¿Ñee ndaaniʼ ladxidóʼ binni nga nuu Reinu stiʼ Dios la?
Ni ricabi Biblia
Coʼ, cadi ndaaniʼ ladxidóʼ ca xpinni Cristu nga nuu Reinu stiʼ Dios. a Biblia ná naca ni ti «Reinu ni nuu guibáʼ» (Mateo 4:17). Laaca cusiene ni naca Reinu riʼ ti gobiernu ni maʼ cayuni mandar dede guibáʼ. Guidúʼyanu xiñee.
Ma’ gulí Dios tuu nga ca ni chiguni mandar lu Reinu stiʼ, laaca napa ni binni ni guni mandar ni ne napa ni ley stini, ne zacané ni gaca ni ná Dios ndaaniʼ Guidxilayú casi ca raca ni guibáʼ (Mateo 6:10; Apocalipsis 5:10).
Zuni mandar Reinu stiʼ Dios binni de guirá guidxihuiiniʼ, nación ne binni ni riníʼ gadxé gadxé idioma (Daniel 7:13, 14). Cadi binni nga gulí gobiernu riʼ; Dios nga gulí ni ne bidii autoridad Jesús para guni mandar binni guidxilayú (Salmo 2:4-6; Isaías 9:7).
Jesús gudxi ca apóstol ni qué nusaana laa, ziuunecaʼ laabe lu Reinu stiʼ Dios. ¿Xi para yaʼ? Sicaríʼ gúdxibe laacaʼ: «Para […] cuitu lu trono», o para gácacaʼ rey ne guni mandárnecaʼ laabe (Lucas 22:28, 30).
Zunduuxe Reinu stiʼ Dios ca enemigu stiʼ (Salmo 2:1, 2, 8, 9; 110:1, 2; 1 Corintios 15:25, 26).
Qué rusiidiʼ Biblia cayuni mandar Reinu stiʼ Dios ndaaniʼ ladxidóʼ binni. Ni rusiidiʼ Biblia nga zanda chindá «ca noticia galán stiʼ Reinu» o «stiidxaʼ Reinu» ndaaniʼ ladxidoʼno (Mateo 13:19; 24:14).
¿Peru cadi guníʼ Jesús: «Nuu Reinu stiʼ Dios luguiatu la»?
Lu caadxi Biblia, sicaríʼ guca traducir Lucas 17:21, ná ni: «Nuu reinu stiʼ Dios luguiatu» (Biblia Americana San Jerónimo). Nga runi stale binni riníʼ ique ndaaniʼ ladxidóʼ nga nuu Reinu stiʼ Dios. Peru para ganda guiene chaahuinu versículo riʼ, caquiiñeʼ gánnanu xiñee guníʼ Jesús ca diidxaʼ riʼ.
Qué zanda diʼ chuʼ Reinu stiʼ Dios ndaaniʼ ladxidóʼ ca hombre ni gucalaʼdxiʼ ñuuti Jesús.
Gudxi Jesús ca diidxaʼ riʼ ca fariseu, caadxi xaíque stiʼ ca judíu ni guca nanalaʼdxiʼ laabe ne biyúbicaʼ modo guuticaʼ laabe (Mateo 12:14; Lucas 17:20). ¿Ñee ni gucalaʼdxiʼ Jesús niníʼ nga nuu Reinu stiʼ Dios ndaaniʼ ladxidóʼ ca hombre malu riʼ la? Coʼ, purtiʼ laapebe gúdxibe laacaʼ: «Dxaʼ guendarusiguii ne cosa malu ndaaniʼ ladxidoʼto» (Mateo 23:27, 28).
Lu xcaadxi Biblia biaʼsi modo huayuni traducírcabe Lucas 17:21. Sicaríʼ bisaana El<u202F> Nuevo Testamento original ni: «Ma’ nuu Reinu stiʼ Dios ládenu», ne lu Biblia diidxazá Traducción del Nuevo Mundo de las Santas Escrituras ná: «Nuu Reinu stiʼ Dios ládetu». Yanna, ¿ximodo nga nuu Reinu ni nuu guibáʼ lade ca fariseu yaʼ? Purtiʼ nuu Jesús ládecabe, ni maʼ gulí Dios para gaca rey lu Reinu stiʼ (Lucas 1:32, 33).
a Stale religión rusiidiʼ nuu Reinu stiʼ Dios ndaaniʼ ladxidóʼ binni. Grupu ni láʼ Convención de Bautistas del Sur bicaa ca diidxaʼ riʼ: «Cayuni mandar Reinu stiʼ Dios ndaaniʼ ladxidoʼno». Ne lu libru Jesús de Nazaret, bicaa papa Benedicto XVI ca diidxaʼ riʼ: «Zeeda Reinu stiʼ Dios luguianu pa gucaadiáganu Dios de guidubi ladxidoʼno».
Laaca zándaca ziuuláʼdxiluʼ ca ndiʼ
ESSENTIAL BIBLE TEACHINGS
Xii nga Reinu stiʼ Dios
Ca dxi bicheeche Jesús diidxaʼ, jma guníʼ de Reinu stiʼ Dios que de sti tema. Maʼ stale iza huanabaʼ binni gueeda Reinu ca.
TORRE STIʼ NI RAPA
¿Tuu nga Rey lu Reinu stiʼ Dios?
Gucané Dios ca hombre ni bicaa Biblia para gucaacaʼ caadxi cosa ni gacané binni gudii cuenta tuu nga Rey lu Reinu stiʼ Dios. Binni ni bizaaca guiráʼ ni bizéʼtenu riʼ nga Jesucristu.
CA NI RUSIIDIʼ BIBLIA
Biiyaʼ ximodo ridúʼndanedu binni Biblia
Gunabaʼ guʼndané tuuxa lii sin quíxeluʼ.