ne racadíticaʼ.
20 Peru lii, binni huati, ¿ñee qué riéneluʼ qué iquiiñeʼ fe stiluʼ pa qué gusihuínniluʼ ni né ca obra stiluʼ la?
21 ¿Ñee cadi pur ni biʼniʼ Abrahán,* bixhózenu, nga guníʼ Dios nácabe ti binni nachaʼhuiʼ la?* Pur nga pue. Guníʼ Dios ni despué de gudíxhebe Isaac, xiiñibe, lu altar.
22 ¿Maʼ biiyaluʼ la? Bisihuínnibe nápabe fe pur guiráʼ ni bíʼnibe, ne pur laacani bizaa chaahuiʼ fe stibe.*
23 Ne guca cumplir ni cá lu Stiidxaʼ Dios ra ná: «Gupa Abrahán fe Jehová,* ne laa biiyaʼ laabe casi ti binni nachaʼhuiʼ».* Ne gúdxicabe laabe xhamigu Jehová.*
24 Maʼ biiyatu reeda gaca tuuxa ti binni nachaʼhuiʼ* pur ni runi,* ne cadi pur fe si ni napa.
25 Zaqueca bizaaca Rahab, xa prostituta que, ¿ñee cadi pur ni bíʼnibe* nga guníʼ Dios nácabe ti binni nachaʼhuiʼ la?* Pur nga pue. Guníʼ Dios ni despué de bidxaagalube* ca espía que ne gúdxibe laacaʼ guicaacaʼ sti neza.
26 Zacá nga laani, cásica qué iquiiñeʼ cuerpu stinu sin espíritu, zaqueca qué iquiiñeʼ fe stinu* pa qué gusihuínninu ni né ca obra stinu.
Nota
^ O «glorioso».
^ O «¿xiñee rusihuínnitu favoritismo pue?».
^ O «Gurí layú».
^ Lit. «rixubiyucaʼ».
^ O «tribunal».
^ Lit. «ti ley stiʼ rey».
^ O «pa de yanna rusihuínnitu favoritismo la?».
^ O «rapa misericordia».
^ Lit. «ni caquiiñeʼ xcuérpube».
^ Lit. «Maʼ guti fe stiʼ».
^ O «ca obra stiʼ Abrahán».
^ O «justo».
^ Lit. «ne pur cani bíʼnibe guca perfeccionar fe stibe».
^ O «justo».
^ O «justo».
^ O «pur ca obra stiʼ».
^ O «ca obra stibe».
^ O «justo».
^ O «gúcabe hospitalaria né».
^ O «maʼ guti fe stinu».
