Hebreos 4:1-16
4 Cumu cabézanu chuʼnu lu descansu stiʼ Dios la? naquiiñeʼ chuʼnu cuidadu laanu,* cadi málasi guihuinni maʼ qué runi merecer tobi de laanu chuʼ luni.
2 Purtiʼ laaca maʼ binadiáganu ca noticia galán, cásica binadiaga ca israelita que ni. Peru qué ñúnicaʼ ni ná ni,* nga runi qué ñacané diʼ ni laacaʼ. Qué nuzuubacaʼ diidxaʼ purtiʼ cadi naguidxi fe sticaʼ casi fe stiʼ ca ni bizuubaʼ diidxaʼ.
3 Peru laanu maʼ bisihuínninu nápanu fe, nga runi maʼ biuʼnu lu descansu stibe. Casi maca guniʼbe: «Nga runi bidxiicheʼ ne bineʼ jurar: “Qué ziuucabe lu descansu stinneʼ”». Ne qué ñuucabe lu descansu stibe neca maʼ bilúxebe dxiiñaʼ stibe dede dxi gule binni lu guidxilayú.*
4 Purtiʼ nuu ti lugar ra cá xi guniʼbe ra bizaa gadxe gubidxa: «Biziilaʼdxiʼ Dios de dxiiñaʼ stiʼ lu gadxe gubidxa».
5 Ne laaca guniʼbe sti biaje: «Qué ziuucabe lu descansu stinneʼ».
6 Ca binni bicaadiaga ca noticia galán que primé la? qué ñuucaʼ lu descansu stiʼ Dios purtiʼ qué nuzuubacaʼ diidxaʼ. Peru nuuruʼ binni zanda chuʼ,
7 purtiʼ gudixhe Dios sti dxi. Ne gudiʼdiʼ stale iza para bizeetebe de laani ra guniʼbe «yannadxí» lu salmo ni bicaa David. Casi maca biete lu carta riʼ: «Pa guiníʼnebe laatu yannadxí, cadi gácatu tercu».
8 Purtiʼ pa niné Josué laacabe ti lugar ra niziiláʼdxicabe, qué niníʼ diʼ Dios despué nuuruʼ sti dxi ra guiziiláʼdxicabe.
9 Nga runi nuuruʼ sti dxi casi sábadu* que para guiziilaʼdxiʼ xquidxi Dios.
10 Purtiʼ binni ni maʼ guyuu lu guendariziilaʼdxiʼ* stiʼ Dios la? laaca zaziilaʼdxiʼ de xhiiñaʼ, cásica biziilaʼdxiʼ Dios de dxiiñaʼ stiʼ.
11 Nga runi, gúninu stipa pur chuʼnu lu descansu stiʼ Dios, ti cadi chinándanu ejemplu stiʼ ca binni ni qué nuzuubaʼ diidxaʼ.
12 Purtiʼ nabani stiidxaʼ Dios ne napa poder. Jma nadúxhuni que ti espada ni naduxhuʼ guiropa ladu, zanda guiaazini* dede ra guxhéleni alma* de espíritu,* ne riaazini dede guxhéleni ra guiʼdiʼ ca dxita ladi binni ne riaazini dede ndaaniʼ dxita,* ne zanda gusihuínnini xi riníʼ íquenu ne xi deseu nuu ndaaniʼ ladxidoʼno.
13 Nin tobi de ca cosa ni bizáʼ Dios cadi nuu ra nagaʼchiʼ, sínuque ruuyaʼ dxíchibe guiráʼ ni, ne laabe cuídxibe cuenta laanu.
14 Nápanu ti sumo sacerdote* nandxóʼ ni maʼ nuu guibáʼ, laa nga Jesús, Xiiñiʼ Dios. Nga runi, cadi gusaana de gábinu binni nápanu fe laabe.
15 Zanda guiá sumo sacerdote stinu laanu purtiʼ nanna xi raca nagana para laanu ne purtiʼ maʼ gudiʼdiʼ guiráʼ ra cadídinu, xi si la? qué nuchee.
16 Nga runi, guidxíñanu né confianza ra nuu trono stiʼ Dios, purtiʼ laa nachaʼhuiʼ né laanu,* ti guiá laanu* ne gaca nachaʼhuiʼ né laanu ora peʼ caquiiñenu tu gacané laanu.
Nota
^ Lit. «guidxíbinu».
^ O «qué ñaca beneficiarcaʼ de mensaje que».
^ Raríʼ caniʼbe de ca xiiñiʼ Adán ne Eva. O «dede dxi guca fundar guidxilayú».
^ O «lu descansu».
^ O «guiáʼzeni».
^ O «riáʼzeni ne ruxhéleni coyuntura de tuétano».
^ Biiyaʼ Glosario.
^ O «gapa misericordia laanu».
