Biblia ná jneza nga gannaxhii tobi laca laa peru guni ni biaʼ galán, para ganda gúninu ni caquiiñeʼ gápanu laanu, guni respetarnu laanu ne chuʼnu nayecheʼ (Mateo 10:31). Lugar de guyúbinu puru si para laanu, Biblia ná cadi gannaxhii xhaatanu laanu.

¿Tuu laa caquiiñeʼ gannaxhiinu jma yaʼ?

1.   Dios nga naquiiñeʼ gannaxhiinu primé. Biblia ná mandamientu ni jma risaca nga: «Gunaxhii Dios stiuʼ de idubi ladxidóʼ loʼ» (Marcos 12:28-30; Deuteronomio 6:5).

2.   Guiropa mandamientu jma risaca nga: «Gunaxhii stobi cásica nadxii lu lii» (Marcos 12:31; Levítico 19:18).

3.   Neca qué riníʼ Biblia naquiiñeʼ gannaxhiinu laca laanu, mandatu ni ná: «Gunaxhii stobi cásica nadxii lu lii» rusihuinni normal ni ne galán nga cadi gannaxhii xhaatanu nin guni respetar xhaatanu laanu.

¿Tu gunnaxhii Jesús jma?

 Jesús bisihuinni naquiiñeʼ gácanu equilibradu ora gannaxhiinu Dios, gannaxhiinu prójimo ne ora gannaxhiinu laca laanu. Ne laaca biʼniʼ mandarbe ca discípulo que chinándacaʼ ejemplu stibe (Juan 13:34, 35).

1.   Ni jma bisaca para Jesús nga gannaxhii Dios, ngue runi bíʼnibe dxiiñaʼ ni bisaanané laabe. Laapebe guniʼbe: «Para ganna binni nadxiee Bixhozeʼ, ne rune ni gudxi naa guneʼ» (Juan 14:31).

2.   Jesús gunnaxhii prójimo stiʼ ne bisihuínnibe ni ra bizaaláʼdxibe laacaʼ dede bidiibe xquendanabánibe pur guiracaʼ (Mateo 20:28).

3.   Bisihuinni Jesús nadxii laca laa biaʼ galán, purtiʼ gulee tiempu para guiziilaʼdxiʼ, gó ne chuʼné ca discípulo stiʼ né ca binni ni riuulaʼdxiʼ cani rusiidibe que nayecheʼ ti ratu (Marcos 6:31, 32; Lucas 5:29; Juan 2:1, 2; 12:2).

¿Pa gannaxhiinu stobi jma que laanu, ñee riníʼ nga maʼ qué ziuʼnu nayecheʼ o maʼ qué zannaxhiipenu laanu la?

 Coʼ, cadi zacá diʼ ni, purtiʼ bizáʼ Dios laanu casi laa, ne cualidad jma risaca nápabe nga gannaxhiibe sin cuézabe gastiʼ (Génesis 1:27; 1 Juan 4:8). Nga rusihuinni guyanu para gannaxhiinu xcaadxi binni. Neca cadi malu nga gannaxhiinu laca laanu, ni dxandíʼ runi laanu nayecheʼ nga gannaxhiinu Dios jma que xcaadxi cosa ne quixhe íquenu gácanu nachaʼhuiʼ né xcaadxi binni. Biblia ná «jma nayeche ni rudii que ni ricaa» (Hechos 20:35).

 Yanna riʼ, stale binni ná para chuʼ nayecheʼ caquiiñeʼ guiníʼ ique puru si para laa. Laacabe nácabe cadi caquiiñeʼ gannaxhiicabe prójimo stícabe, sínuque laca laacabe. Ni dxandíʼ la? riuʼnu jma nazaaca ne jma nayecheʼ ora rinándanu conseju ni zeeda lu Biblia, ra ná: «Naquiiñe uyubi nu acané nu stobi ne cadi uyubi nu para laasi nu» (1 Corintios 10:24).