Pascua ca nga ti celebración ni biʼniʼ ca judíu ni rusietenalaʼdxiʼ laanu dxi bilá Dios ca israelita que de esclavu Egipto lu iza 1513 ante de ca dxi stiʼ Jesús. Dios gudxi laacabe guietenaláʼdxicabe ni guiráʼ iza lu 14 de beeu abib, despué biree lá beeu ca nisán (Éxodo 12:42; Levítico 23:5).

¿Xiñee láʼ ni Pascua?

 Diidxaʼ Pascua ca riquiiñecabe ni para guiníʼcabe tiempu bilá Jehová ca israelita de plaga ni biiti guiráʼ ca primé xiiñiʼ ca egipciu que (Éxodo 12:27; 13:15). Ante guseendaʼ Jehová plaga ni biiti ca primé xiiñiʼ ca egipciu que, gúdxibe ca israelita guuticaʼ ti dendxuʼ o ti chivu ne guneʼcaʼ rini stime ra puertaʼ lídxicaʼ casi ti seña (Éxodo 12:21, 22, biiyaʼ primé nota). Ora guʼyaʼ Dios seña ca, qué ziuu diʼ ra lídxicabe ne zulá ca baʼduʼ primé stícabe (Éxodo 12:​7, 13).

¿Ximodo biʼniʼ ca binni bibani tiempu ruzeeteʼ Biblia que Pascua?

 Bisiene Dios ca israelita ximodo gúnicaʼ primé Pascua que. a Chupa chonna cosa ni rieeteʼ ndaaniʼ Biblia ni zeeda guiníʼ de Pascua nga cani zeeda raríʼ:

•   Sacrificiu. Ca familia que ribicaʼ ti dendxuʼ o ti chivu de ti iza 10 de abib (nisán) ne runi sacrificarcaʼ laame 14 de abib. Primé biaje biʼniʼ celebrárcabe Pascua, binéʼ ca israelita que rini stime lu ca poste stiʼ puertaʼ sticaʼ ne luguiáʼ ni, bigaaguicabe dendxuʼ que ne gudócabe laame (Éxodo 12:​3-9).

•   Ni gudócabe. Cadi dendxuhuiiniʼ o chivu si gudó ca israelita que lu Pascua, laaca gudócabe pan sin levadura ne verdura ni nandáʼ (Éxodo 12:8).

•   Saa ni bíʼnicabe. Despué de Pascua que, biʼniʼ ca israelita Saa stiʼ Pan Sin Levadura, ne rindaa ni gadxe gubidxa (Éxodo 12:17-​20; 2 Crónicas 30:21).

•   Ni bisiidicabe. Cani napa xiiñiʼ biʼniʼ aprovecharcaʼ Pascua que para guiníʼnecaʼ xiiñicaʼ de Jehová (Éxodo 12:25-27).

•   Viaje bíʼnicabe. Despué, bizulú ca israelita guyecaʼ Jerusalén para gúnicaʼ Pascua (Deuteronomio 16:​5-7; Lucas 2:​41).

•   Xcaadxi costumbre. Ca dxi stiʼ Jesús, güéʼcabe vinu ne biindacabe para gusisácacabe Dios dxi rúnicabe Pascua (Mateo 26:19, 30; Lucas 22:15-​18).

Ni cadi biaʼsi runi crécabe de Pascua

 Ni runi cré binni: Caquiiñeʼ guni celebrar ca xpinni Cristu Pascua.

 Ni dxandíʼ: Biluxe si Jesús de biʼniʼ Pascua que 14 de nisán, iza 33 despué de ca dxi stiʼ Jesús, gudixhestibe guietenaláʼdxinu Guendaroxhi stiʼ Señor (Lucas 22:19, 20; 1 Corintios 11:20). Nga runi, maʼ guendaroxhi ca nga guyuu lugar stiʼ Pascua que, purtiʼ rusietenalaʼdxiʼ ni laanu guendaguti stiʼ Jesús, ni zeeda gaca casi dendxuhuiiniʼ ni ruuticabe lu Pascua que (1 Corintios 5:7). Jma risaca guendaguti stiʼ Jesús que sacrificiu ni rúnicabe lu Pascua purtiʼ ribee ni binni de lu náʼ pecadu ne rulá ni binni de guendaguti (Mateo 20:28; Hebreos 9:15).