Armagedón nga guerra ra chitinde Dios ne ca gobiernu ni nuu lu Guidxilayú riʼ. Nuu ca gobiernu ne ca xpinni en contra de Dios purtiʼ qué nacaʼ gúnicaʼ ni nabe (Salmo 2:2). Lu guerra ni láʼ Armagedón zanitilú ca gobiernu ni nuu lu Guidxilayú riʼ (Daniel 2:44).

 Diidxaʼ Armagedón, ni laaca ricá casi Har-Magedón, ti biaje si nga riete ni lu Biblia, ne riete ni lu libru stiʼ Apocalipsis. Lu ti profecía na zaca reunir «ca rey nuu lu guidubi guidxilayú» para tíndecaʼ «lu guerra ni chigaca dxi roʼ stiʼ Dios ni jma napa poder». Zaca guerra riʼ «ti lugar ni rábicabe Armagedón lu diidxaʼ hebreu» (Apocalipsis 16:14, 16).

 ¿Tuu nga ca ni chitinde lu guerra de Armagedón? Ejércitu stiʼ Dios ni nuu guibáʼ ne xaíque stícabe nga Jesucristu, zunitilúcabe guiráʼ ca enemigu stiʼ Dios (Apocalipsis 19:11-16, 19-21). Lade ca binni ni zunitilúcabe nga nuu ca binni ni rucaalú Dios ne ca ni qué runi ni nabe (Ezequiel 39:7).

 ¿Ñee maca nuu paraa chigaca guerra de Armagedón la? Coʼ. Zaca guerra de Armagedón lu guidubi Guidxilayú, ne cadi ti lugar si (Jeremías 25:32-34; Ezequiel 39:17-20).

 Diidxaʼ Armagedón (lu hebreu, Har Meghiddóhn) riníʼ ni «Dani Meguidó». Guyuu guidxi Meguidó lu territorio ra guleza guidxi Israel dxiqué. Guyuu caadxi guerra gaxha de raqué ne lu Biblia riete caadxi de laacani (Jueces 5:19, 20; 2 Reyes 9:27; 23:29). Nga runi zanda guininu gastiʼ nin ti lugar láʼ Armagedón ndaaniʼ guidxi Meguidó ne gastiʼ nin ti dani racá. Ne lu valle de Jezreel, ra nuu guidxi Meguidó, qué zanda chuʼ guiráʼ ca ni chigucaalú Dios. Nga runi zanda guininu, Armagedón nga ra guidagulisaa guiráʼ ca gobiernu jma risaca nuu lu Guidxilayú riʼ para gucaalucaʼ gobiernu stiʼ Dios.

 ¿Xi zazaaca lu guerra de Armagedón? Qué gánnanu ximodo peʼ zaquiiñeʼ Dios poder ni napa, peru zaquiiñebe poder stibe modo biquiiñebe ni dxiqué, zanda iquiiñebe granizu, xu roʼ, zanda gúnibe xiixa para guilaahua ca guidxi ca, gusábabe guí ne azufre de guibáʼ, rayu ne epidemia (Job 38:22, 23; Ezequiel 38:19, 22; Habacuc 3:10, 11; Zacarías 14:12). Cumu qué zanna binni xi guni la? zucaa Dios laacabe guuticabe laca laacabe ne despué zudiicabe cuenta Dios peʼ nga cucaalúcabe (Ezequiel 38:21, 23; Zacarías 14:13).

 ¿Ñee zanitilú Guidxilayú riʼ lu guerra de Armagedón la? Qué zanitilú Guidxilayú lu guerra de Armagedón. Bizáʼ Dios Guidxilayú riʼ para guibani binni ndaaniʼ ni para siempre (Salmo 37:29; 96:10; Eclesiastés 1:4). Nga runi zanda guininu qué zanitilú guiráʼ ni nuu ndaaniʼ Guidxilayú riʼ lu Armagedón. Sínuque ora guzulú guerra riʼ la? zalá «ti gran muchedumbre» de binni ni cayuni ni ná Dios (Apocalipsis 7:9, 14, nota; Salmo 37:34).

 ¿Ñee cadi rusiidiʼ Biblia «zanitilú guidxilayú» riʼ lu Armagedón la? Lu caadxi versículo stiʼ Biblia riquiiñeʼ diidxaʼ Guidxilayú para guiníʼ ni de Guidxilayú stinu riʼ. Peru laaca riquiiñeʼ Biblia diidxaʼ riʼ para guiníʼ ni de ca binni ni nuu en contra de Dios (1 Juan 2:15-17). Nga runi zanda guininu lu guerra de Armagedón «zanitilú guidxilayú» o ca binni ni qué runi ni ná Dios (Mateo 24:3, Biblia de Jerusalén).

 ¿Padxí guzulú guerra de Armagedón yaʼ? Jesús guníʼ ziuu ti «gran tribulación» ne despué zuzulú guerra de Armagedón, peru laaca guniʼbe «padxí ne pora la? guirutiʼ ganna, nin ca ángel ni nuu guibáʼ, nin Xiiñiʼ Dios, sínuque Bixhózesiaʼ» (Mateo 24:21, 36, nota). Ni ruzeeteʼ Biblia nga zuzulú Armagedón lu presencia stiʼ Jesús ne bizulú ni lu iza 1914 (Mateo 24:37-39).