Santiago 1:1-27
1 Naa nga Santiago. Nacaʼ esclavu stiʼ Dios ne stiʼ Jesucristu. Cucaaʼ carta riʼ ra nuu 12 tribu ni reeche ndase guiráʼ ladu:
¡Laguicaa diuxi stinneʼ!
2 Hermanu ni nadxieeʼ caʼ, ora maʼ cadíʼditu lu intiica prueba, laguuyaʼ ni casi xiixa ni zanda gusiecheʼ laatu,
3 purtiʼ nánnatu ora maʼ gudiʼdiʼ calidad de fe stitu lu prueba, zaziiditu guni huantartu.
4 Peru pa qué gusaana de guni huantartu la? qué zápatu ra quiñeyúcabe laatu,* ne zúnitu guiráʼ cosa jneza, ne gastiʼ qué ziaadxaʼ laatu.
5 Nga runi, pa cayaadxaʼ sabiduría tuuxa de laatu la? guinabaʼ ni Dios, purtiʼ rudii Dios de guidubi ladxidóʼ ne qué ruchá ni lú binni.*
6 Peru naquiiñeʼ guinabaʼ ni né fe, ne cadi gapa duda. Purtiʼ ni napa duda la? zeeda gaca casi ola stiʼ nisadóʼ ni riné bi cheríʼ chericaʼ.
7 Ti binni zacá la? cadi cueza gudii Jehová* laa xiixa.
8 Naca binni riʼ tobi ni raca nagana para laa guicaa ti decisión, ne qué zanda gudxiilú neza zeʼ.*
9 Ti hermanu pobre la? riecheʼ* purtiʼ risaca nezalú Dios,
10 ne ti hermanu ricu la? laaca riecheʼ purtiʼ maʼ biziidiʼ gaca humilde, purtiʼ ca ricu la? zanitilucaʼ casi ti guieʼ guiʼxhiʼ.
11 Purtiʼ riree gubidxa ne rusiguunduʼ xtuxu ni ti yagahuiiniʼ ne riaba guieʼ stini ne rinitilú guendasicarú stini, zacaca zanitilú binni ricu laga canazá canayubi ximodo gaca jma ricu.
12 Dichoso binni ni cayuni huantar laga cadiʼdiʼ lu prueba, purtiʼ ora maʼ gudiʼdiʼ luni la? zudii Jehová* laa guendanabani, laani nga premiu* ni biʼniʼ prometer gudii ca ni qué gusaana de gannaxhii laa.
13 Ora cadiʼdiʼ tuuxa lu ti prueba, cadi guiníʼ: «Cutiidiʼ Dios naa lu prueba». Purtiʼ qué zanda gutiidiʼ binni Dios lu prueba né cosa malu, ne qué rutiidiʼ Dios binni lu prueba.
14 Ndiʼ nga laani: cada tobi ridiʼdiʼ lu prueba ora rigubayú deseu stiʼ laa ne ora ruquiindeni laa.*
15 Ora maʼ guca deseu ca nadipaʼ, rucaani binni guni pecar,* ne ora maʼ biʼniʼ pecar binni la? rineni laa lu guendaguti.
16 Cadi quítetu laca laatu, hermanu caʼ.
17 Guiráʼ regalu sicarú ne guiráʼ cosa nachaʼhuiʼ* zeeda de guibáʼ, ne Bixhózenu ni bizáʼ ca biaaniʼ ni nuu guibáʼ nga rudii ni laanu. Ne laa qué ruchaa ne nin qué riniibi casi riniibi bandáʼ.
18 Bidiibe laanu guendanabani ra biʼniʼ crenu stiidxabe ni dxandíʼ, purtiʼ racaláʼdxibe gúnibe ni, ti gácanu de ca binni ni cuibe primé lade guiráʼ binni.
19 Hermanu ni nadxieeʼ caʼ, racalaʼdxeʼ gánnatu ndiʼ: naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ ne cadi casi zetu guidxiichitu.
20 Purtiʼ ora cadxiichi binni la? qué zanda guni ni riuulaʼdxiʼ Dios.*
21 Lacuee guiráʼ ni nadxabaʼ ndaaniʼ ladxidoʼto ne cadi gusaanatu nin ti guisi de cosa malu.* Lagaca nadóʼ ora guicaatu stiidxaʼ Dios ne lagudii lugar guicaa xcu ni ndaaniʼ ladxidoʼto, purtiʼ nga nga ni zanda gulá laatu.*
22 Laguni ni ná Stiidxaʼ Dios ne cadi gucaadiágasitu ni ná ni, purtiʼ pa riníʼ íquetu cayúnitu ni ná ni peru cadi zacá ni la? caguítesitu laca laatu.
23 Purtiʼ pa rucaadiaga si tuuxa ni ná Stiidxaʼ Dios, peru qué runi ni ná ni la? zeeda gaca casi ti binni ni ruuyaʼ laa* lu ti espeju.
24 Gúʼyasibe laabe, rireebe riebe ne nagueendaca rusiaandabe ximodo laabe.
25 Peru tuuxa ni ruuyaʼ chaahuiʼ xi ná ley stiʼ Dios —ley perfectu ni runi binni libre—, ne guni ni ná ni la? qué runadiaga si xi ná ni ne rusiaandaʼ ni, sínuque naca ti binni ni runi ni ná ley ne riuu nayecheʼ lu intiica ni guni.
26 Pa nuu binni riníʼ runi adorar Dios* peru qué rucueeza ruaa la? caguite laca laa,* ne qué risaca modo runi adorar Dios.
27 Para ganda gaca adoración* stinu nayá casi racalaʼdxiʼ Dios Bixhózenu ne cadi gaca ni nabiidiʼ la? naquiiñeʼ gápanu ca huérfano ne ca viuda ni cadiʼdiʼ ra nagana, ne gucáʼnanu ca cosa nadxabaʼ nuu ndaaniʼ guidxilayú riʼ.
Nota
^ Lit. «Lagudii lugar gunduuxeʼ aguante ca dxiiñaʼ stiʼ, ne zacá zácatu completu».
^ O «rudii Dios né generosidad ne qué ridxiichiné binni».
^ O «Naca binni riʼ indeciso ne inconstante».
^ O «runi presumir».
^ Lit. «corona».
^ O «runi atraer ne ora runi seducir ca deseu stiʼ laa».
^ Lit. «Ora maʼ guca fecundar deseu ca la? rale pecadu».
^ Lit. «guiráʼ don perfectu».
^ O «qué zusihuinni justicia stiʼ Dios».
^ O zándaca «guiráʼ xixé cosa malu».
^ O «ruuyaʼ cara stiʼ».
^ O «napa religión stiʼ».
^ Lit. «caguite xcorazón».
^ O «religión».
