Romanos 10:1-21
10 Hermanu ca’, de guidubi ladxiduáʼ runeʼ desear guilá ca binni Israel ne rinabaʼ Dios guni ni.
2 Purtiʼ ruuyaʼ cayúnicabe xhiiñaʼ Dios né stale gana,* peru cadi casi peʼ modo biziidicabe ni.
3 Cumu qué ñénecabe ximodo nga gácacabe nachaʼhuiʼ la?* gucaláʼdxicabe ñácacabe nachaʼhuiʼ modo nácabe, ne maʼ qué ninándacabe modo gudixhe Dios gaca binni nachaʼhuiʼ.
4 Biluxe Ley dxi beeda Cristu, ti guiráʼ tu gapa fe ganda gaca nachaʼhuiʼ.*
5 Ne para ganda gaca binni nachaʼhuiʼ* casi ná Ley la? ndiʼ nga ni bicaa Moisés: «Guiráʼ tu guni ni ná Ley la? zabani pur laani».
6 Peru zanda gaca binni nachaʼhuiʼ pur fe stiʼ. Sicaríʼ ná Stiidxaʼ Dios: «Cadi guiniʼluʼ ndaaniʼ ladxidoʼloʼ “¿Tu laa quibaʼ guibáʼ?”, ni nabe nga tu laa quibaʼ guibáʼ para guindeteʼ Cristu.
7 O “¿tu laa guiete ndaaniʼ abismo?”,* ni nabe nga tu laa guiete para guindisaʼ Cristu de lade gueʼtuʼ».
8 ¿Xi ná Stiidxaʼ Dios yaʼ? Sicaríʼ ná ni: «Gaxha nuu ca diidxaʼ ca de lii, nuu ni ndaaniʼ ruaaluʼ ne ndaaniʼ ladxidoʼloʼ», ne laani nga «diidxaʼ» ni runi predicarnu ne caquiiñeʼ gapa binni fe para guni cré ni.
9 Purtiʼ pa gusiidiluʼ binni Jesús nga Señor ne de guidubi ladxidoʼloʼ nápaluʼ fe gundisaʼ Dios laabe de lade gueʼtuʼ la? zalaluʼ.
10 Para gaca binni nachaʼhuiʼ, naquiiñeʼ gapa fe ndaaniʼ ladxidóʼ, peru napa xidé gusiidiʼ binni* ca diidxaʼ ni rulá.
11 Purtiʼ sicaríʼ ná Stiidxaʼ Dios: «Guiráʼ tu gapa fe laabe qué zatuí lú».
12 Purtiʼ biaʼca risaca ca judíu ne ca griegu ne ngueca Señor stiʼ guiracaʼ, ne laabe nga riguube ndaayaʼ guiráʼ ca ni rinabaʼ gacanebe laa.*
13 Purtiʼ «guiráʼ tu guinabaʼ gacané Jehová laa ne iquiiñeʼ labe la? zalá».*
14 Peru ¿ximodo guinábacaʼ gacanebe laacaʼ* pa qué gápacaʼ fe laabe yaʼ? ¿Ximodo gápacaʼ fe laabe pa qué huayunadiágacaʼ de laabe yaʼ? ¿Ximodo zanda gunadiágacaʼ de laabe, pa qué chuʼ tu guni predicar yaʼ?
15 ¿Ximodo chiguni predicar tuuxa pa qué chuʼ tu guseendaʼ laa yaʼ? Casi cá lu Stiidxaʼ Dios: «¡Nabé sicarú ñee ca binni ni ruíʼ ca noticia galán de ca cosa sicarú!».
16 Peru cadi guirácabe gucuaacabe ca noticia galán que. Casi guníʼ Isaías: «Jehová,* ¿tuu nga maʼ gupa fe lu mensaje stidu pue?».
17 Peru rapa binni fe ora maʼ binadiaga mensaje riʼ, ne runadiaga binni mensaje riʼ ora raca predicar stiidxaʼ Cristu.
18 Peru naa rinabadiidxaʼ: ¿Ñee qué ñunadiágacabe ni la? Binadiágacabe ni pue, purtiʼ «yendá ridxi stini lu guidubi guidxilayú, ne yendá mensaje stini dede últimu rincón stiʼ guidxilayú».
19 Peru naa rinabadiidxaʼ: ¿Ñee qué ganna ca binni Israel ni la? Primé guníʼ Moisés: «Zaquiiñeʼ ca binni de xcaadxi guidxi para guchiicheʼ laatu. Zaquiiñeʼ ti guidxi ni qué riene para gucaaʼ laatu guidxiichitu dede biaʼ qué gatiʼ xiánatu».
20 Peru qué nidxibi Isaías ora guníʼ: «Ca ni qué nuyubi naa, bidxélacaʼ naa. Ca ni qué ninabadiidxaʼ paraa nuaaʼ, binibiaʼcaʼ naa».
21 Peru sicaríʼ guniʼbe de ca binni Israel: «Guidubi dxi bixheleʼ naʼyaʼ nezalú ti guidxi ni qué ruzuubaʼ diidxaʼ ne ni qué riene».
Nota
^ Lit. «nápacabe celo pur Dios».
^ O «justo».
^ O «justo».
^ O «justo».
^ Lit. «iquiiñeʼ ruaa para gusiidiʼ binni».
^ O «guni invocar laabe».
^ O «guni invocarcaʼ laabe».
